Fréttablaðið - 09.09.2011, Blaðsíða 42
9. september 2011 FÖSTUDAGUR30
Meðal annars efnis:
Mikil rannsóknarvinna
Höfundar Heimsendis-þáttanna leituðu víða fanga
við gerð handritsins, meðal annars hjá starfsfólki og
vistmönnum geðdeilda.
Dagur íslenskrar náttúru
Fjórir náttúruunnendur lýsa sambandi sínu við náttúru
Íslands í tilefni heiðursdagsins þann 16. september.
Tíu ár frá hryðju-
verkaárásunum
11. september
Farið yfir atburðina þennan örlagaríka dag og velt upp
hverjar langtímaafleiðingar árásanna urðu.
30
menning@frettabladid.is
Fyrsta frumsýning vetrarins í
Borgarleikhúsinu verður í kvöld
þegar Zombíljóðin verða sýnd á
Litla sviðinu. Þetta er þriðja verk
leikhópsins Mindgroup, sem bæði
semur og flytur verkið, á jafn
mörgum árum í Borgarleikhús-
inu en á undan komu Þú ert hér og
Góðir Íslendingar.
Öll taka þessi verk á samtíma
okkar með einum eða öðrum
hætti en í Zombíljóðunum kveður
við myrkari tón, þar sem fjallað
er um hvernig við bregðumst við
áföllum.
„Við tökum fyrir nýlega, óhugn-
anlega atburði úr okkar samfélagi
og könnum möguleikann til hlut-
tekningar,“ segir Jón Atli Jónsson,
einn af félögum í Mindgroup.
Sýningunni er lýst sem nær-
göngulli og ekki fyrir viðkvæma.
„Við höfum til dæmis fengið
nokkra fjölmiðlamenn til að sjá
sýninguna og það kemur við þá
að sjá atburði, sem þeir hafa jafn-
vel sagt sjálfir frá, í þessu sam-
hengi. Við búum í samfélagi þar
sem fréttir af áföllum og ham-
förum dynja á okkur reglulega.
Maður sér það á fréttaflutningnum
að það er alltaf að verða erfiðara
að ná til fólks; það er ekki nóg að
sýna mynd af sundurskotnu líki
í Palestínu heldur þarf að fylgja
með texti sem segir: „Þetta er
hræðilegt.“ Við erum því að skoða
hvort það geti verið að sársauka-
þröskuldurinn sé orðinn of hár,
hvort við séum búin að fórna hluta
af mennskunni fyrir tilveru án
sársauka.“
Í Mindgroup eru, auk Jóns Atla,
Jón Páll Eyjólfsson og Hallur
Ingólfs son, en hópurinn nýtur lið-
sinnis Halldóru Geirharðs dóttur.
„Hún lék með okkur í Góðum
Íslendingum og vann með Halli og
Jóni Páli í öðrum verkum,“ segir
Jón Atli. „Nú skrifar hún jafn-
framt verkið með okkur og það er
virkilegur fengur í henni; hún er
frábær listamaður og féll mjög vel
að hópnum.“
Sýningin ber sama nafn og ljóða-
bók Sigfúsar Bjartmarssonar en
Jón Atli segir það ekki hafa verið
með ráðum gert.
„Við áttuðum okkur ekki á því
fyrr en nýlega. Við bárum þetta
auðvitað undir Sigfús og honum
leist bara vel á það.“ - bs
Stigið yfir sársaukaþröskuldinn
13.00 Reykjavík Bókmenntaborg UNESCO, Ráðhúsinu.
Þátttakendur eru Einar Örn Benediktsson, formaður Menningar- og
ferðamálaráðs Reykjavíkurborgar, Svanhildur Konráðsdóttir sviðs-
stjóri Menningar- og ferðamálasviðs, rithöfundurinn Sjón og þær
Ali Bowden, framkvæmdastóri Edinburgh City of Literature, og Jane
Alger, framkvæmdastjóri Dublin City of Literature. Þær munu fjalla
um framkvæmd og þýðingu útnefningarinnar í sínum borgum.
20.00 Upplestur í Iðnó
Bergsveinn Birgisson, Denise Epstein, Bjarni Bjarnason, Alberto
Blanco og Herta Müller.
DAGSKRÁ BÓKMENNTAHÁTÍÐAR
Í REYKJAVÍK Í DAG
ÚR ZOMBÍLJÓÐUNUM Sýningunni er
lýst sem nærgöngulli og óvæginni en
hún byggir meðal annars á nýlegum,
óhugnanlegum atburðum í íslensku
samfélagi.
Heimildarmyndin Ge9n
eftir Hauk Má Helgason
verður frumsýnd í Bíói
Paradís í kvöld. Þar er
fjallað um níumenningana
sem voru ákærðir fyrir árás
á Alþingi haustið 2008 og
sýn þeirra á Ísland og sam-
tímann.
Heimildarmyndin Ge9n um mál
níumenninganna sem ákærðir voru
fyrir árás á Alþingi verður frum-
sýnd í Bíói Paradís í dag. Myndin
er byggð upp af viðtölum Hauks
Más Helgasonar leikstjóra við mót-
mælendurna.
Haukur tók viðtölin á stöðum
sem valdir voru út frá grundvelli
gagnrýni hvers viðmælanda og
birtist ávallt eitthvað í umhverf-
inu skylt umræðuefninu. Á þenn-
an máta leitast Haukur við að
einangra pólitíska tilveru viðmæl-
endanna. Haukur segist með mynd
sinni vilja birta mynd af þessum
níu einstaklingum en um leið sýna
Ísland og samtímann eins og það
horfir við þeim.
„Það kemur í ljós í viðtölunum
að megnið af þessum einstakling-
um var ekki aðallega að mótmæla
hruninu heldur var það uppsöfn-
uð pólitísk kergja, sem nær allt
frá Íraksstríðinu í gegnum einka-
væðinguna og hin mörgu ólíku mál
hægrivæðingarinnar, sem lá að
baki reiðinni í mótmælunum 2008,“
segir Haukur og bætir við að það
sem valdi mestum vonbrigðum sé
hversu lítið hafi breyst eftir hrun.
Í myndinni kemur fram að eitt af
því sem valdið hafi hvað mestri tog-
streitu hjá sumum níumenninganna
hafi verið að þurfa að verja gjörðir
sínar án þess að gera lítið úr þeim.
„Eins og einn mótmælendanna,
Steinunn Gunnlaugsdóttir, sagði
var ákæran slungin að því leyti
að þau voru sökuð um að hafa gert
eitthvað mjög alvarlegt, sem þau
gerðu ekki, en það er ekki þar með
sagt að aðgerðir þeirra hafi ekki
haft neitt gildi.“
Haukur segir að í myndinni fái
níumenningarnir að tala sínu máli
án þess að beygja sig undir orð-
ræðu kerfisins sem þau standa
gegn. „Á meðan á dómsmálinu stóð
var allt kapp lagt á að sýna fram
á sakleysi þeirra en á sama tíma
langar ekkert þeirra að draga full-
komlega í land með það að hafa
áorkað einhverju. Aðgerðirnar
þennan tiltekna dag, þegar þau
stormuðu á þingpalla og lásu upp
yfirlýsingu, voru þeim bæði mjög
mikilvægur og þýðingarmikill
liður í mótmælunum á sínum tíma.“
Ge9n var sýnd á kvikmynda-
hátíðinni Skjaldborg á Patreks-
firði í sumar og var vel tekið. Þótt
myndin hafi ekki enn verið sýnd í
Reykjavík hefur Ge9n þegar verið
sýndur áhugi utan landsteinanna.
„Brot úr myndinni var sýnt á ráð-
stefnunni Tekstallianse í Osló um
miðjan ágúst,“ segir Haukur. „Rit-
stjóri frá róttæka bandaríska for-
laginu Semiotext(e) var á staðnum.
Hann var mjög hrifinn og leitar nú
leiða til að koma myndinni á tjald í
Los Angeles og New York.“
hallfridur@frettabladid.is
Mestu vonbrigðin hversu
lítið breyttist eftir hrun
HAUKUR MÁR HELGASON Höfundur myndarinnar Ge9n segir að þótt aðgerðir níumenningana hafi ekki verið hættulegar í þeim
skilningi sem ákæruvaldið hélt fram hafi þær haft mikilvægt gildi. FRÉTTABLAÐIÐ/VALLI
BELINDA OG GYÐA Í TJARNARBÍÓI Dansverkið Belinda og Gyða verður sýnt i Tjarnarbíói klukkan 20.30 í
kvöld. Verkið er eftir Steinunni Ketilsdóttur og Sveinbjörgu Þórhallsdóttir. Andrea Gylfadóttir samdi tónlistina og Jóní Jóns-
dóttir úr Gjörningaklúbbnum hannar búninga. Sýningin er liður í Reykjavík Dance Festival. Þrjú önnur verk verða sýnd á
hátíðinni í kvöld. Nánari upplýsingar má finna á heimasíðu hátíðarinnar, reykjavikdancefestival.is.