Morgunblaðið - 22.12.2002, Blaðsíða 50
50 SUNNUDAGUR 22. DESEMBER 2002 MORGUNBLAÐIÐ
!
"# # #
$ $!
BRÉF
TIL BLAÐSINS
Kringlunni 1 103 Reykjavík Sími 569 1100
Símbréf 569 1329 Netfang bref@mbl.is
Allt efni sem birtist í Morgunblaðinu og Lesbók er varðveitt í upplýsinga-
safni þess. Morgunblaðið áskilur sér rétt t i l að ráðstafa efninu þaðan, hvort
sem er með endurbirtingu eða á annan hátt. Þeir sem afhenda blaðinu efni
ti l birtingar teljast samþykkja þetta, ef ekki fylgir fyrirvari hér að lútandi.
HANNES Þór dó 33 ára, 17. des. ár-
ið 2000.
Við aðstandendur Hannesar Þórs
viljum koma því á framfæri að kvik-
myndin Hlemmur er sýnd alfarið í
okkar óþökk.
Þegar við í gegnum fjölmiðla
fengum vitneskju um sýningu
myndarinnar, fórum við fram á það
við Ólaf Sveinsson að myndin yrði
ekki sýnd opinberlega. Hann vildi
ekki verða við þeirri bón. Þá báðum
við um að ákveðin atriði yrðu klippt
úr myndinni. Því var einnig neitað. Í
myndinni er dregin upp mynd af
Hannesi þar sem hann var mjög illa
á sig kominn, bæði andlega og lík-
amlega. Það virðist mörgum finnast
nánast gamanmál. Í dagblaðsgrein í
Fréttablaðinu er Ómari og Hannesi
líkt við Gög og Gokke, „slá þeim
jafnvel við.“ Þekkt fjölmiðlakona lét
þau orð falla í útvarpsþætti um
ákveðið atriði í myndinni, þar sem
Ómar og Hannes ræða saman; „að
þetta væri alveg óborganleg sena,
enginn leikari gæti hafa gert þetta
betur.“ Einmitt! Grátlegt hörmung-
arlíf getur enginn gert svona raun-
verulegt, nema þolandinn sjálfur.
Hann er einfaldlega ekki að leika.
Fjallað er um myndina eins og þeir
sem fram í henni koma séu að leika
hlutverk, séu ekki raunverulegt fólk.
Eða eins og komist er að orði í
Morgunblaðsgrein: „Tveir af aðal-
viðfangsefnum Hlemms kristalla
breiddina: Ómar er seiglan uppmál-
uð, úrræðagóður og ódrepandi, en
Hannes vinur hans er á hinn bóginn
blaktandi strá í vindi og hniginn í
valinn í lokin.“ Lesendur sem áhorf-
endur, athugið að Hannes Þór dó
ekki fyrir myndavélina. Hans dauði
var raunverulegur.
Ólafur Sveinsson telur sig hafa
samþykki Hannesar fyrir mynda-
tökunni og vitnar í þá staðreynd að
Hannes sé í myndinni. Í einu atriði í
seinni hluta myndarinnar, er farið
upp í Gufuneskirkjugarð að gröf
Hannesar, án vitundar okkar að-
standenda. Varla hefur Ólafur feng-
ið samþykki Hannesar fyrir því!
Áfengissýki er sjúkdómur, sem
Hannes Þór barðist við í mörg ár,
harðri baráttu. Hann á ástvini, sem
létu sér annt um hann og reyndu
eftir mætti að aðstoða hann. Það var
barátta sem bar ekki þann árangur
sem óskir og vonir stóðu til.
Hannes var orðinn mjög veikur
mörgum mánuðum fyrir andlát sitt
og þar af leiðandi, og eins og sést og
heyrist raunar í myndinni, ekki fær
um að taka stórar ákvarðanir.
Hannes getur í dag ekki svarað fyrir
sig sjálfur. Þess vegna viljum við,
hans nánustu aðstandendur, við sem
þekktum hann best, láta í okkur
heyra. Við erum þess fullviss að
Hannes Þór hefði aldrei viljað sýna
sig svona á sig kominn, eins og hann
er í myndinni, fyrir framan alþjóð.
Þarna er verið að vega að æru látins
manns, velta sér upp úr og gera sér
mat úr ógæfu hans.
MÓÐIR OG SYSTKINI.
Hlemmur – Niðurlæging
út yfir gröf og dauða
Frá aðstandendum
Hannesar Þórs:
NÚ á jólaföstunni auglýsti Iceland-
air, að hægt væri að kaupa hjá þeim
mjög hagstæðar jólagjafir, sem væri
jólapakki, þar sem væri hægt að
velja flug fram og til baka í helg-
arferð, til hvaða viðkomustaðar
þeirra í Evrópu sem væri eða til Min-
neapolis í Bandaríkjunum.
Þar sem yngsti sonur okkar hefur
frá hausti dvalið erlendis en gerði
ráð fyrir að koma heim fljótlega á
nýju ári, þá gripum við auðvitað
tækifærið og keyptum á netinu „jóla-
pakkann“ fyrir hann. Í kynningu á
„jólapakkanum“ á netinu kom fram
að hægt væri síðan að panta far á
tímabilinu frá 10. janúar n.k. og fram
í mars.
„Jólapakkinn“ kom síðan með skil-
um, tveimur dögum eftir að greitt
var fyrir hann með visagreiðslu á
netinu. Þar fylgdi með ávísun á að fá
útgefinn farmiða eftir nánari óskum
viðtakanda.
Var þá farið á skrifstofu Flugleiða
og óskað eftir að fá útgefinn miða til
og frá Kaupmannahöfn. Var um leið
gerð grein fyrir því að sá sem ætti að
fá „jólapakkann“ væri þegar erlend-
is og mundi því aðeins geta notfært
sér leiðina Kaupmannahöfn – Kefla-
vík. En þá byrjuðu vandkvæðin. „Því
miður, ef farþeginn notar ekki fyrri
hluta farseðilsins, þá mun seinni
hlutinn sjálfkrafa falla út og verða
ógildur“, voru svörin sem við feng-
um. Hvergi hafði komið fram í upp-
lýsingum á netinu – en þangað var
fólki beint til að panta „jólapakkann“
– að einhverjir svona annmarkar
væru. Það virðist enda erfitt að sjá
rökin fyrir því, að það komi flutn-
ingsaðilanum yfir höfuð nokkuð við,
hvort setið sé í viðkomandi farþega-
sæti einungis aðra leiðina, þegar
greitt hefur verið uppsett verð fyrir
umrætt sæti báðar leiðir.
En þrátt fyrir að málið gengi á
milli nokkurra aðila, þá var engin
önnur svör að fá. Það tókst þó að fá
miðann endurgreiddan eftir að búið
var að senda okkur með það „flókna“
mál á milli nokkurra aðila.
Rétt er að fram komi að sam-
kvæmt þeim upplýsingum sem við
fengum hjá söluaðilunum, þá er
ódýrasta fargjald aðra leið frá Kaup-
mannahöfn til Keflavíkur 6.600 kr.
danskar eða milli 70 og 80 þúsund ísl.
kr. Þó væri möguleiki að kaupa helg-
arpakka (ekki jólapakka!) frá Kaup-
mannahöfn fyrir um 45 þús. kr. og þá
væri allt í lagi að henda öðrum hluta
miðans, af því að það væri seinni
leggur ferðarinnar og því mundi
tölvan ekkert geta gert í málinu !!!
Já, okkur fannst ástæða til að
vekja sérstaka athygli á þessari frá-
bæru „jólagjöf“, sem flugfélagið okk-
ar allra býður upp á núna fyrir jólin.
Með bestu kveðjum og óskum um
ánægjulega jólahátíð og farsæld á
nýju ári.
INGÓLFUR ÁRMANNSSON,
Vanabyggð 2b, Akureyri.
Jólagjöf Flugleiða
Frá Ingólfi Ármannssyni: