Þjóðlíf - 01.11.1986, Blaðsíða 14
Myndlistarmaður
Sigurður
Þórir
Sigurðsson
Sigurður Þórir Sigurðsson opnar einkasýningu á verkum sínum þann
8. nóvember í nýju galleríi við Óðinstorg. Hann hefur haldið fjölda
einkasýninga áður, þá síðustu sl. vor, og tekið þátt í fjölda samsýn-
inga hér heima og erlendis.
Sigurður Þórir er fæddur árið 1948 í Reykjavík. Hann stundaði
nám við Myndlista- og handíðaskólann 1968-70 og hóf síðan nám við
Listaháskólann í Kaupmannahöfn 1974 og var þar við nám í fjögur
ár.
Sigurður Þórir mun sýna myndir málaðar með olíulitum á striga.
Viðfangsefni hans er ætíð manneskjan. „Mér finnst ég nú vera að
túlka innri veruleika mannsins og áhrif umhverfisins á hann,“ segir
Sigurður Þórir um myndefni sitt. „Áður var ég meira að fást við
gráan veruleika mannsins. Nútímasamfélagið er viðfangsefni mitt og
hvernig manninum gengur að lifa í því samfélagi með alla þessa
geðveiki í kringum sig.“
Konur hafa alla tíð verið sterkar í myndum Sigurðar Þóris, -
sterkari en þeir karlmenn sem koma við sögu í myndum hans.
„Konur eru tvímælalaust sterkari en maðurinn í augnablikinu," segir
Sigurður Þórir. „Þeir sem eru að brjótast út úr viðjum vanans eru
ætíð sterkari. En kannski finnst mér þetta bara af því að ég er svo
veikur sjálfur! Ég furða mig hins vegar alltaf á því hvað konur eru
sterkar; þær eru miklu ábyrgðarfyllri en maðurinn gagnvart lífinu,
svo dæmi sé tekið. Svo hefur konan geysilega sterk áhrif á mann sem
karlmann.“
Sú breyting hefur orðið á viðfangsefni Sigurðar Þóris frá síðustu
sýningu hans að nú eru karlmaður og kona yfirleitt ekki saman á
myndum. „Nei, ég er ekki að boða aðskilnað kynjanna," segir hann,
„en ég er kannski búinn með það myndefni sem ég var að fást við.
Kannski er bara nóg að glíma við annað kynið í einu.“ Ljósmynd: Sigurður Bragason
14 ÞJÓÐLÍF