Morgunblaðið - 12.08.1995, Blaðsíða 7

MORGUNBLAÐIÐ
LAUGARDAGUR 12. ÁGÚST 1995 7
Bændur bjóða
landsmönnum
heim á sunnudag
Kynna líf
og starf
bænda
Selfossi. Morgunblaðið.
BÆNDUR á 55 bæjum um land
allt bjóða landsmönnum heim til
sín næstkomandi sunnudag, 13.
ágúst, klukkan 13-20. Sérstök
áhersla verður lögð á að koma til
móts við börnin og gefa þeim kost
á að kynnast sveitalífi í einn dag.
Gagnvart fullorðnum er megintil-
gangur þessa átaks að gefa fólki
í þéttbýli kost á að kynnast lífi
og kjörum af eigin raun.
í tilefni þessa átaks hafa verið
gefnir út bæklingar um hvern bæ
og er í þeim að finna upplýsingar
um bústærð og afkomu heimilis-
fólks af búskapnum. Útifánar með
merki landbúnaðarins leiðbeina
fólki heim á þá bæi sem taka þátt
í þessari kynningu. I fyrra heim-
sóttu um 10 þúsund Islendingar
þá 40 bæi sem tóku þátt í átakinu.
Gott tilefni fyrir bændur
„Þetta átak gefur okkur bænd-
um gott tilefni til að líta í kringum
okkur heimavið með gestsaugum,
um leið og við leggjum okkar af
mörkum til að kynna landbúnað-
inn,“ sagði Sveinn Ingvarsson í
Reykjahlíð á Skeiðum, sem er einn
Reykjabæjanna, en þeir taka allir
þátt í þessu. Hinir bæirnir eru
Reykhóll, þar sem búa Guðmundur
Sigurðsson og Bergljót Þorsteins-
dóttir, og Reykir, þar sem Rúnar
Þór Bjarnason og Ingibjörg Páls-
dóttir búa. Á Reykjatorfunni hefur
sama ættin búið frá því um 1700.
Bæirnir mynda skemmtilega heild
þar sem veruleg uppbygging hefur
átt sér stað og staðarlegt heim
að koma. Eins og á öðrum bæjum
munu ábúendur á Reykjabæjunum
taka á móti gestum heima á hlaði
og ganga með þeim um og sýna
dýr, hús og búnað ásamt því að
gefa börnunum kost á að nálgast
dýrin og fara á hestbak.
Tilvalið tækifæri fyrir fólk
„Við viljum taka þátt í að brúa
þá gjá sem getur myndast milli
sveitanna og þéttbýlisins. Svo er
líka gaman að taka á móti fólki
og spjalla við það og kynnast við-
horfum þess gagnvart landbúnað-
inum. Við getum tekið hérna á
móti miklum fjölda fólks og mun-
um reyna að sinna hveijum og
einum eftir bestu getu. Við njótum
þessa til fulls og fáum heilmikið
út úr svona dögum,“ sagði Sveinn
Ingvarsson í Reykjahlíð.
Ávinningur að skapa
jákvætt viðhorf
„Þetta er mjög gagnlegt. Það
er svo margt fólk sem ekki hefur
tök á að koma í sveitina og sjá
hvernig þar er unnið nú til dags.
Þetta er því tilvalið tækifæri fyrir
fólk að nýta sér, hafi það áhuga.
Ávinningur okkar er að skapa já-
kvætt viðhorf fólks í garð íslensks
landbúnaðar," sagði Ingibjörg
Pálsdóttir húsfreyja á Reykjum.
Bergljót' Þorsteinsdóttir á Reyk-
hóli tók undir orð Ingibjargar og
bætti við að í fyrra hefðu viðtökur
allra gesta verið mjög góðar og
þeir sýnt búskapnum mikinn
áhuga, það væri því mjög gefandi
að taka á móti fólkinu.
FRÉTTIR
ÞAU munu taka á móti fólki á Reykjabæjunum á Skeiðum, Ingvar
Þorsteinsson, Sveinn Ingvarsson, Guðmundur Sigurðsson, Bergljót
Þorsteinsdóttir, Ingibjörg Pálsdóttir og Rúnar Þór Bjarnason.
Morgunblaðið/Sig. Jóns.
BÖRNUNUM verður boðið að nálgast dýrin og fyrir borgarbúana
verður eflaust margt sem kemur á óvart í sveitinni.
Er röðin komin að þér?
Nú er hann tvöfaldur!
- ALLTAFÁ LAUGARDÖGUM
SÖLUKERFIÐ LOKAR KL. 20.20