BFÖ-blaðið - 01.07.1990, Blaðsíða 3
Árni Sigfússon:
Þegar að er gáð
Fræg er sagan af Hróðmundi bónda sem fór
út að vitja kinda sinna á fögrum sumardegi.
Konu hans var farið að lengja eftir honum og
fór að leita hans. Hún gekk lengi þar til hún
stóð uppi á hól allfjarri bænum. Þá sá hún sér
til furðu bónda sinn á kafi upp að öxlum í for-
arpytti. Hún kallaði til bónda síns og spurði
hann hvað hann væri eiginlega að gera þarna
í pyttinum. „Bjarga kind,“ svaraði Hróð-
mundur. „Og hvar er kindin?“ spurði kerling.
„Ég stend á henni!“ sagði bóndi hennar þá að
bragði.
Þessu er ekki ólíkt farið í þeim forarpyttum
sem víða leynast í þjóðlífinu og þeim aðferðum
sem við beitum þegar við ætlum að leysa
margvísleg vandamál. Oft hef ég velt því fyrir
mér hvort nokkurs staðar sé til betri lýsing en
sagan af Hróðmundi í pyttinum á björgunar-
aðgerðum okkar í vímuefnamálum. Skilaboð
hinna eldri til unga fólksins stangast á. Ein
tegund vímuefna er rómuð jafnt í bundnu sem
óbundnu máli. Önnur tegund er lýst stór-
hættuleg, án þess að raunverulega sé auðvelt
að draga skýr mörk þar á milli. Hróðmundi
tókst ekki að toga kindina upp úr forarpyttin-
um með því að standa á henni.
Hugsuðurinn Ralph Waldo Emerson, var
vanur að heilsa gömlum vinum með eftirfar-
andi spurningu: „Hvað hefur runnið upp fyrir
þér, síðan við hittumst síðast?“ Vitringurinn
vissi nefnilega að maðurinn býr yfir þeim eig-
inleika að geta látið af fordómum og skamm-
sýni ef hann hefur vit til að læra af reynslunni
og moka flórinn sinn. En það vita þeir sem
starfa að bindindismálum að sumir eiga erfið-
ara með að læra af reynslunni en aðrir. Þrátt
fyrir endurtekin dauðaslys í umferðinni af
völdum ölvaðra ökumanna eru þeir enn til
sem aka undir áhrifum áfengis.
Hver einstaklingur á að hafa rétt á að velja
sér sinn lífsstíl, svo lengi sem hann gengur
ekki á rétt annarra til hins sama. Þetta frelsi
okkar eigum við að virða. Sá sem velur að
neyta efna sem kunna að auka hættuna á að
hann valdi öðrum tjóni, verður að bera fulla
ábyrgð á þeim gerðum. En mannslíf verður
ekki endurheimt. Næst þegar við heilsum
gömlum vin gerum það með brosi á vör til
staðfestingar á því að það hafi runnið upp fyr-
ir okkur síðan við sáum hann síðast að við
verðleggjum heilsu okkar og hamingju meira
en að búa við þá tvöföldu áhættu að aka ölvuð.
Árni Sigfússon er
borgarfulltrúi og
framkvæmdastjóri
Stjórnunarfélags íslands
BFÖ-blaðið • a/1990
Utgefandi: Bindindisfélag ökumanna,
Lágmúla 5,108 Reykjavík, sími 679070.
Ritnefnd: Sigurður Rúnar Jónmundsson (ritsj. og áb.m.),
Halldór Árnason og Jónas Ragnarsson.
Myndir: Guðmundur Viðarsson o.fl.
Prentun: GuðjónÓ hf.
Upplag: 4.200 eintök 2. tbl. 18. árg. illilí 1990
___________________________________________ 3