Morgunblaðið - 02.08.1996, Blaðsíða 22

22 FÖSTUDAGUR 2. ÁGÚST 1996
MORGUNBLAÐIÐ
MORGUNBLAÐIÐ
FÖSTUDAGUR 2. ÁGÚST 1996 23
STOFNAÐ 1913
ÚTGEFANDI: Árvakur hf., Reykjavík.
FRAMKVÆMDASTJÓRI: Hallgrímur B. Geirsson.
RITSTJÓRAR: Matthías Johannessen,
Styrmir Gunnarsson.
FRAMTÍÐARSÝN
NÝS FORSETA
NÝKJÖRINN forseti íslands, herra Ólafur Ragnar
Grímsson, lagði í ræðu sinni við embættistökuna í
Alþingishúsinu í gær, áherzlu á samskipti við aðrar þjóð-
ir og virka þátttöku íslendinga í samstarfi þjóða heims.
í ræðu sinni sagði Ólafur Ragnar Grímsson m.a.:
„Við eigum mikið undir því að milli okkar og annarra
þjóða liggi gagnvegir. Á undanförnum árum og áratugum
höfum við Islendingar treyst tengsl okkar við þjóðir ann-
ars staðar í Evrópu innan vébanda margs konar samtaka
og stofnana, svo sem Norðurlandaráðs og Evrópuráðs,
Fríverzlunarsamtaka Evrópu og Evrópska efnahagssvæð-
isins, Norður-Atlantshafsbandalagsins og Samtaka um
öryggi og samvinnu. Evrópusamvinnan er okkur vissulega
mikilvæg og mun enn þróast og vaxa á komandi árum.“
Og forsetinn bætti við: „Við höfum á röskri hálfri öld
sannað réttmæti þess, að tiltölulega fámenn samfélög
njóti sjálfstæðis. Þess vegna mun framlag okkar íslend-
inga til framtíðar Evrópu verða mikils metið.“
Þessi viðurkenning hins nýkjörna forseta á mikilvægi
þess alþjóðlega samstarfs, sem hann víkur að í ofangreind-
um ummælum, og hann í sumum tilvikum barðist gegn á
vettvangi stjórnmálanna, er þýðingarmikill þáttur í við-
leitni hans til þess að skapa einhug að baki sér sem for-
seta lýðveldisins. Jafnframt er hún vísbending um, að
forsetinn vilji fyrir sitt leyti stuðla að öflugri og jákvæðri
þátttöku þjóðarinnar í samstarfi þjóða nær og fjær. Sér-
stök áherzla hans á vaxandi samstarf okkar við Evrópurík-
in vekur athygli.
Ólafur Ragnar Grímsson vék einnig í ræðu sinni, að
stöðu nýrrar kynslóðar íslendinga í breyttum heimi og
sagði: „Sú kynslóð kvenna og karla, sem nú er að útskrif-
ast úr skólum er hin fyrsta á íslandi, sem hefur heiminn
allan að vinnusvæði. Hana skortir hvorki þjóðernisvitund,
virðingu fyrir íslenzkri menningu, né ást á náttúru lands-
ins, en hún er einnig raunsæ og kröfuhörð. Þá vaknar sú
spurning, hvort okkur tekst að sigra í hinni alþjóðlegu
samkeppni um unga fólkið á Islandi. Mun það kjósa að
búa með okkur hér í útsænum eða afla sér viðurværis
annars staðar? Svarið ræðst af því, hvernig okkur, sem
stöndum fyrir ráðum tekst að opna hug okkar og setja
þjóðinni hæfileg markmið.“ Undir þessi sjónarmið forseta
lýðveldisins munu margir geta tekið.
Sá kafli í ræðu hins nýja forseta, sem ef til vill vakti
mesta eftirtekt vegna þess, að forsetar hafa yfirleitt hald-
ið sig utan við deilumál líðandi stundar, fjallaði hins veg-
ar um kjör fólksins í landinu, sem eru jafnan viðkvæm-
ustu deilumálin á hinum pólitíska vettvangi og ekki sízt nú
í kjölfar einnar mestu efnahagskreppu, sem yfir ísland
hefur gengið á þessari öld. Um þau sagði Ólafur Ragnar
Grímsson:
„Það hefur kostað landsmenn miklar fórnir á þessum
áratug að ráða bót á ýmsum meinsemdum í efnahagslífi
og atvinnuskipan. Segja má, að nokkurt jafnvægi hafi
náðst. Heimilin eru þó ærið mörg skuldsett meira en góðu
hófi gegnir og ýmsir samfélagshópar bera skarðari hlut
frá borði en réttlætiskennd okkar þolir. Mörgum finnst
að nú hljóti að vera kominn tími til þess að uppskera laun
erfiðisins. Þetta er eðlileg hugsun og ber vott um framfara-
hug í landinu. Sé rétt á haldið eigum við þess allan kost
að búa við traust lífskjör, góða velferðarþjónustu og eðli-
legt jafnræði manna í milli. Til þess þurfum við að til-
einka okkur skipulegri vinnubrögð en okkur hafa verið
töm. Til þess þurfum við að nýta þau færi, sem okkur
skajiast á nýrri öld.“
Ólafur Ragnar Grímsson sagði í ræðu sinni, að forverar
hans hefðu hver um sig „mótað“ og „meitlað“ forsetaemb-
ættið og bætti við: „Forsetar lýðveldisins hafa ávallt bor-
ið gæfu til að laga embættið og starfssvið þess að breytt-
um kröfum sinnar samtíðar. Svo mun vonandi verða um
alla framtíð.“
í ljósi þeirrar ræðu, sem hér hefur verið vitnað til verð-
ur áhugavert að fylgjast með þvl í hvaða farveg hinn nýi
forseti beinir störfum sínum. Honum og fjölskyldu hans
fylgja beztu óskir um farsæld í þeim störfum.
Morgunblaðið/RAX
ÓLAFUR Ragnar Grímsson og Guðrún Katrín Þorbergsdóttir heilsa hér Haraldi Henrýs-
syni, forseta Hæstaréttar, Davíð Oddssyni forsætisráðherra og Ólafi G. Einarssyni, forseta
Alþingis, að lokinni embættistökunni, áður en forsetahj ónin héldu til Bessastaða.
Morgunblaðið/Golli
FORSETI Hæstaréttar, Haraldur Henrýsson, lýsti forsetakjöri og útgáfu kjörbréfs. Hann las
drengskaparheitið, sem Ólafur Ragnar Grímsson vann að stjórnarskránni, afhenti forsetanum
tilvonandi síðan kjörbréfið auk þess að flytja honum árnaðaróskir.
Morgunblaðið/RAX
FRÁFARANDI forseti íslands, Vigdís Finnbogadóttir, stendur hér á milli Davíðs
Oddssonar forsætisráðherra og Ólafs G. Einarssonar, forseta Alþingis, þegar athöfn-
inni í Alþingishúsinu var lokið og forsetahjónin farin til Bessastaða.
Morgunblaðið/Golli
ÓLAFUR Ragnar Grimsson undirritaði drengskaparheitið, sem ritað var í tveimur samhljóða eintökum. Erla Jónsdóttir, hæstaréttarritari,
stendur með annað eintakið meðan Ólafur Ragnar undirritar hitt. Á bak við þau situr eiginkona Ólafs Ragnars, Guðrún Katrín Þorbergsdóttir.
Morgunblaðið/RAX
MIKILL mannfjöldi, ungir og aldnir, beið allt í kringum Alþingishúsið í einmuna blíðu og sólskini eftir að sjá og hylla nýjan forseta og
eiginkonu hans. Lögregla telur að milli fímm og sex þúsund manns hafi verið við Alþingishúsið.
Nýr forseti tekur við embætti
Ólafur Ragnar Grímsson alþingismaður tók
*
við embætti forseta Islands við hátíðlega
athöfn í Alþingishúsinu í gær. Að athöfninni
lokinni héldu hr. Ólafur og frú Guðrún Katrín
Þorbergsdóttir eiginkona hans ásamt
dætrum sínum Tinnu og Döllu til Bessastaða
þar sem þeim var fagnað af starfsfólki og
nokkrum íbúum Bessastaðahrepps.
Morgunblaðið/Ásdís
FORSETAFJÖLSKYLDAN, herra Ólafur Ragnar Grímsson, frú
Guðrún Katrín Þorbergsdóttir og dæturnar Guðrún Tinna og
Svanhildur Dalla koma til nýs heimilis síns að Bessastöðum.
Morgunblaðið/Ásdís
MÓTTAKA var undir kvöld á Bessastöðum. Þar hittu forsetahjón-
in starfsmenn forsetaembættisins, ýmsa forsvarsmenn Bessastaða-
hrepps og forystumenn ýmissa félagasamtaka hreppsins.
Morgunblaðið/Golli
NÚVERANDI og fráfarandi forseti, frú Vigdís Finnbogadóttir og hr.
Ólafur Ragnar Grimsson, við athöfnina í gær.
Morgunblaðið/Golli
BISKUP íslands, herra Ólafur Skúlason, stjórnaði helgiathöfn
í Dómkirkjunni og prédikaði. Séra Hjalti Guðmundsson og
séra Jakob Ágúst Iljálmarsson þjónuðu fyrir altari. Viðstadd-
ir voru einnig biskuparnir herra Sigurbjörn Einarsson og
herra Pétur Sigurgeirsson og vígslubiskuparnir sr. Bolli
Gústavsson og sr. Sigurður Sigurðarson.