Morgunblaðið - 16.10.1996, Blaðsíða 13
MORGUNBLAÐIÐ
VIÐSKIPTI
MIÐVIKUDAGUR 16. OKTÓBER 1996 13
Flugleiðir hf. búa sig undir aukin umsvif fram til aldamóta
Samið um kaup á Boeing
757-vél og kauprétt á annarri
Stefnt að því að selja og leigja aftur eina
af eldri Boeing 757-þotum fyrirtækisins
FLUGLEIÐIR hf. hafa ákveðið að
ganga til samninga við Boeing-
verksmiðjurnar í Bandaríkjunum
um kaup á nýrri Boeing 757-200
þotu sem verður afhent í nóvember
á næsta ári. Jafnframt verður sam-
ið um kauprétt á annarri flugvél
sömu tegundar sem bætist í flotann
í apríl 1999. Þetta var samþykkt á
stjórnarfundi Flugleiða í gær. Verð-
mæti tveggja nýrra Boeing 757-200
véla er um 7 milljarðar króna.
Jafnframt samþykkti stjórn fé-
lagsins að stefnt skyldi að því að
selja og leigja aftur af kaupendum
eina af eldri Boeing 757 þotum
fyrirtækisins síðar á þessu ári. Með
þessu leysir félagið til sín töluverða
dulda eign í flugvélinni því mark-
aðsverð Boeing 757-200 flugvéla
nú er töluvert hærra en bókfært
verð. Afkoman og eiginfjárstaðan
batnar sem því nemur, að því er
fram kemur í frétt frá félaginu.
Ákvarðanir Flugleiða um kaup á
nýjum flugvélum koma i beinu
framhaldi af stefnumótun félagsins
frá því í vor. Þá komu fram áætlan-
ir um að farþegum fjölgi um 5-6%
á ári og að félagið þyrfti að bæta
við flugvél annað hvert ár. Undir-
búningur að endurnýjun flotans
hefur hins vegar staðið yfir frá því
ákveðið var að selja og endurleigja
af kaupendum tvær Boeing
737-400 vélar á árunum 1994 og
1995. Þá ber þess að geta að félag-
ið tók á leigu nýja Boeing 757-200
vél síðastliðið vor til sex ára, þann-
ig að það mun hafa yfir að ráða
níu millilandaflugvélum í lok næsta
árs. Sú tíunda bætist við í apríl
1999 þegar og ef kauprétturinn
verður nýttur.
Aukin tíðni á meginleiðum
Einar Sigurðsson, aðstoðarmað-
ur forstjóra, sagði í samtali við
Morgunblaðið að vöxtur hefði verið
hjá félaginu undanfarin ár og
fyrisjáanlegt að sá vöxtur héldi
áfram. „Það er stefnt áð því að
auka o g styrkja markaðstarf félags-
ins og að því hefur verið unnið
undanfarið. Við gerum ráð fyrir að
nýja vélin verði notuð til að auka
tíðni og þjónustu á okkar meginleið-
um bæði til Evrópu og Bandaríkj-
anna. Það er mjög mikilvægt fyrir
félagið að styrkja leiðanetið, bæði
til austurs og vesturs. Aukið flug
milli íslands og Evrópu styrkjum
við með farþegum sem fara frá
Evrópu og áfram vestur um haf
gegnum safnkerfi félagsins. Næsta
eðlilega skref er því að bæta við
Boeing 757 þotu sem hægt verður
að nota bæði á Evrópuleiðum og
leiðum vestur um haf. Þessi nýja
vél mun þó væntanlega verða notuð
meira á Evrópuleiðum því við sjáum
fram á töluverðan vöxt á þeim.“
Einar sagði að kaup á vélinni
hefðu í för með sér ráðningu 50-60
flugfreyja og flugmanna. Ekki
þyrfti að bæta hlutfallslega jafn-
miklu við af fólki annars staðar
þannig að betri nýting næðist fram
á öðrum sviðum.
Góðar markaðsaðstæður
fyrir flugvélakaup
Endanlegar ákvarðanir hafa
ekki verið teknar um fjármögnun
á nýju vélinni en að sögn Einars
eru aðstæður á lánsfjármörkuðum
hagstæðar um þessar mundir.
„Flugrekstur í heiminum er í upp-
sveiflu þannig að þetta er tiltölu-
lega góður tími til að fjármagna
nýja vél.“
Varðandi fyrirhugaða sölu á einni
af eldri Boeing 757 vélum Flugleiða
sagði Einar að sá markaður væri
einnig sterkur um þessar mundir.
Flugleiðir vildu nýta sér þá upp-
sveiflu sem væri á þeim markaði.
Hann kvaðst þó ekki geta sagt til
um hversu mikils söluhagnaðar
mætti vænta af vélinni.
í því sambandi má hins vegar
benda á að söluhagnaður einnar
Boeing 737 vélar var á sínum tíma
325 milljónir, en ljóst er að sölu-
hagnaðurinn af 757 vélinni verður
töluvert meiri. Það mun styrkja
efnahagsreikning félagsins sem því
nemur.
Landsbankinn
Útibú í
Bankastræti
sameinað
aðalbanka
LANDSBANKINN hefur ákveðið
að sameina starfsemina í útibúi
sínu í Bankastræti 7 við aðalbank-
ann. Lítil afgreiðsla verður þó
starfrækt í Bankastræti fyrst um
sinn, en reiknað er með að húsið
verði selt. Á efri hæðum hússins
eru nokkrar af stoðdeildum bank-
ans og verða þær væntanlega flutt-
ar í annað húsnæði í eigu bankans
þegar þar að kemur.
Starfsmenn flytjast í
aðalbanka
Útibúið í Bankastræti er eitt
af stærstu útibúum Landsbank-
ans, en þar voru á árum áður
höfuðstöðvar Samvinnubankans.
Að sögn Brynjólfs Helgasonar
aðstoðarbankastjóra hefur rekstur
útibúsins gengið vel en ástæða
þótti til að stíga þetta skref nú til
að ná fram hagræðingu, þar sem
stutt er á milli aðalbankans og
Bankastrætis 7. Er vonast til að
aðalbankinn og Austurbæjarútibú
muni nægja til að þjóna viðskipta-
vinum Landsbankans á þessu
svæði. Hraðbanki verður hins veg-
ar áfram staðsettur í Bankastræti.
Flestir starfsmenn útibúsins í
Bankastræti munu flytjast yfir í
aðalbankann, en einhveijir í önnur
útibú. Hins vegar er gert ráð fyrir
að starfsmönnum Landsbankans
muni fækka í kjölfar þessarar
breytingar þegar fram í sækir.
Hagnaður 539 milljónir
fyrstu átta mánuðina
HAGNAÐUR Flugleiða hf. af reglu-
legri starfsemi nam alls um 502
milljónum fyrstu átta mánuði ársins
samanborið við 579 milljónir á sama
tímabili í fyrra. Þegar tekið hefur
verið tillit til óreglulegra liða nam
heildarhagnaðurinn 539 milljónum.
Á sama tíma í fyrra var hagnaður
af starfseminni 951 milljón, en þá
naut félagið söluhagnaðar af flug-
vél sem ekki er til að dreifa í ár.
Meginástæðan fyrir lakari af-
komu af rekstrinum sjálfum á
þessu ári en á síðasta ári er hækk-
un eldsneytisverðs. Einar Sigurðs-
son segir að útkoman í ágústmán-
uði hafi verið mjög svipuð og á
sama tíma í fyrra. Stefnt væri að
því að skila hagnaði af rekstrinum
sjálfum á þessu ári, en þar við
bættist væntanlega söluhagnaður
af Boeing 757-vélinni.
Spá Seðlabanka íslands
Neysluverð hækkar
um 2,3% milli ára
NEYSLUVERÐ mun hækka um
2,3% milii áranna 1995 og 1996 og
um 2,2% yfir árið samkvæmt spá
Seðiabanka íslands um þróun verð-
lags til ársloka í ár. Þetta er svipuð
hækkun og bankinn spáði í júlí í
sumar. Þó er spáð ívið meiri hækk-
un yfir árið, en í júlí var spáð 2,2%
hækkun vísitölu neysluverðs milli
ára og 2% hækkun yfir árið. Munur-
inn telst ekki marktækur. Þá reikn-
ar bankinn með að verðlag muni
lítið hækka síðustu tvo mánuði árs-
ins meðal annars vegna þess að
erlent grænmeti muni koma á mark-
að hér.
í frétt frá bankanum segir að
hækkun vísitölu neysluverðs milli
annars og þriðja ársfjórðungs hafi
verið 0,8%, sem jafngildi 3,2% verð-
bólguhraða á ári. Hækkunin sé 0,4%
umfram spá bankans og helsta orsök
meiri hækkana en spáð hafi verið
sé mikil hækkun í ágústmánuði á
verði kartaflna og grænmetis, auk
hækkunar á verði bensíns. Dregið
hafi úr hækkunum vísitölunnar síð-
ustu 2 mánuði m.a. vegna 16% lækk-
unar á verði bifreiðatrygginga.
Síðan segir: „Reiknað er með að
verðlag muni lítið hækka síðustu tvo
mánuði ársins, enda mun sú hækkun
sem nýlega hefur orðið á verði mat-
væla að einhveiju leyti ganga til
baka þegar erlent grænmeti kemur
á markaðinn á ný. Spáð er að verð-
lag á fjórða ársfjórðungi hækki um
0,4% eða 1,4% á árskvarða."
Nokkru meiri verðbólga
Már Guðmundsson, aðalhagfræð-
ingur Seðlabankans, sagði að verð-
bólgan í ár yrði nokkru hærri en í
fyrra þegar vísitala neysluverðs
hækkaði um 1,7% milli ára og 1,6%
yfir árið. Þetta væri heldur meiri
verðbólga en spáð hefði verið og
aðeins meiri verðbóiga en væri í
flestum viðskiptalöndum okkar.
Helstu ástæðurnar væru meiri
hækkun innflutningsverðs en gert
hefði verið ráð fyrir, meðal annars
á olíu og bensíni, auk þess sem geng-
ið hefði sigið lítið eitt á þessu ári.
Þetta væri þó vel ásættanleg niður-
staða ef spáin gengi eftir og verð-
bólgan yrði þá ekki meiri en spáð
væri t.d. í Danmörku og Bretlandi.
TILBOÐ I HLUTABREF
PIPUGERÐIN HF.
Landsbréf hf. óska hér með eftir tilboðum í öll hlutabréf
í Pípugerðinni hf., sem nú eru í eigu Borgarsjóðs Reykjavíkur og
Aflvaka hf., alls 45.000.000 kr. að nafnverði.
Pípugerðin hf. er stærsti framleiðandi holræsaröra og skyldrar vöru
úr steinsteypu hérlendis.
Upplýsingar um félagið liggja frammi hjá Landsbréfum hf.,
sem einnig veita nánari upplýsingar.
Tilboð er berast í hlutabréfin í heild sinni njóta að öðru jöfnu
forgangs fram yfir tilboð er berast í hluta þeirra.
Áskilinn er réttur til að taka hvaða tilboði sem er
eða hafna öllum.
., Tilboðum skal skilað til Landsbréfa hf.,
Suðurlandsbraut 24,108 Reykjavík,
fyrir kl. 16.00 fostudaginn 15. nóvember 1996,
| en þá verða þau opnuð að viðstöddum þeim bjóðendum sem þess óska.
]§
7//*■*
LANDSBREF HF.
Starfshópur
Reykj a ví kur b or gar
um sölu eigna.
Suðurlandsbraut 24, 108 Reykjavík, sími 588 9200, bréfasími 588 8598.
LÖGGILT VERÐBRÉFAFYRIRTÆKI, AOILI AÐ VERÐBRÉFAÞINGIÍSLANDS.