Morgunblaðið - 16.01.2002, Blaðsíða 8
FRÉTTIR
8 MIÐVIKUDAGUR 16. JANÚAR 2002 MORGUNBLAÐIÐ
Kvenréttindafélag Íslands 95 ára
Íslenskt
jafnrétti krufið
KvenréttindafélagÍslands er 95 áraum þessar mund-
ir. Félagið efnir til ráð-
stefnu, „Erlendar konur
og íslenskt jafnrétti, í
Tjarnarsal Ráðhúss
Reykjavíkur, laugardag-
inn 26. janúar klukkan 11–
14. Erla Hulda Halldórs-
dóttir er varaformaður
Kvenréttindafélags Ís-
lands og svaraði hún
nokkrum spurningum um
afmælið og ráðstefnuna.
Í uppsiglingu er stóraf-
mæli Kvenréttindafélags
Íslands, segðu okkur dálít-
ið frá sögu þess.
„Kvenréttindafélag Ís-
lands var stofnað í stof-
unni hjá Bríeti Bjarnhéð-
insdóttur í Þingholtsstræti
18 fyrir 95 árum, 27. janúar 1907.
Tilgangur þess var að sjálfsögðu
að vinna að kvenfrelsi, svo ég noti
hugtak frá þessum tíma, en fyrstu
starfsárin voru mikilvægustu bar-
áttumálin full stjórnmálaleg rétt-
indi kvenna og réttur til mennt-
unar og embætta. Þegar þessum
réttindum var náð lét félagið sig
varða réttindamál kvenna á breið-
um grundvelli. Launajafnrétti,
barnaleikvellir, réttindi og skyld-
ur hjóna, einstæðra mæðra, fæð-
ingarorlof, skattamál, tryggingar,
allt voru þetta mál sem félagið
hafði afskipti af og áhrif á. Þá
voru konur minntar stöðugt á að
þær þyrftu að gæta fenginna rétt-
inda og sjá til þess að þær fengju
framgang í námi og starfi sam-
kvæmt verðleikum, líkt og karl-
arnir. Þetta síðasttalda er nokkuð
sem við erum enn að berjast við.
Annars er rétt að benda áhuga-
sömum á sögu Kvenréttinda-
félagsins, Veröld sem ég vil, eftir
Sigríði Th. Erlendsdóttur.“
Þið verðið með ráðstefnu í til-
efni afmælisins, um hvað verður
fjallað þar?
„Ráðstefnan, sem haldin verð-
ur laugardaginn 26. janúar, fjallar
um íslenskt jafnrétti, séð með
augum kvenna frá öðrum menn-
ingarheimum. Okkur langar að
heyra af jafnréttismálum í heima-
löndum þessara kvenna og hvern-
ig íslenskt jafnrétti kemur þeim
fyrir sjónir. Þær sem tala eru
Amal Tamini frá Palestínu, Anh-
Dao Tran frá Víetnam, Naysaa
Gyedu-Adomako frá Ghana og
Emilía Mlynska frá Póllandi.
Loks mun Hildur Jónsdóttir jafn-
réttisráðgjafi Reykjavíkurborgar
stikla á stóru í sögu íslenskrar
jafnréttisbaráttu, velta fyrir sér
stöðunni í dag og hvernig við get-
um rúmað allar þessar ólíku radd-
ir kvenna í jafnréttisbaráttu
framtíðarinnar. Markmið ráð-
stefnunmar er að hvetja konur
sem eru af erlendu bergi brotnar
til að taka þátt í umræðunni um
jafnréttismál og til að minna á að
konur á Íslandi eru ekki einsleitur
hópur, menningarlega séð.“
Er það staðreynd að jafnrétt-
ismálin séu fremur
hagstæð á Íslandi mið-
að við mörg lönd sem
við berum okkur sam-
an við?
„Þetta er mál sem
töluvert hefur verið rætt og ritað
um. Standa íslenskar konur fram-
ar öðrum konum? Er norrænn
femínismi öðruvísi og jafnréttis-
sinnaðri, ef svo má að orði kom-
ast, en annars staðar í heiminum
og er hægt að tala um norrænan
femínisma? Tölfræðin segir okkur
að Ísland stendur sig heldur verr
en hin Norðurlöndin. Ef við horf-
um til kvenna í pólitík þá erum við
fyrst nú allra síðustu ár að drag-
ast nær þessum nágrannalöndum
okkar og konur í valdastöðum,
þ.e. forstjórar, stjórnarformenn
fyrirtækja o.þ.h. eru ekki ýkja
margar hér. Úti í heimi standa
hins vegar margir í þeirri trú að
íslenskar konur séu sérlega dug-
og valdamiklar. Þetta er mýta
sem virðist haldið á lofti. Ég hef
sjálf orðið vör við þetta á fundum
með konum frá Norðurlöndunum
– og svo verða þær steinhissa
þegar maður þylur upp tölfræð-
ina. En auðvitað erum við betur
sett hér hvað jafnrétti varðar
miðað við mörg önnur lönd.“
Munuð þið taka niðurstöður
ráðstefnunnar og nýta þær á ein-
hvern hátt?
„Von okkur er auðvitað sú, að
ráðstefnan kveiki nýjar hug-
myndir og geti hjálpað okkur hjá
KRFÍ og öðrum sem vinna að
jafnréttismálum við að móta
stefnuna í framtíðinni og sjá
hvaða leið er vænlegust til þess að
ná fram fullu jafnrétti kvenna og
karla.“
Eru fordómar í þjóðfélaginu
gagnvart Kvenréttindafélaginu?
„Kannski ekki gagnvart félag-
inu sem slíku, en vissulega eru
fordómar gagnvart kvenréttind-
um og jafnréttisumræðu yfir höf-
uð. Furðu lostið fólk spyr mig
hvort þetta sé ekki úrelt félag og
þarflaus barátta. Við höfum jú
fullkomið jafnrétti seg-
ir það! Margir bregð-
ast illa við þegar talað
er um jafnrétti, segja
manni jafnvel að þegja
og segjast ekki nenna
að hlusta á þetta „kjaftæði“ en
tala svo út í eitt um sín hjartans
mál. Allt of mörgum finnst nefni-
lega allt í lagi að sýna femínistum
ókurteisi. Fólk verður hins vegar
að átta sig á því að jafnrétti skipt-
ir okkur öll máli, karla, konur og
börn, og að við náum aðeins ár-
angri með því að ræða málin,
kryfja hugsanleg vandamál til
mergjar og taka á þeim.“
Erla Hulda Halldórsdóttir
Erla Hulda Halldórsdóttir er
fædd 1. maí 1966 og uppalin á
Snæfellsnesi. Stúdent frá
Menntaskólanum að Laugarvatni
1986 og BA í sagnfræði frá HÍ
1989. Lauk svo MA-prófi í sagn-
fræði við sama skóla 1996. Var
starfsmaður Sýslusafns A-
Skaftafellssýslu á Höfn 1991–94
og forstöðumaður Kvenna-
sögusafns Íslands 1996–2001.
Vinnur nú við sameiginlegt verk-
efni nokkurra stofnana við gerð
vefræns kvengagnabanka. Vara-
formaður KRFÍ. Maki er Arnþór
Gunnarsson sagnfræðingur og
börn þeirra tvö eru Ásgeir Örn
og Eik.
...segja manni
jafnvel
að þegja
Og hverju hefur þú svo stolið, og frá hvaða fyrirtæki?
INNFLUTNINGUR á nautakjöti
snarminnkaði á síðasta ári miðað við
fyrri ár, samkvæmt upplýsingum frá
matvælasviði Heilbrigðiseftirlits
Reykjavíkur. Alls voru flutt inn í
landið 3,8 tonn af nautakjöti sem er
85% minna en árið 2000 þegar rúm
26 tonn voru flutt inn. Eingöngu var
um nautalundir að ræða og allar
voru þær seldar til veitingahúsa, þar
af um 2 tonn frá Finnlandi og af-
gangurinn frá Nýja-Sjálandi.
Minni innflutningur er rakinn til
kúariðufaraldurs í Evrópu, sem
staðfestur hefur verið í 19 löndum,
og einnig gin- og klaufaveikifarald-
urs á Bretlandi. Innflutningur frá
þessum löndum var ekki heimilaður.
Minna flutt inn
af nautakjöti
Nærri 4 tonn
flutt inn til
veitingahúsa
NORÐLENSKA er þessa dagana að
undirbúa lokun á stórgripaslátur-
húsinu í Borgarnesi en Norðlenska
tók húsið á leigu af Kjötumboðinu og
hefur verið með slátrun og kjöt-
vinnslu þar. Jón Helgi Björnsson,
framkvæmdastjóri Norðlenska, seg-
ir að lítið hafi verið slátrað í húsinu
að undanförnu. Öllu starfsfólki var
sagt upp um áramót.
Jón Helgi segir að Norðlenska
hafi ekki starfsleyfi nema til 1. febr-
úar næstkomandi vegna krafna yf-
irdýralæknis. „Við erum auk þess
ekki eigendur að húsnæðinu heldur
leigjum það, þannig að við leggjum
ekki í þann kostnað sem fylgir því að
mæta kröfum dýralæknisins. Þá er
einnig óvissa um fjárhagslega getu
Kjötumboðsins.
Jón Helgi segir að enn séu starfs-
menn á vegum Norðlenska í Borg-
arnesi. „Við höfum verið að slátra
þarna kálfum og svínum en nautgri-
paslátrun hefur verið frekar lítil
undanfarið. Það er stefnt að því að
hætta allri slátrun á vegum Norð-
lenska 1. febrúar.“
Norðlenska
er að hætta
starfsemi
Í MENNTASKÓLANUM í Reykja-
vík er þessa dagana verið að taka í
gagnið nýtt og hraðvirkara gagna-
flutningskerfi. Í haust gerði skól-
inn samning við Línu.net þar sem
fram kemur m.a. að Lína.net er
styrktaraðili MR í gagnaflutnings-
lausnum og áformar að prófa nýjar
lausnir í upplýsingatækni í sam-
starfi við skólann. Með þessum
samningi fær skólinn aðgang að
háhraðaneti með tengingu við IP-
borgarnetið og getur þannig tengst
við helstu gagnagrunna sem not-
aðir eru við skólakerfið, m.a. hjá
Skýrr. Menntaskólinn er nú einn
fárra skóla sem tengdir eru í gegn-
um ljósleiðara. Þá hafa nýlega ver-
ið sett upp tvö nýtískuleg skjáver í
raungreinahúsi en við það batnar
tölvuaðgengi skólans til muna.
Gerbreytir
öllum aðstæðum
Yngvi Pétursson, rektor MR,
segir að gagnaflutningur frá skól-
anum að hinu almenna neti verði
miklum mun hraðvirkari en áður.
„Þetta mun gerbreyta öllum að-
stæðum hér hjá okkur enda erum
við í sívaxandi mæli farin að nota
Netið við kennsluna. Í Mennta-
skólanum í Reykjavík gegnir upp-
lýsingatæknin sífellt stærra hlut-
verki í starfsemi skólans. Húsnæði
skólans er mjög dreift en á und-
anförnum árum hefur verið unnið
að því að leggja miðlægt net um
allar byggingar í mennta-
skólaþorpinu en til gamans má
geta þess að nú er verið að leggja
þráðlaust net í elstu byggingu skól-
ans, gamla skólahúsið, sem var tek-
ið í notkun haustið 1846.
Við höfum einnig verið að end-
urnýja búnað, eins og til að mynda
í raungreinahúsinu, þar sem mikið
er um að mælitæki séu tengd við
tölvur og þær notaðar til þess að
skrá niðurstöður sem nemendur
vinna síðan úr. Þá tókum við upp
nýja skólakerfið Innu síðastliðið
haust, en það er kerfi sem Skýrr
hefur verið að vinna fyrir mennta-
málaráðuneytið. Þetta kerfi heldur
m.a utan um námsferil, stundatöfl-
ur og mætingar nemenda, þannig
að þetta er allt tölvuvætt. Þá höf-
um við með markvissum hætti ver-
ið að byggja upp aðstæður í
kennslustofum svo kennarar hafi
aðgang að tölvu og möguleika á að
varpa kennsluefni á tjald með skjá-
varpa.“
Morgunblaðið/Þorkell
Yngvi Pétursson, rektor Menntaskólans í Reykjavík, í nýju skjáveri.
Menntaskólinn í
Reykjavík tengdur
gegnum ljósleiðara
♦ ♦ ♦