Fréttabréf Siglfirðingafélagsins í Reykjavík og nágrenni - okt. 2012, Blaðsíða 7

7
vestur um haf. Hún mun hafa farið
með farþegaskipinu Washington
frá Englandi til Boston og þaðan
til Winnipeg í Kanada, til Jónínu
Oddleifsdóttur, frænku sinnar. Einnig
dvaldi hún í Árborg. Kristín lék annað
aðalhlutverkið í sýningu Íslendinga í
Winnipeg á Hallsteini og Dóru eftir
Einar H. Kvaran í desember 1932.
„Hún hefur marga þá hæfileika sem
hver góð leikkona þarf að hafa,“ sagði
Lögberg. „Þar fer saman yndisþokki
æsku og útlits, léttir hlátrar lífsglaðrar
sálar og varhugaleysi barnslegs
hreinleika,“ sagði Heimskringla, sem
nefndi leikkonuna Miss K. Sölvason.
Kristín gekk í skóla vestra og
stundaði margs konar störf, vann
meðal annars á veitingahúsinu Wevel
Café í Winnipeg. Hluta úr ári vann hún við Niagara-fossana, á
landamærum Kanada og Bandaríkjanna, og fór til New York.
En Kristínu var farið „að langa heim til vinanna og
kunningjanna,“ að sögn Alþýðublaðsins. Hún kom til
Reykjavíkur með Gullfossi haustið 1934. Þá auglýsti hún að
hún tæki að sér enskukennslu: „Kenni að tala, lesa og skrifa
ensku, bæði byrjendum og lengra komnum.“
Hittust í Árborg
Maður er nefndur Charles Thorson. Hann var Vestur-
Íslendingur, fæddur 29. ágúst 1890 í Winnipeg í Manitoba,
sonur Stefáns Þórðarsonar og Sigríðar Þórarinsdóttur sem
voru ættuð úr Biskupstungum. Þau fluttu vestur um haf árið
1887. Stefán var meðal annars bæjarstjóri í Gimli í Manitoba.
Charles var þekktur teiknari í Íslendingabyggðum í
Kanada, teiknaði í blaðið Heimskringlu og myndskreytti
vörulista stórverslunarinnar Eaton í tvo áratugi. Um skeið
var Charles giftur konu af pólskum ættum. Sonur þeirra var
Stephen Thorson.
Kristín Sölvadóttir og Charles Thorson hittust í Árborg,
þar sem hann hélt námskeið í teikningu. Síðar fór Charles að
venja komur sínar á Wevel Café í Winnipeg, þar sem Kristín
var afgreiðslustúlka, fékk sér þar kaffisopa og teiknaði myndir.
Þau virðast hafa orðið mjög nánir vinir. Hann var rúmlega
fertugur, hún tvítug. Það kom ekki í veg fyrir það að hann bað
hennar, og gaf henni teikningu af þeim saman þar sem hann
var prinsinn en hún prinsessan. Þetta mun hafa verið sumarið
1934. En Kristín hafnaði bónorðinu, fór að vinna í Niagara
og flutti svo aftur heim til Íslands um haustið. Þau skrifuðust
síðan á en hittust aldrei aftur.
Charles flutti til Hollywood og fékk vinnu hjá Walt Disney,
meðal annars við gerð teiknimyndarinnar um Mjallhvíti og
dvergana sjö. Síðar sagði Charles syni sínum og fleirum að
Kristín hefði verið fyrirmyndin að Mjallhvíti. Sú saga hefur
einnig verið lífseig í Íslendingabyggðunum.
Thorson og Disney
Vorið 1936 var sagt frá því í vestur-
íslenska blaðinu Lögbergi að Charles
Thorson, „sérstæður listamaður í
sögu hinnar íslensku þjóðar,“ væri
þá starfandi í kvikmyndaveri Walt
Disney í Hollywood í Kaliforníu. Þar
hafði hann teiknað myndir af öllum
persónum í teiknimynd um fílinn
Elmer. „Auk þess á hann mikinn þátt í
fyrirmyndum persónugervinga í hinni
nýju kvikmyndaútgáfu af Mjallhvít,“
sagði í blaðinu. Þá var þess getið að
þegar rithöfundurinn H. G. Wells og
leikarinn Charles Chaplin heimsóttu
kvikmyndaverið hafi eigandinn farið
„með þessa frægu gesti í vinnustofu
Charles Thorsons til
þess að sýna þeim það
sem best væri gert innan
vébanda sinnar víðfrægu
stofnunar“.
Charles mun einnig
hafa teiknað indíána-
strákinn Hiawatha og
fleiri persónur fyrir Walt
Disney. Alls var Charles sjö
ár í Hollywood. Að lokinni
dvölinni hjá Disney fór hann að vinna fyrir Warner Brothers,
MGM og fleiri og skapaði á þeim tíma meðal annars Kalla
kanínu (Bugs Bunny). Charles Thorson lést sumarið 1966.
Íslendingar kynnast Mjallhvíti
Teiknimyndasagan „Mjallhvít og dvergarnir sjö“
birtist í Þjóðviljanum vorið og sumarið 1939, í tuttugu
hlutum. Kvikmynd Walt Disney var frumsýnd í Gamla
bíói í Reykjavík 10. maí 1939 og þótti hún mikið afrek.
„Kvikmyndin er öll litum skreytt og svo eðlileg að furðu
sætir,“ sagði í Morgunblaðinu. „Dýramyndirnar, hreyfingar
þeirra og látbragð er svo einstaklega vel gert að hrein unun
er á að horfa.“ Í kynningu á myndinni var ekkert minnst
á hina íslensku fyrirmynd og heldur ekki á það að einn af
teiknurunum væri af íslenskum ættum.
Fíngerð og glaðleg
Það er af Kristínu Sölvadóttur að segja að haustið
1937 giftist hún Garðari Þórhallssyni bankamanni,
kaupfélagsstjórasyni frá Djúpavogi. Þau bjuggu lengst af í
Vogahverfi í Reykjavík og eignuðust fimm börn.
Sumarið 1975 fóru tólf hundruð Íslendingar með flugi á
Íslendingahátíðina í Kanada. Kristín var í þeim hópi og hefur
hún þá eflaust rifjað upp kynni við land og þjóð.
Kristín lést í nóvember 1981, 69 ára. Í minningargreinum
var henni lýst sem fíngerðri konu sem alltaf var glaðleg á
svipinn og sá ætíð hið fagra og góða í lífinu.
Mjallhvít og dvergarnir sjö í kvikmynd Walt Disney frá 1937.
Teikning sem Charles
gaf Kristínu og á
að sýna hann biðja
hennar.
Jónas Ragnarsson tók saman.