Tölvumál - 01.02.1989, Blaðsíða 5
séu ólögleg afrit en treysta sér ekki í aðgerðir af ótta við að
styggja viðskiptamenn sína. Aðrir segja það gefast mjög vel
að ræða þessi mál yfir kaffibolla við viðskiptamanninn því oft
sé notkun ólöglegra afrita byggð á misskilningi.
Þessi misskilningur felst í því að heimilt sé að nota mörg afrit
forrits innan sama fyrirtækis eða stofnunar ef eitt eintak er
keypt. Skilmálar framleiðenda eru þó ótvíræðir hvað þetta
varðar, eitt forrit - ein tölva.
Ekki gæta heldur allir að því að hægt er að fá leyfi til að nota
hugbúnað á mörgum tölvum samtímis en í mörgum tilvikum
er hægt að fá slíkt leyfi gegn vægu viðbótargjaldi.
Það er hins vegar réttur þeirra sem kaupa forrit að gera af
þeim öryggisafrit til að nota ef frumrit eyðileggst eða verður á
annan hátt óvirkt.
Það er hagur okkar allra, bæði þeirra sem selja og hinna sem
nota hugbúnað að ekki séu notuð ólöglega afrituð eintök
forrita. Með því stuðlum við að betri þjónustu, örari
nýjungum á hugbúnaðarsviði og lækkandi verði hugbúnaðar.
Skýrslutæknifélagið efnir til félagsfundar um ólöglega
afritun og dreifingu forrita í byrjun mars. Leitast verður við
að svara þeirri spurningu hvort þetta er alvarlegt vandamál
hér á landi.
Á síðasta ári var Qallað um einn anga þessa máls á
athyglisverðum félagsfundi um höfundarrétt. Með þessum
fundi hyggjumst við færa umræðuna nær daglegum
veruleika okkar allra og ræða þessa spurningu opinskátt.
Það er ætlun okkar með þessum fundi að vekja almenna
umræðu um þessi mál og vekja fólk til umhugsunar um það,
að með afritun hugbúnaðar og dreifingu afrita er gengið á
rétt höfunda og útgefenda.
Látum það verða markmið okkar á nýju ári, hvers og eins, að
koma þessum málum í lag þar sem við störfum. Ef allir
leggjast á eitt þá verður notkun ólöglegra afrita útrýmt.
Halldór Kristjánsson, verkfræðingur,
formaður SÍ
TÖLVUMÁL 5