Fréttablaðið - 28.11.2008, Blaðsíða 8

8 28. nóvember 2008 FÖSTUDAGUR
1 Hvaða ráðherrar segir Gylfi
Arnbjörnsson, forseti ASÍ, að
eigi að segja af sér?
2 Hver skoraði eina mark
Liverpool gegn Marseille á
miðvikudaginn?
3 Hverju fórnaði Brandon
Flowers, söngvari hljómsveitar-
innar The Killers, fyrir nýja
plötu hljómsveitarinnar?
SVÖRIN ERU Á SÍÐU 54
STJÓRNMÁL Leggja á Tryggingar-
sjóði innstæðueigenda til peninga
svo sjóðurinn geti staðið skil á
greiðslum til eigenda innlánsreikn-
inga í íslensku bönkunum í útlönd-
um. Peningarnir eiga að fást með
lánum frá ríkjum þar sem slíkum
reikningum er til að dreifa. Mest
er fjárþörfin vegna Icesave-reikn-
inga Landsbankans í Bretlandi og
Hollandi en að einhverju leyti
vegna skuldbindinga Glitnis og
Kaupþings.
Í kjölfar bankahrunsins reis deila
milli íslenskra stjórnvalda annars
vegar og breskra og hollenskra – og
síðar Evrópusambandsins – hins
vegar um ábyrgðir íslenska ríkis-
ins á Tryggingarsjóði innstæðueig-
enda. Í sjóðnum var aðeins brot
þeirrar fjárhæðar sem bankarnir
hefðu með réttu átt að greiða til
hans. Íslensk stjórnvöld töldu – og
telja enn – vafa leika á um ábyrgð
ríkis á tryggingarsjóðum, ekki síst
við hrun fjármálakerfis þjóðar.
Evrópusambandið sjálft og einstök
aðildarríki þess telja á hinn bóginn
engan slíkan vafa uppi. Ríki beri að
ábyrgjast greiðslur. Eftir flóknar
og erfiðar samningaviðræður féll-
ust íslensk stjórnvöld á þau sjónar-
mið, að því gefnu að við útfærslu
samkomulags yrði tekið tillit til
erfiðra og fordæmalausra aðstæðna
Íslands og nauðsynjar þess að
skuldbindingar raski ekki áætlun-
um um endurreisn fjármála- og
efnahagskerfis landsins.
Ríkisstjórnin hefur með þings-
ályktunartillögu óskað heimildar
Alþingis til að leiða til lykta samn-
inga við erlend ríki um málið.
Í tillögunni segir að það sé mat
ríkisstjórnarinnar að hagsmunum
Íslands til lengri tíma litið sé best
borgið með því að stjórnvöld styðji
við Tryggingarsjóðinn svo hann
geti ábyrgst lágmarkstryggingu þá
sem EES-reglur mæla fyrir um.
Stendur til að gera það með lántök-
um frá þeim ríkjum sem hlut eiga
að máli með ábyrgð íslenska ríkis-
ins. Óvíst sé hve há þau lán þurfi að
vera enda ráðist það af því að hve
miklu leyti andvirði eigna bankanna
mun renna til sjóðsins.
Samkvæmt bráðabirgðamati
Alþjóðagjaldeyrissjósins (AGS)
nema heildarskuldbindingar
vegna innlánsreikninga íslensku
bankanna í útlöndum um 500 millj-
örðum króna. Líkt og greint var
frá í Fréttablaðinu í gær telur
sjóðurinn eignir bankanna standa
undir helmingi þeirrar fjárhæðr-
ar. Afganginn, um 245 milljarða,
þurfi ríkissjóður og þar með skatt-
greiðendur að bera.
bjorn@frettabladid.is
Tryggingarsjóðurinn
efldur vegna Icesave
Tryggingarsjóði innstæðueigenda verða lagðir til peningar til að standa við skuld-
bindingar vegna innlána í útlöndum. Peninganna verður aflað með erlendum
lánum. Stjórnvöld segja fjárhæðina óljósa en AGS reiknar með 245 milljörðum.
ODDVITARNIR Slá á erlend ríki um lán svo hægt sé að mæta skuldbindingum
Tryggingarsjóðs innstæðueigenda. FRÉTTABLAÐIÐ/PJETUR
„Eftir að gengið hafði verið frá vilja-
yfirlýsingu ríkisstjórnarinnar í sam-
vinnu við sérfræðinga Alþjóðagjald-
eyrissjóðsins var skipulega unnið að
því í gegnum tengslanet utanríkis-
þjónustunnar að kynna málstað og
málaleitan Íslands fyrir aðildarríkj-
um Alþjóðagjaldeyrissjóðsins. Varð
framan af ekki vart neins annars en
stuðnings. Það snerist hins vegar og
verulegar tafir urðu á fyrirtöku vilja-
yfirlýsingar Íslands í framkvæmda-
stjórn sjóðsins.“
Úr þingsályktunartillögu ríkisstjórnarinnar.
UTANRÍKISÞJÓNUSTAN KYNNTI MÁLIÐ
®
DÓMSMÁL Hæstiréttur hefur
staðfest níu mánaða fangelsis-
dóm héraðsdóms yfir 25 ára
gömlum karlmanni sem rauf
skilorð með því að hafa í
hótunum við og kýla lögreglu-
mann árið 2005.
Lögregla var að hafa afskipti
af manninum þegar hann sló
snögglega með krepptum hnefa
hægri handar til lögreglumanns
og kom höggið við eyrað á vinstri
vanga. Maðurinn fylgdi högginu
eftir með því að ráðast á lög-
reglumanninn og slá til hans
ítrekað í handlegg og líkama.
Maðurinn á allnokkurn
sakarferil að baki. - jss
Níu mánaða fangelsi:
Kýldi og hótaði
lögreglumanni
VENESÚELA, AP Dmítrí Medvedev
Rússlandsforseti samþykkti í
opinberri heimsókn sinni í
Venesúela í gær að Rússar aðstoði
þarlend stjórnvöld við að koma
sér upp kjarnorkuverum til
raforkuframleiðslu. Hann lýsti því
jafnframt yfir að Rússar væru
reiðubúnir að taka þátt í viðskipta-
samstarfi Suður-Ameríkuríkja
sem lúta sósíalískum valdhöfum,
en Hugo Chavez, forseti Venesú-
ela, hefur haft forgöngu um að
stofna til þess samstarfs.
Medvedev nýtti heimsókn sína
til Venesúela til að treysta áhrif
Rússa í Rómönsku Ameríku,
einkum með auknum samningum
um viðskipti og hernaðartengsl.
- aa
Rússlandsforseti í Venesúela:
Heitir kjarn-
orkuaðstoð
BANDAMENN Gestgjafinn Hugo Chavez
faðmar hinn tigna gest frá Rússlandi.
FRÉTTABLAÐIÐ/AP
VINNUMARKAÐUR Alls 25 starfs-
mönnum Eimskipafélags Íslands á
Íslandi og 47 starfsmönnum
félagsins í Evrópu verður sagt upp
störfum nú um mánaðamótin.
Samkvæmt tilkyningu frá
félaginu eru uppsagnirnar liður í
umfangsmiklum hagræðingar-
aðgerðum í ljósi efnahagsað-
stæðna, sem meðal annars koma
fram í verulegum samdrætti á
innflutningi til landsins. Til að
koma í veg fyrir frekari uppsagnir
verða laun starfsmanna, sem hafa
yfir 300 þúsund í mánaðartekjur
lækkuð um 10 prósent ásamt því
sem dregið verður úr vakta- og
yfirvinnu. Þá verður skipum
Eimskipa fækkað úr ellefu í átta
auk þess sem gripið verður til
annarra hagræðingaraðgerða sem
snúa að öðrum þáttum í rekstri
félagsins. - ovd
Skipum fækkar í átta:
Uppsagnir
hjá Eimskip
FRÁ SUNDAHÖFN Með hagræðingar-
aðgerðunum áætlar Eimskipafélagið
að spara um 2,4 milljarða króna á
ársgrundvell. FRÉTTABLAÐIÐ/GVA
VERSLUN Verslun Hagkaupa í
Skeifunni verður framvegis opin
allan sólarhringinn, í það minnsta
fram að jólum. Mælist breytingin
vel fyrir verður þetta opnunar-
tíminn til frambúðar.
Með þessu er brugðist við
óskum viðskiptavina um aukið
aðgengi að vöruúrvali Hagkaups,
að því er fram kemur í fréttatil-
kynningu. - hhs
Sló í höfuð með glerflösku
Maður á þrítugsaldri hefur verið
ákærður af embætti ríkissaksóknara
fyrir að slá mann í höfuðið með
flösku. Fórnarlambið krefst rúmlega
400 þúsunda króna í skaðabætur.
DÓMSTÓLAR
Hvað um tónlistarhúsið?
Steinunn Valdís Óskarsdóttir hefur
lagt fram fyrirspurn til menntamála-
ráðherra um stöðuna á byggingu tón-
listar- og ráðstefnuhússins. Vill hún
vita hvernig ráðherra sér framhald
verkefnisins, „nú þegar framkvæmda-
aðilar eru komnir í þrot“ eins og hún
orðar það.
ALÞINGI
JAFNRÉTTISMÁL Kynbundinn launamunur á heildar-
launum er 19,5 prósent, körlum í vil. Hefur þá verið
tekið tillit til vinnutíma, starfs, menntunar, aldurs,
atvinnugeira, ábyrgðar í starfi og þess hvort fólk er
sjálfstætt starfandi eða launþegar.
Þetta kemur fram í skýrslu sem Félagsvísinda-
stofnun Háskóla Íslands vann fyrir félags- og
tryggingaráðuneytið og kynnt var í gær. Skýrslan
byggir á launarannsókn sem er sú fyrsta sem nær
yfir allan vinnumarkaðinn á Íslandi en fyrri
rannsóknir hafa verið bundnar við einstök stéttar-
félög, fyrirtæki eða stofnanir.
Samkvæmt skýrslunni eru konur með 74 prósent
af heildarlaunum karla en að teknu tilliti til vinnu-
tíma, þar sem karlar vinna að jafnaði lengri
vinnutíma, eru konur með 84 prósent af launum
karla.
„Almennt segjast karlar bera meiri ábyrgð í starfi
en konur á meðan ábyrgð á heimilisstörfum og
umönnun barna er frekar á herðum kvenna en
karla,“ segir í niðurstöðum skýrslunnar.
Á höfuðborgarsvæðinu eru karlar með 10,3
prósenta hærri heildarlaun en konur en á lands-
byggðinni er leiðréttur kynbundinn launamunur 38
prósent, körlum í vil. - ovd
Kynbundinn launamunur er meiri á landsbyggðinni en á höfuðborgarsvæðinu:
Launamunur enn við lýði
BARÁTTUFUNDUR Þrátt fyrir áralanga baráttu gegn kynbundn-
um launamun mælist hann enn 19,5 prósent þegar tekið
hefur verið tillit til annarra þátta. FRÉTTABLAÐIÐ/HARI
VIÐSKIPTI „Hugtakið bankaleynd
má ekki verða skálkaskjól,“ segir
Björgvin G. Sigurðsson, viðskipta-
ráðherra.
Hann segir það blasa við að
sumt falli þar undir en annað ekki.
Hann nefnir sem dæmi að banka-
leynd sé aflétt í væntanlegum
lögum um sérstakan saksóknara
og rannsóknarnefnd sem eigi að
skoða bankahrunið.
Bankarnir og Fjármálaeftirlitið
hafa ítrekað neitað að veita
almenningi upplýsingar á grund-
velli bankaleyndar. Kaupþing
hefur raunar vísað til þess að
tveggja ára fangelsi liggi við brot-
um á bankaleynd og Glitnir hefur
kært Morgun-
blaðið til Fjár-
málaeftirlitsins
fyrir að birta
upplýsingar úr
lánabókum
gamla Glitnis.
Davíð Odds-
son, seðlabanka-
stjóri, Björn
Bjarnason,
dómsmálaráð-
herra og Ágúst Ólafur Ágústsson,
formaður viðskiptanefndar
Alþingis, hafa allir sagt að banka-
leynd eigi ekki við þegar upplýsa
þurfi um hrun bankanna.
Björgvin er spurður hvort eðli-
legt sé að menn rjúfi bankaleynd
til að hagnast á því persónulega
eða fyrir hönd þess fyrirtækis
sem þeir starfa hjá. „Nei, það
getur varla talist það.“ En ættu
slíkir menn að starfa hjá fjármála-
fyrirtækjum? „Ég get ekki fellt
dóm um það í sjálfu sér, það hlýtur
að verða að skoðast í hverju tilviki
fyrir sig.
Árni Tómasson, formaður skila-
nefndar Glitnis, var bankastjóri
Búnaðarbankans árið 2003, þegar
Fjármálaeftirlitið ávítaði bankann
fyrir brot á bankaleynd.
„Ég er ekki dómari og ætla ekki
að dæma um þetta mál,“ segir
Björgvin. - ikh
Viðskiptaráðherra setur sig ekki í dómarasæti um brot á bankaleynd:
Bankaleynd ekki skálkaskjól
BJÖRGVIN G
SIGURÐSSON
Hagkaup í Skeifunni:
Opið 24 tíma
sólarhringsins
VEISTU SVARIÐ?