Bændablaðið - 06.09.2012, Blaðsíða 19

19Bændablaðið | Fimmtudagur 6. september 201
Fullur kraftur er nú að komast á
sauðfjárslátrun enda fé farið að
streyma af fjalli en fyrstu fjárréttir
voru 2. september. Kristján Hreinn
Stefánsson frá Gilhaga í Skagafirði
er einn þeirra sem fylgjast vel með
í sláturtíðinni enda hefur hann
haft af því atvinnu í fjölda ára að
stopp upp kindahausa og eru þeir
nú orðnir 200 talsins.
Hefur stoppað upp 200 hausa
Á mánudag í síðustu viku afhenti
Kristján tvo kindahausa sem hann
stoppaði upp fyrir Sláturhús Austur-
Húnvetninga á Blönduósi, SAH.
„Annar hausinn var af ferhyrndum
hrút og hinn af fullorðinni á, sem var
tvöhundruðasti kindarhausinn sem ég
stoppa upp,“ sagði uppstopparinn.
Kristján er fæddur 29. apríl 1944
í gamla torfbænum í Gilhaga, sem er
í Lýtingsstaðahreppi hinum forna í
Skagafirði. Hefur hann alltaf verið
kenndur við þann bæ, enda átt þar
heimili lengst af ævinnar. Ekki
dvaldi hann þó lengi undir torfþaki,
því sumarið 1944 var flutt í nýbyggt
steinhús neðan við gamla bæjarhól-
inn þar sem Kristján ólst upp.
Byrjaði að stoppa upp
fyrir 30 árum
„Það eru þrjátíu ár síðan ég byrjaði
að stoppa upp. Ég byrjaði bara í
rólegheitunum og það er með þetta
eins og svo margt annað í mínu lífi,
að ég byrjaði á þessu fyrir slysni.
Ég hef mikið verið í handverki alla
mína tíð og langaði að prófa þetta til
að eiga eitthvað til að dunda mér við
í ellinni til gamans.“
Segir Kristján oft mikið að gera á
verkstæðinu. Margir vilji eiga upp-
stoppaða hausa af uppáhalds dýrum
hangandi uppi á stofuvegg hjá sér.
Þá eru það ýmist hausar af dýrum úr
eigin búi, eða veiðidýr sem minna á
frækileg afrek og hetjudáðir marg-
víslegar.
„Ég fór að taka eitt og eitt verk-
efni fyrir kunningjana en áður en
varði var ég kominn á kaf í þetta og
er enn.“
Kristján segir það geta verið
mikla kúnst að stoppa upp dýr ef
vel eigi að vera.
„Þetta er ótrúlega mikil vinna og
í raun alltof mikil. Það er eiginlega
ógerningur að rukka fyrir allt saman
til að ná út úr þessu almennilegu
tímakaupi.“
Fjölhæfur í meira lagi
Kristján er búfræðingur að mennt
en er annars mjög fjölhæfur. Hann
starfaði t.d. við járniðnað, vélavinnu
og vélaviðgerðir um árabil, en alltaf
við bústörf meðfram annarri vinnu.
„Já, ég hef verið í ýmsu. Ég er líka
vélstjóri, skipstjóri og með byssu-
leyfi. Svo smíðaði ég mér bát og
snatta mikið á honum og veiði mér í
matinn. Þá hef ég haldið til í Drangey
undanfarin sumur við eggjatöku á
vorin og lundaveiði. Það blundar í
manni mikil ævintýramennska.“
Margt af þessu kemur fram á
heimasíðu Kristjáns; www.krokur.
is/kristjan/. Þar kemur einnig fram
að frá barnæsku hafi hann leikið
á hljóðfæri, heimilisorgel í fyrstu,
síðar harmonikku og hljómborð
hvers konar. Þá byrjaði hann að
leika fyrir dansi opinberlega, 10 ára
gamall í sinni heimasveit. Hann var
einnig í karlakórnum Heimi og starf-
aði um árabil sem skemmtanastjóri
og fararstjóri hjá Samvinnuferðum
á Ítalíu og Portúgal og síðan hjá
Samvinnuferðum - Landsýn á Spáni,
þar til fyrirtækið fór á hausinn.
„Ég var hjá þeim mest á vorin
og haustin, mikið á Benidorm og
Portúgal,“ sagði Kristján, sem greini-
lega hefur ekki haft mikinn tíma um
ævina til að láta sér leiðast.
/HKr.
Kristján Hreinn Stefánsson, uppstoppari og þúsundþjalasmiður frá Gilhaga:
Skilaði haus númer 200 til sláturhússins á Blönduósi
–Byrjaði að fikta við uppstoppun fyrir 30 árum til að hafa eitthvað til dundurs í ellinni
Haus númer 200.
Kristján Hreinn Stefánsson frá Gilhaga, uppstoppari, á vinnustofu sinni á Akureyri. Mynd / MÞÞ
Þessi mynd var tekin þegar Kristján afhenti Sigurði Jóhannessyni, framkvæmdastjóra SAH, tvöhundruðasta kindar-
hausinn sem hann hefur stoppað upp.
Hér horfast í augu hagleiksmaðurinn og verkefnið hans. Mynd / MÞÞ
Kristján segir að uppstoppun útheimti ótrúlega mikla vinnu sem ógerningur
sé að rukka fyrir til fulls.