Lögmannablaðið - 01.03.2005, Blaðsíða 24
24 1 / 2 0 0 5
Af Merði lögmanni
Jæja þá er útséð með það þetta árið eins og öll hin. Mörður var ekki beðinn
um að vera veislustjóri á árshátíð Lögmannafélagsins. Mörður ætlar sko ekki að
láta það hafa áhrif á gleðina. Á árshátíðina fer hann. Merði hefur alltaf þótt
borðhaldið frekar leiðinlegt nema árið sem hún Dúdda blautbolsdrottning kom
með honum. Þá átti hann salinn. Langflottastur.
Þetta var á 3ju árshátíðinni sem Mörður fór á. Á tveimur fyrstu leiddist
honum skelfilega enda konulaus. Allir á árshátíðinni voru með maka með sér
nema Mörður. Hann var aleinn. Mörður vissi nú samt að fullt af þessu fólki væri
einhleypt en það var samt mætt þarna með maka. Mörður komst að því seinna að
þetta voru ekki makar heldur voru nokkrir með svona „rent a date“ með sér.
Úrræðagóðir þessir lögmenn alltaf. Áður en Mörður kynntist spúsu sinni reyndi
hann ítrekað að fá einhleypa lögmenn til að vera með sér á svona “single” borði
en það bar engan árangur. Mörður var nú ekki að skilja það enda sáu
karlkynskollegar hans ekki heildarmyndina. Þeir hefðu getað höslað
kvenkynslögmann á árshátíðinni og kvænst henni. Með því hefðu þeir getað slegið
tvær flugur í einu höggi. Náð sér í eiginkonu og fækkað konum í stéttinni. Því
auðvitað hefðu þeir getað talað eiginkonurnar inn á það að vera heima og gæta
bús og barna í stað þess að vera í þessu framabrölti sem hvort sem er skilar þeim
ekki neinu.
Það sem hefur háð Merði mest á árshátíðunum, fyrir utan borðhaldið, er að
hann á svo erfitt með að þekkja kvenkynslögmennina. Þær líta bara allt öðruvísi
út á árshátíðinni en svona dags daglega. Þær eru jafnvel bara nokkuð sætar og
mildar til augnanna. Þannig hefur hann ekki séð þær áður. Svona daglega eru
þær alltaf með þetta rauðsokkublik í augunum; berjast stelpur, berjast.
Merði finnst hins vegar fyrir partýin alltaf skemmtilegust því þá hefur hann
tækifæri til að drekka sig í stuð. Það er verra þegar hann fer að þynnast upp yfir
borðhaldinu enda ekki viðeigandi að drekka tvöfaldan vodka í kók með sítrónu á
svona virðulegri samkomu. Mörður kann sig nú. Þess vegna setur hann t.d. alltaf
sítrónu í drykkinn, svona til að gera hann fágaðan.