Skólavarðan - 01.11.1990, Blaðsíða 18
ALÞJÓÐLEG SKÓLASAFNARAÐSTEFNA
Alþjóðlegu skólasafnasamtökin, IASL, héldu sína árlegu
ráðstefnu í Umeá í Svíþjóð dagana 8-12 júlí, 1990. Tveir
íslendingar sátu þessa ráðstefnu, þær Ingibjörg
Sverrisdóttir, Fjölbrautaskólanum í Breiðholti og Sigrún
Klara Hannesdóttir, sem nú er varaforseti samtakanna.
Yfirskrift ráðstefnunnar var "Brúum bilið" og var fjallað
um fjölmarga málaflokka sem tengjast skólasöfnum.
Aðalfyrirlesarinn kom tárunum út á flestum sem í salnum
sátu því hann fjallaði um nauðsyn þess að brúa þögnina
milli foreldra annars vegar og veikra barna þeirra hins
vegar. Tók hann sem dæmi litla stúlku sem var að deyja úr
krabbameini. Sýndi hann teikningar sem litla stúlkan
hafði gert á meðan á dauðastríðinu stóð og þá erfiðleika
sem hún og foreldrarnir áttu í við að tala við barnið um
dauðann.
Alls voru fluttir um 30 fyrirlestrar og af öðrum má nefna
umfjöllun um "áhættuhópa" í skólum, þ.e. börn sem eru
líkleg að verða afbrigðilegir unglingar ef dæma má af
hegðun þeirra í grunnskólum og hugsanleg viðbrögð
skólans. Lýst var rannsókn sem verið er að vinna að í
Kalmar í Svíþjóð um tengsl safnnotkunar og námsárangurs.
Einn fyrirlesarinn lýsti því hvernig hann þróaði
tímaritalykil fyrir skólasöfn í Ástralíu og efnistók
helstu tímarit sem keypt voru í skólasöfnum. Sýndi hann
þessi litlu hefti sem eru sannkallaður fjársjóður fyrir
starfandi skólasafnverði.
Einn daginn voru allir ráðstefnugestir dubbaðir upp í
vatnshelda galla með björgunarbelti og settir í gúmmibát
sem bar okkur niður straumharða, hvítfyssandi á. Þetta er
víst kallað á enskunni "white-river rafting", og vakti
óblandna ánægju þátttakenda sem flestir eru betur þekktir
fyrir skrifstofulíf!
18