Skólavarðan - 01.05.2004, Blaðsíða 25
SKÓLAVARÐAN 5.TBL. 4. ÁRG. 2004
Eitt af grunnmarkmiðum kennslu er að
undirbúa nemendur fyrir lífið. Því er
mikilvægt að þeir sjái að nám þeirra
hafi tilgang og sé hagnýtt. Þannig er
stuðlað að því að nemendur tileinki sér
þekkingu sína, tengi hana raunveruleik-
anum og læri þannig fyrir lífið.
Laugardaginn 15. maí síðastliðinn var
haldin ráðstefnan UPPNám 2004 í Kvos
Menntaskólans á Akureyri. Þar kynntu
nemendur á fjórða ári félagsfræðibrautar
rannsóknarverkefni sín í lokaáfanga í upp-
eldis- og menntunarfræðum.
Viðfangsefnin voru af ýmsum toga.
Fjallað var um fötlun, kynhneigð, nám og
hreyfingu, einelti, skilnað, líkamsvitund,
geðheilsu, gerendur kynferðisofbeldis,
ættleiðingar og fordóma út frá félags-
og uppeldisfræðilegu sjónarhorni. Rann-
sóknirnar sem kynntar voru byggjast ann-
ars vegar á frumgögnum, sem nemendur
öfluðu sér sjálfir með megindlegum og
eigindlegum rannsóknaraðferðum, og
hins vegar á skráðum heimildum. Auk of-
angreindra verkefna voru hönnunarverk-
efni nemenda til sýnis. Þau voru unnin
upp úr niðurstöðum rannsókna þeirra og
eru m.a. ætluð til forvarna, fræðslu og úr-
ræða. Sem dæmi má nefna fræðslubæk-
linga, veggspjöld, heimasíður, spil, vigtun-
arklefa, náms- og æfingaáætlanir.
Ráðstefnan tókst vel. Kynningarnar
voru vel af hendi leystar og líflegar um-
ræður urðu í kjölfar þeirra. Án efa vakti
ráðstefnan gesti til umhugsunar um margt
sem snertir líf og vellíðan barna, unglinga
og fullorðinna.
Markmið ráðstefnunnar voru að gefa
nemendum færi á að miðla þekkingu
sem þeir hafa aflað sér með rannsóknum
sínum, þjálfa þá í að koma hugmyndum
sínum á framfæri, efla sjálfstæði þeirra
í faglegum vinnubrögðum og undirbúa
þá fyrir háskólanám um leið og fólki var
veitt innsýn í störf nemenda í Menntaskól-
anum á Akureyri. Einnig var litið á þessa
ráðstefnu sem leið til að brúa bil á milli
skólastiga en boðsgestir komu m.a. frá
öllum skólastigum. Eitt af því sem stuðlar
að frekari uppbyggingu menntunar er að
læra af styrkleikum hvers skólastigs fyrir
sig og hafa góða yfirsýn yfir það sem er að
gerast á öllum skólastigum menntakerfis-
ins til að skapa gott rennsli á milli þeirra.
Að setja upp ráðstefnu af þessum toga
er ein leið af mörgum til að sýna að bor-
in er virðing fyrir vinnu nemenda um leið
og þeim er gerð grein fyrir að nemendur
á framhaldsskólastigi hafa heilmikið til
málanna að leggja. Í því samhengi er gam-
an að nefna að þrjár af þeim rannsóknum
sem voru kynntar á ráðstefnunni tóku þátt
í keppninni Ungir vísindamenn og komust
tvær þeirra í undanúrslit.
Ráðstefna eins og UPPNám 2004 styrk-
ir nemendur og aðra í því að taka nám
í framhaldsskólum alvarlega. Hönnunar-
verkefnin eru auk þess vel til þess fallin að
fá nemendur til að íhuga hvað hægt sé að
gera með þá þekkingu sem þeir hafa aflað
sér. Samhliða því gefur það þeim vonandi
tilfinningu fyrir því að þeir geti haft áhrif
á samfélagið með því að framkvæma hug-
myndir sínar.
Að efla sjálfstraust nemenda á þennan
hátt er mikilvægt veganesti í þá ferð sem
er framundan eftir að framhaldsskóla lýk-
ur.
Það eru ekki ný tíðindi að fjölbreytni í
kennsluaðferðum sé mikilvæg og að höfð-
að sé til nemenda sem hafa mismunandi
verklag. Hinsvegar er góð vísa aldrei of oft
kveðin. Vert er að minna á nauðsyn þess
að kennarar geti með góðu móti stuðst
við kennsluaðferðir sem henta hæfileik-
um þeirra og áhugasviðum, þ.e.a.s. byggi
kennslu á styrkleikum sínum. Til að það sé
hægt þarf að vekja metnað og skapa góð-
ar starfsaðstæður þar sem einstaklingseðli
nær að njóta sín. Með því er stuðlað að
áhugasömum og virkum kennara sem end-
urspeglast vonandi í starfi hans og dugleg-
um nemendum.
Dagbjört Brynja Harðardóttir
Höfundur er uppeldis- og menntunarfræðingur og
kennari í MA.
Uppnám í Menntaskólanum á Akureyri
Að læra fyrir lífið
Markmið ráðstefnunnar voru að gefa nemendum færi á að
miðla þekkingu sem þeir hafa aflað sér með rannsóknum
sínum, þjálfa þá í að koma hugmyndum sínum á framfæri,
efla sjálfstæði þeirra í faglegum vinnubrögðum og undir-
búa þá fyrir háskólanám.
25
Ljósm. Sverrir Páll Erlendsson
RANNSÓKNIR FRAMHALDSSKÓLANEMA