Morgunblaðið - 18.04.1980, Side 18
18
MORGUNBLAÐIÐ, FÖSTUDAGUR 18. APRÍL 1980
Samningar á
viðkvæmu stigi
Viðræðurnar um Jan Mayen málið í byrjun vikunnar
vekja ekki bjartsýni um framhaldið. Svo virðist sem
aðilum hafi ekki tekist að finna þann flöt á deilumálinu, sem
leiði til sameiginlegrar niðurstöðu. Enn ber of mikið í milli og
á þeim sviðum, þar sem hagsmunirnir eru mestir.
Raunhæft var að búast við því, að Norðmenn myndu meta
það nokkurs, að ekki er lengur dreginn í efa réttur þeirra til
útfærslu. Þeir tækju tillit til þessa til dæmis við mat á
kröfum Islendinga til landgrunnsins utan 200 mílnanna. En í
stað þess að ræða það mál, svöruðu Norðmenn, að þá skorti
umboð til að segja nokkuð um það. Gegnir mikilli furðu, að
norska sendinefndin komi þannig undirbúin til Reykjavíkur.
Með þessu athugunarleysi hafa Norðmenn siglt viðræðunum
í strand, þar sem íslendingar halda fast við kröfuna um
heildarlausn. Að vísu má færa að því nokkur rök, að sökin sé
ekki öll hjá Norðmönnum, því að íslenskir ráðherrar hafa lýst
því yfir, það í þeirra augum sé mikilvægast að ná
samkomulagi um fiskveiðimálin og landgrunnið geti beðið
fram yfir hafréttarráðstefnuna. Raunar er þetta einnig sú
afstaða, sem mótuð var í drögunum að samkomulagi, sem
embættismannanefndin, er fjallaði um landgrunnið, lagði
fyrir samninganefndir landa sinna. Þar er beinlínis ráðgert,
að aðilar muni ræðast frekar við um kröfur íslands til
landgrunnssvæða utan 200 mílna efnahagslögsögu íslands í
áttina að Jan Mayen. í slíku orðalagi felst óneitanlega
viðurkenning á rétti íslendinga í þessu máli, þótt auðvitað sé
nauðsynlegt, að hún sé afdráttarlausari.
Hitt höfuðmál þessara samninga er fiskveiðiþátturinn.
Hann var einnig ræddur sérstaklega af sérfræðingum á
fundinum hér. I þeim viðræðum komu fram mismunandi
sjónarmið um það hvaða aðili skyldi hafa ákvörðunarvald um
leyfilegan heildarafla á loðnu og hvernig honum skuli skipt
milli aðilanna. Þá greinir menn á um það, hvaða aðili eigi að
taka ákvörðun um aflahlutfall þjóðanna og til hve langs tíma
það skuli ákveðið. Hér eru sem sé á ferðinni tæknileg og
efnisleg atriði, sem aðilar hafa hvorki leitt til lykta heima
fyrir né innbyrðis.
Viðræðurnar í Reykjavík hafa þokað málinu áfram. Aðilum
er betur ljóst en áður, hver ágreiningsefnin eru þeirra á milli.
Hitt er allt annað mál, hvort þeir eru nær samkomulagi. I
báðum löndunum er málið viðkvæmt á stjórnmálavettvangi.
Nú hlýtur kröftuglega að verða unnið að því að undirSúa
viðræðurnar í Oslo, sem ráðgerðar eru 7.—10. maí n.k. Þar
verða að nást einhverjar lyktir, því að Norðmenn hafa lýst
því yfir, að fyrir lok maí muni þeir færa út lögsöguna
umhverfis Jan Mayen til að tryggja réttindi sín, þegar kemur
til þess að lögsagan verður færð út við Austur-Grænland 1.
júní n.k. Miklir ísienskir hagsmunir eru tengdir því, að
samkomulag takist um miðlínu milli Jan Mayen og
Grænlands. Gerist það ekki munu loðnumiðin að mestu falla
innan grænlenskrar lögsögu og þar með vera á yfirráðasvæði
Efnahagsbandalags Evrópu eins og málum er nú háttað og
verður á meðan Grænlendingar ákveða að segja sig ekki úr
bandalaginu. Miðlína er í gildi milli íslands og Grænlands og
um svæðið fyrir norðan hana má segja, að það sé okkur
óviðkomandi í hafréttarlegum skilningi. Hins vegar eru þar
mikilvægar fiskislóðir og það gæti orðið dýrkeypt að þurfa að
semja um aðgang að þeim á gagnkvæmnisgrundvelli við
Efnahagsbandalagið.
Undir árslok 1976 beitti Matthías Bjarnason, sjávarútvegs-
ráðherra, sér fyrir því, að Efnahagsbandalagi Evrópu voru
afhent drög að samningi um fiskverndarmál. Þessum drögum
hefur bandalagið ekki svarað enn þá, enda ekki mótað
fiskveiðistefnu sína. Óhjákvæmilegt er, að tafarlaust verði að
frumkvæði íslenskra stjórnvalda teknar upp viðræður við
Dani um þessi mál. Það má ekki láta þróunina verða á þann
veg, að Danir og Norðmenn nái saman um niðurstöðu, sem
gengur þvert á okkar hagsmuni.
Greinilegt er, að viðræðurnar við Norðmenn eru nú á
viðkvæmara stigi en nokkru sinni fyrr. Því er nauðsynlegt að
fara fram með fullri gát og horfa til allra átta, svo að við
glötum ekki mikilvægum hagsmunum.
í snyrtingu læra nemendur m.a. handsnyrtingu.
Kynning á tómstundastarfi
grunnskóla Reykjavíkur
3.400 nemendur tóku þátt í tómstundastarfi skólanna á s.l. ári
Kynning á tómstundastarfi í
grunnskólum Reykjavíkur fer
fram i Fellahelli laugardaginn
19. apríl n.k. Kynningin hefst
kl. 13.30 en henni lýkur kl. 17.
Æskulýðsráð Reykjavíkur hef-
ur skipulagt dagskrána sem
hefst á ávarpi Sjafnar Sigur-
björnsdóttur formanns Æsku-
lýðsráðs Reykjavikur. Þá verð-
ur sýnd kvikmynd frá tóm-
stundastarfinu og nemendur i
Alftamýrarskóla kynna kvik-
myndagerð og sýna mynd sem
þeir hafa unnið. Þá kynna
nemendur Fellaskóla útilíf og
Arni Guðmundsson frá Æsku-
lýðsráði kynnir félagsmál.
Nemendur í Hólabrekkuskóla
kynna snyrtingu og sýnd verð-
ur kvikmynd frá tómstunda-
starfi Æskulýðsráðs Reykja-
víkur. Loks sýna nemendur úr
Álftamýrarskóla hjálp í víðlög-
um. ÖIl þessi dagskrá fer fram
á sviði i Fellahelli.
Skólaárið 1979—1980 störf-
uðu 284 tómstundaflokkar í
þeim grunnskólum Reykjavíkur
sem hafa 7., 8. og 9. bekk innan
sinna veggja. Æskulýðsráð
Reykjavíkur hefur í samvinnu
við forráðamenn skólanna haft
umsjón með þessu starfi og
útvegað leiðbeinendur, tæki og
það efni sem til þarf. Nemendur
þurfa að greiða lítilsháttar inn-
ritunargjald auk efnisgjalds ef
um slíkt er að ræða.
í föndurherbergjum félags-
miðstöðvarinnar fer fram kynn-
ing á leirvinnu, hnýtingum,
leðurvinnu, radíóvinnu, módel-
vinnu og ljósmyndavinnu og
keppt verður í borðtennis og
skák og ljósmyndasamkeppni
verður í veitingastofu. Á leik-
sviði Breiðholtsskóla fer fram
leiklistarmót skólanna en þar
munu nemendur í Hagaskóla,
Hlíðaskóla, Breiðholtsskóla,
Hólabrekkuskóla og Fellaskóla
sýna leikrlt undir stjórn Guð-
jóns Pálssonar, Bjarna Ingv- Nemendur í leiklist vinna að þvi að gera grímur úr gifsi.
arssonar og Sigríðar Lyngdal.
Er þetta í fyrsta sinn sem slíkt
mót er haldið.
Haustið 1979 störfuðu 174
flokkar í skólum borgarinnar en
á vorönn u.þ.b. 110 flokkar. í
hverjum flokki eru 12—14
þátttakendur svo að láta mun
nærri að 3.400 nemendur hafi
tekið þátt í tómstundastarfinu í
skólunum sl. vetur.
Nemandi í rafeindatækni smíðar sér lítið útvarpstæki.
Pli0jT)0fHlIþto^íiÍíjr
Útgefandi hf. Árvakur, Reykjavík.
Framkvæmdastjóri Haraldur Sveinsson.
Ritstjórar Matthías Johannessen,
Styrmir Gunnarsson.
Ritstjórnarfulltrúi Þorbjörn Guömundsson.
Fréttastjóri Björn Jóhannsson.
Auglýsingastjóri Baldvin Jónsson.
Ritstjórn og skrifstofur: Aöalstræti 6, sími 10100. Auglýsingar:
Aðalstræti 6, sími 22480. Afgreiösla: Skeifunni 19, sími 83033.
Áskriftargjald 4.800.00 kr. á mánuöi innanlands. í lausasölu 240
kr. eintakiö.