Alþýðublaðið - 24.12.1942, Blaðsíða 3

RLPÝÐUBLRÐIÐ
lólablað 194Z

HEILÖG HATIO
Lúk. 2,
\
1—14.
JÓLANÓTT, helgasta stund ársins. Mannkynið
lýtur sameiginlegri heilagri minningu, sem
lýsir fram á veg þess í lífstríði alda og kynslóða.
Vér eigum allir vorn helga reit, sem tengdur er
nafninu jól, bernskuminningar, minningar um ást-
vini, minningar um það, að heimurinn og mann-
lífið var þó fagurt og bjart, hlýtt og gott að
minnsta kosti eina stund ársins. Allt þetta stígur
upp í vitund vora og vér finnum til þakklætis til
mannanna.
Oss langar til að gjalda skuld vora til lífsins.
Oss langar að láta í ljós hlýja jólaósk eða hand-
tak, bros eða. gjöf. Ég held að það sé ekki þjóð-
saga, að mennirnir séu betri á jólunum en endra-
nær, að þá sé meira af góðleik á yfirborði lífsins
en aðrar stundir. Og er ekki ástæðan einmitt
þessi, að þetta er stund hinna hlýju og heilögu
minninga? Flestir hafa átt einhverju góðu að
mæta á þessari hátíð. Góð rtiinning gerir mann-
inn betri. Mennirnir eru þakklátir á jólunum.
Þess vegna eru þeir ljúfari í viðmóti, glaðari og
betri.
En jólin eru ekki aðeins hátíð minninganna fyrir
hvern einstakling. Þau eru minningarhátíð mann-
kynsins alls. Barnið í Betlehem, maðurinn Jesús
Kristur, er fegursta, hreinasta og helgasta minn-
ingin, sem mannkynið á. Drauma hefir oss dreymt
um líf í helgun og kærleika og fórn, líf í þjón-
ustu við hið smáa, breyska og bága, líf í hollustu
og hlýðni við heilagan vilja Guðs. Drauma hefir
oss dreymt um frið, um kærleikssamfélag mann-
anna, réttlæti, samúð, mildi og mannúð og gagn-
kvæma hlutdeild í blíðu og stríðu. Höfum vér
ekki séð þennan draum verða að veruleika í lífi
Jesú frá Nazaret? Meðan mannkynið á þessa
minningu þarf það aldrei að verða vonlaust, aldrei
að örvænta. Langt er það vikið af vegi hans. Það
er ekki óeðlilegt, að margur spyrji eins og skáld-
ið: Hvar er sigur Krists um kristinn heim? En
hitt mættum vér og hugleiða, hvar vér værum á
vegi staddir, ef enginn Jesús frá Nazaret hefði
lifað, ef allt væri strikað út úr sögu og siðferðis-
vitund mannkynsins, sem beint verður rakið til
hans. Mundi verða auðvelt að benda á annan
mann, sem orðið hafi mönnunum meir gjöf en
hann?
En Drottinn Jesús Kristur er meira en minn-.
ing. Hann er einnig fyrirheit. Oss er fluttur jóla-
boðskapurinn í nútíð: Yður er í dag frelsari fædd-
ur. Og sjálfur sagði hann: Ég er með yður alla
daga, allt til enda veraldarinnar. Og ennfremur:
Verið í mér, þá verð ég líka í yður. Hann er
megnugur þess að móta vort líf eftir sinni mynd
og sínu lífi, gera sjálfan sig lifandi og starfandi
í oss. Og þannig roðast og lýsast hinir myrkustu
tímar í lífi mannkynsins af bjarma fyrirheitsins
um frelsi og hjálpræði mannssonarins, þegar vér
tökum við honum og göngum honum á hönd. Að
vera kristinn, að vera lærisveinn, er einmitt fólg-
ið í þessu, að vér þráum líf af hans lífi og finn-
um líf hans bærast með oss, sem hreinsar og
helgar oss, gerir oss að nýjum mönnum.
Vér blessum hið heilaga barn. Mætti það fá að
fæðast í sálu vorri, vaxa þar og fá ráðin yfir
oss, leysa oss úr fjötrum dufts og flekkunar, hefja
oss upp til eilífðarinnar. Daprir atburðir haust-
mánaðanna, harmafregnirnar utan af hafinu,
skatturinn, sem dauðinn heimtir á sjó og landi,
varpar skuggum á jólabirtu margra heimila. Höld-
um ekki heilagt án þess að minnast þess, hver
skylda vor er við þá, heimili og einstaklinga. Og
komi þessar línur fyrir sjónir einhvers, sem þetta
mál er skylt, þá vil ég segja að lokum: Drottinn
Jesús Kristur, frelsari þinn, yfirgefur þig ekki.
Hann er með þér, hann er hjá þér, vakir og starf-
ar og sigrar um síðir. Lát styðjast við hans mildu
máttarhönd. Hún leiðir þig til sigurs.
Guð blessi þig. Guð blessi þér heilaga hátíð.
Gleðileg jól!
Sigurbjörn Einarsson.