Dagur - 07.11.1984, Blaðsíða 2

2 - DAGUR - 7. nóvember 1984
Verður veturinn
snjóþungur?
Sigurður Gunnarsson:
Nei, það held ég ekki. En
þetta er bara óskhyggja hjá
mér.
Gunnar Sigtryggsson:
Nei, ég held að vcturinn verði
sæmilegur, að minnsta kosti
fram til áramóta.
Anton Stefansson;
Það verður slatti af snjó.
Halldór Kristjánsson:
Pað verður mikill snjór í
vetur.
- Steini P. í Viðtali Dags-ins
„Eg sá svona snjóbursta er-
lendis og stundum getur maður
orðið afskaplega hissa þegar
maður sér svona einfalda hluti
en bráðnauðsynlega, að hafa
ekki látið sér detta í hug að
búa svona til. Þegar ég sá þetta
úti var ég strax ákveðinn í að
reyna að nota hugmyndina
hérna heima. Ég hafði sam-
band við kunningja minn á
Vélsmiðju Steindórs og í sam-
einingu erum við byrjaðir
framleiðslu á þessum burstum.
Það er komið „model“ frá
okkur sem hentar mjög vel þar
sem mikið er gengið um eins
og t.d. við fjölbýlishús og fyrir-
tæki. Einnig erum við að reyna
að koma á markaðinn minni
bursta sem myndi henta t.d.
við einbýlishús.“
- Þetta sagði Þorsteinn Péturs-
son lögreglumaður á Akureyri í
stuttu spjalli við Dag, en „snjó-
burstinn“ hans Steina P. hefur
vakið mikla athygli. „Svona
bursti er búinn að vera uppi við
íþróttahöll og húsverðir þar eru
stórhrifnir. Fleiri og fleiri nota
burstann í stað þess að vaða inn
með snjóinn á skónum sínum.
Pað er ekki einungis spurning um
að fá snjóinn ekki inn, heldur er
ekkert verra fyrir skófatnað en
að láta snjó standa á honum, þá
blotnar hann illa og t.d. leður-
stígvél fara illa við svoleiðis
meðferð.“
- Hvað ert þú búinn að af-
greiða marga svona bursta?
„Það voru smíðaðir 50 burstar
og við erum langt komnir að selja
þá. Ég var ákveðinn í að hrinda
þessu í framkvæmd og láta smíða
þetta hérna heima á Akureyri
vegna þess að þetta er hlutur sem
við getum útbúið og þetta gefur
atvinnu. Þetta litla ævintýri er
þegar búið að færa tveimur iðn-
aðarmönnum vinnu í eina viku.
Ég veit það hins vegar að það er
hægt að flytja þessa bursta til
landsins, en það skapar ekki at-
vinnu á Akureyri.“
- Hefur þú í hyggju að reyna
að koma burstanum á framfæri
víða á landinu?
„Já, ég ætla að reyna að koma
honum á markað um allt land,
enda hefur það í för með sér at-
vinnu hér á Akureyri. Ég nota
minn frítíma í það að dreifa
þessu og hef einnig aðstoðað við
að koma burstunum fyrir.“
- Fleiri hugmyndir sem geta
skapað vinnu í bænum?
„Já, já. Það er meiningin að
reyna að smíða grindur til þess að
festa skíði á, þessar grindur gætu
verið hvort sem er í þvottahúsinu
eða jafnvel utanhúss. Það eru
margir í vandræðum með að
geyma skíðin sín, þau standa
gjarnan upp á endann hjá fólki
úti í horni en þessar handhægu
grindur gætu leyst þann vanda.
Ég er búinn að smíða mér svona
grind sjálfur."
- Þú ert sem sagt orðinn upp-
finningamaður?
„Nei, nei, nei. Við þurfum hins
vegar að líta í kringum okkur. Ég
held að við verðum að horfa á
eitthvað annað í bili en álver
vegna þess að það kemur ekki
fyrr en eftir mörg ár og ég er viss
um að það er fullt af verkefnum
sem við gætum skapað okkur
sjálfir. Ef mér tekst að skapa iðn-
aðarmönnum atvinnu einhverjar
vikur í vetur, þá geta aðrir það
líka. Það verða allir að sameinast
um þetta.
Mér dettur í hug í þessu sam-
bandi að það er engin minja-
gripaframleiðsla á Akureyri. Ég
vildi endilega að það væri hægt
að skapa nokkrum mönnum
vinnu við það í vetur að búa til
minjagripi frá Akureyri sem hægt
væri að selja í göngugötunni
næsta sumar. Þarna kemur allt
mögulegt til greina. Færeyingarn-
ir t.d. búa til platta sem á eru
uppskriftir af ýmiss konar fær-
eyskum réttum. Þetta getum við
gert, plattar með uppskrift á
af sviðum og kartöflustöppu og
mynd af réttinum gætu t.d. ör-
ugglega selst.
Við erum ekki næstum því
nógu duglegir að græða. Ef það
koma t.d. um 60 þúsund ferða-
menn til landsins þá er ljóst að
þeir þurfa að pissa á meðan þeir
standa hér við. Það á alls staðar
að selja þeim aðgang að salern-
um. Þetta má ég hafa ef ég fer er-
lendis, ég má gjöra svo vel að
borga fyrir pissiríið. Ef 60 þús-
und manns borga 10 krónur hver
fyrir að fá að pissa þá koma
nokkrar krónur í kassann, og
hvað þurfa þeir að pissa oft í
landinu?
í alvöru, þarna er gjaldeyrir.
Við eigum líka að gefa ferða-
mönnum kost á að kynnast
vinnustöðum. Hér á Akureyri
erum við með besta frystihús
landsins, það ber af og er stór-
kostlegt. Þar eiga menn að taka
sig til, auglýsa ákveðna tíma sem
frystihúsið er til sýnis og láta
ferðamennina greiða fyrir að sjá
fólk að störfum. Svo á að selja
þessu fólki kaffi á eftir. Það ætti
líka að leyfa þessu fólki að fara
um borð í togara þegar hægt er
að koma því við. Það á að selja
aðgang að þessu. Fólk sem kem-
ur hingað kvartar yfir því að hér
sé ekkert hægt að gera annað en
að fara í Sjallann en þetta er ekki
rétt. Þótt okkur finnist ekki
merkilegt að sjá þorsk flakaðan
þá finnst útlendingum það stór-
merkilegt. Ég þekki ferðamenn
sem komu hingað og fengu að
fylgjast með í frystihúsinu og
fólkið átti ekki orð yfir þetta,
þótt íslendingar taki fyrir nefið
sumir hverjir. Möguleikarnir eru
alls staðar, menn verða bara að
leggjast á eitt við að hrinda ýmsu
skemmtilegu í framkvæmd sem
um leið skapar atvinnu og pen-
inga hér í bænum.
Við eigum t.d: að reisa lítil hús
í Kjarnaskógi. Við höfum þar
fallegasta útivistarsvæði landsins,
fólk getur verið þarna á skíðum
á veturna og á sumrin ætti að fara
vel um fólk þar. Möguleikarnir
eru alls staðar," sagði Þorsteinn
Pétursson að lokum. gk-.
Furðuleg vinnubrögð hjá bankaráði
Bragi Guðmundsson skrifar:
Ráðning bankaráðs Búnaðarbanka
íslands á Gunnari Hjartarsyni í stöðu
útibússtjóra bankans á Akureyri
kom mjög á óvart. Meðal umsækj-
enda var Jóhann Helgason sem helg-
að hefur bankanum krafta sína sl. 25
ár og um langt árabil sá starfsmaður
er næst hefur staðið fráfarandi úti-
bússtjóra og þráfaldlega gengið í
störf hans. Nú síðustu árin sem skrif-
stofustjóri útibúsins. Að öðru jöfnu
hefði Jóhann fengið útibússtjóra-
stöðuna ef starfsaldur, reynsla og
hæfni umsækjenda hefði verið látin
ráða. En öðrum var ætluð staðan og
vinnubrögðin við veitingu hennar og
fréttaflutningur af gangi mála eru
ástæður þessara skrifa.
Steingrímur Bernharðsson ætlaði
að láta af störfum útibússtjóra fyrir
tveimur árum og þá eins og nú reynd-
ust Jóhann og Gunnar hafa mest fylgi
í bankaráði. Einhverra hluta vegna
ákvað ráðið að veita stöðuna ekki að
sinni, heldur óskaði eftir því við
Steingrím að hann héldi henni
áfram. Sem hann svo gerði. Um
raunverulegar ástæður frestunarinn-
ar fyrir tveimur árum er óhægt að
fullyrða en vissulega vakti hún marg-
ar spurningar sem enn er að nokkru
ósvarað.
Nú vita það allir sem vilja vita að
betri starfsmann en Jóhann Helgason
er erfitt að hugsa sér. Þess vegna var
það í hæsta máta ómaklegt sem lesa
mátti í DV þann 26. október að
starfsfólkið hefði nær einhuga fylkt
sér um Gunnar og væri fróðlegt að
vita hverjir voru heimildarmenn
blaðsins að fréttinni. Eftir áliti starfs-
liðsins var hins vegar aldrei leitað og
mér er fullkunnugt um að það brást
ókvæða við þessari tilhæfulausu frétt
og sendi frá sér athugasemd þar að
lútandi sem birtist í DV 31. október.
Mér og fleirum hefur ofboðið
söguburðurinn sem komið var á fót
gegn Jóhanni og afgreiðslan í banka-
ráði er kapítuli út af fyrir sig. Ráðn-
ing Gunnars Hjartarsonar er enn eitt
dæmið um spillingu við embættaveit-
ingar hér á landi þótt hæfni hans til
starfans sé ekki dregin í efa. Starfs-
aldur var að engu metinn, Jóhann
hefur um tvöfalt lengri starfsaldur
hjá Búnaðarbankanum en Gunnar,
og farnir eru refilstigir á bak við
tjöldin þar sem illmælgi og hrossa-
kaup varða veginn.
Jóhann Helgason hefur sagt upp
störfum við útibú Búnaðarbankans
á Akureyri og mér finnst mannsbrag-
ur að þeirri ákvörðun hans. Honum
fylgja bestu óskir um gott gengi á
nýjum starfsvettvangi.