Skólavarðan - 01.05.2006, Blaðsíða 25

SKÓLAVARÐAN 4.TBL. 6. ÁRG. 2006
25
Vorsýning Iðnskólans í Hafnarfirði hefur
staðið yfir frá miðjum maí en henni lýkur
þann 28. þessa mánaðar. Hér er gott
tækifæri fyrir kennara og nemendur til
að kynna sér það sem skólinn hefur upp
á að bjóða en um að gera að hafa snör
handtök þar sem einungis eru nokkrir
dagar til stefnu.
Iðnskólinn í Hafnarfirði er fámennur
og nemendur fá einstaklingsbundna og
persónulega þjónustu, einkum í verknáms-
deildum. Sérstaða skólans felst einnig í
nýjungum í námsframboði, til dæmis er
boðið upp á nám í hönnun og útstillingum
ásamt námskeiðahaldi í trefjaplasti
og tölvuteikningu. Í skólanum er eitt
besta námsframboð landsins í greinum
sem byggjast á sköpun og samvirkni
hugar og handa. Þá vekur athygli að við
verknámsdeildir skólans hefur verið lögð
rík áhersla á að ráða kennara með mikla
reynslu úr atvinnulífinu.
Þetta árið er sýningin sett upp í
matsal skólans og í anddyri, stigagangi,
skólastofum og loks í sumarbústað
sem nemar í húsasmíði hafa byggt og
stendur á lóð skólans. Hugmyndin að baki
vorsýningunni 2006 og jafnframt skýringin
á heiti hennar er sú að allar deildir
(þrívíð verk) og öll fög (danska, enska,
íslenska, stærðfræði, lífsleikni) standi á
sömu línunni. Sú lína liggur í gegnum
sýningarrýmið og á henni standa húsgögn,
hárgreiðslur, rennismíðaverk, mósaík,
líkön og margt fleira. Sýningargestir geta
fylgt línunni frá sumarhúsunum og inn
eftir öllu í matsalinn og í lesstofu tekur
svo við sýning á ýmsum teikningum og
verkum á skjávarpa.
Hönnunardeild skólans var stofnuð
árið 1990 þegar hann var til húsa á
tveim stöðum. Verknámið var í gömlu
fiskvinnsluhúsi á Flatahrauni og bóknámið
í 900 metra fjarlægð, við Reykjavíkurveg.
Þegar í upphafi var haldin sýning á afrakstri
hönnunarnema. Fyrstu árin var sýningin
á efri hæð hússins við Reykjavíkurveg
en síðar hefur hún verið á mismunandi
stöðum og með ólíku sniði. Tvisvar eða
þrisvar var hún haldin í Hafnarborg,
einu sinni í húsakynnum Marels og að
undanförnu ýmist í matsal skólans eða
kennslustofum. Umfang sýninga hefur
einnig verið með ýmsu móti. Oftast hafa
allar deildir skólans tekið þátt eins og í ár
en stundum aðeins hönnunardeildin, sem
heitir nú listnámsbraut, og síðastliðið vor
voru það útskriftarnemar sem sýndu hluti
sína í Marelshúsinu.
Vorsýning Iðnskólans í Hafnarfirði 2006
Á sömu línu
IÐNSKÓLINN Í HAFNARFIRÐI