Tímarit hjúkrunarfræðinga - 01.03.2009, Blaðsíða 26

Tímarit hjúkrunarfræ›inga – 1. tbl. 85. árg. 200922
Ásgerður Jónsdóttir útskrifaðist úr hjúkrunarfræðideild
Háskóla Íslands 1989. Talsvert margir úr árganginum fóru á
Borgarspítala. Einn hópur fór á slysadeild og fjórar byrjuðu
saman á hjartadeild þar sem Ásgerður átti eftir að vinna næstu
10 árin. Tólf úr útskriftarhópnum hafa haldið vel saman og
voru lengi með leshring þar sem fræðigreinar voru brotnar til
mergjar. Á seinni árum hafa áhugamálin hins vegar breyst og
þegar hópurinn hittist nú er meira talað um daglegt líf.
Hvernig kom það til að þú fluttir í Búðardal?
„Ég vann eins og gengur þrískiptar vaktir á Borgarspítalanum.
Maðurinn minn var einnig með langan vinnudag og okkur
fannst við varla hittast. Einn daginn ákváðum við að nú væri
komið nóg af því að vinna svona. Fyrir bráðum 10 árum
keyptum við kúabú. Maðurinn minn er úr bændafjölskyldu og
hann hefur alltaf langað í sveit,“ segir Ásgerður. Bærinn, sem
þau keyptu, heitir Kverngrjót og stendur 40 km frá Búðardal ef
farið er yfir Svínadal. Eitt kvöld í júní mættu þau á staðinn og
byrjuðu að mjólka strax morguninn eftir. Ásgerður hafði aldrei
mjólkað áður en þetta lærðist smám saman. „Að mjólka er svo
róandi. Fyrstu árin mjólkuðum við hjónin saman á hverjum degi
og náðum að tala um allt milli himins og jarðar.“ Nú eiga þau
50 kýr og eru einnig með geitur og hænur. Þau hjónin eiga þrjá
stráka og það tekur mikinn tíma að sinna þeim og heimilinu.
Allt er þetta mikil vinna og það fór því svo að í nokkur ár urðu
tölublöð Bændablaðsins ofar Tímariti hjúkrunarfræðinga á
náttborðinu.
Ásgerður fór í nám á Hvanneyri en lauk því ekki vegna meðgöngu
og barneigna. Hún segist þó vera „hálfur búfræðingur“ og var
í bústörfum fyrstu fimm árin. Að lokum fannst henni bústörfin
líkamlega allt of erfið og ákvað að fara aftur í hjúkrun. Núna
vinnur hún á heilsugæslustöðinni í Búðardal. Um 1000 manns
búa á þjónustusvæðinu. Ásgerður er eini hjúkrunarfræðingurinn
í Búðardal en að auki er einn í 40% starfi á Reykhólum sem
tilheyra sama svæðið. Ásgerður sinnir einnig vitjunum í
heimahjúkrun. Hún getur þurft að fara í 2­3 vitjanir á dag,
allt frá innliti og sáraskiptingum upp í lyfjatiltekt og böðun. Í
dreifbýli þýðir það mikla keyrslu, 93 km fram og til baka þegar
sem lengst er að fara.
„Keyrslan og þeytingurinn er mest lýjandi í þessu starfi. Einu
sinni keyrði ég á einum degi 200 km milli vitjana. Í fyrravetur
festi ég mig einn km frá bænum sem ég var að fara í vitjun á.
Það var ekkert símasamband og ekki annað að gera en að
fara fótgangandi að bænum. Ég var að vonast til að bóndinn
myndi sjá mig og koma keyrandi á móti en það gerðist ekki.
Ég baðaði konuna og bóndinn fór svo með mig á dráttarvél að
losa bílinn. Sama veturinn þurfti ég að fara á bæ sem stendur
hátt uppi í brekku. Í eitt skipti komst ég ekki upp fyrr en í fjórðu
atrennu. Þá hefði verið gott að vera á jeppa.“
Ásgerður sinnir einnig skólahjúkrun. Grunnskólinn í Búðardal
er með 90 nemendur og svo er grunnskólinn í Tjarnarlundi með
18 nemendur. Ásgerður fer einu sinni í viku í skólann í Búðardal
en 2­4 sinnum yfir skólaárið í Tjarnarlund. Fastir viðtalstímar í
skólunum eru ekki mikið nýttir. „Nemendurnir koma og tala við
mig þegar þeir þurfa, annaðhvort í skólanum eða þeir koma
upp á heilsugæslustöð. Það er þó ekki mikið af kvörtunum hjá
börnunum, þessi flóra af kvörtunum sem sést í þéttbyli er ekki
til hér,“ segir hún. Á heilsugæslustöðinni er einnig mæðraeftirlit
og ungbarnaeftirlit. Ásgerður fer í heimsókn 4­6 daga eftir
fæðingu og eftir þörfum fyrstu sex vikurnar og mæður koma
svo með börnin í skoðun.
BÓNDI OG HEILSUGÆSLUHJÚKRUNARFRÆÐINGUR
Christer Magnusson, christer@hjukrun.is
Ásgerður Jónsdóttir býr á
bónda bæ og vinnur á heilsu­
gæslustöðinni í Búðardal.
Rit nefnd Tímarits hjúkrunar­
fræðinga sótti hana heim og
átti við hana gott spjall um
lífið og starfið.
Ásgerður með kaffibolla.