Morgunblaðið - 04.04.2001, Blaðsíða 17
LANDIÐ
MORGUNBLAÐIÐ MIÐVIKUDAGUR 4. APRÍL 2001 17
Selfossi - Skrifað hefur verið undir
samninga um heildarhönnun vegna
nýbyggingar við Hótel Selfoss, frá-
gang 400 sæta menningarsalar og
endurnýjun eldra húsnæðis Ársala
að Eyravegi 2 á Selfossi. Óli Rúnar
Ástþórsson stjórnarformaður Brúar
hf., eiganda hússins og Gísli Gísla-
son, framkvæmdastjóri ARKÍS ehf.,
skrifuðu undir samninginn sem
markar upphaf og festir fram-
kvæmdaferli hússins með dagsetn-
ingum útboða og verklokum en gert
er ráð fyrir að húsið verði tilbúið fyr-
ir rekstur 1. júní 2002.
Fyrsta útboð framkvæmda, á
jarðvinnu, verður 10. apríl. Við und-
irritunina söng Guðrún Svala Gísla-
dóttir, söngkona úr Fjölbrautaskól-
anum, við undirleik Birkis Kúld en
nemendur skólans hafa haldið
söngvakeppni og sett upp leikverk í
fokheldum salnum undanfarin ár og
með því vakið athygli á honum. Guð-
rún var sigurvegari síðustu söngva-
keppni skólans sem haldin var fyrir
fullu húsi. Í fréttatilkynningu eig-
enda segir: „Hin nýja bygging verð-
ur stórglæsileg menningar- og þjón-
ustumiðstöð fyrir Suðurland sem
býður upp á aðstæður fyrir metn-
aðarfullan hótelrekstur, fjölbreytta
menningarstarfsemi og verslun og
þjónustu. Við hönnun hússins er vel
hugað að góðu aðgengi fyrir alla og
að húsið fari vel með það fjölmenni
sem þangað mun sækja þjónustu.
Bygging hússins er stórt skref í upp-
byggingu menningar á Suðurlandi.
Í nýbyggingu hússins verða 80
hótelherbergi og veitingasalur
ásamt um 120 sæta kvikmyndasal.
Lokið verður við menningarsal
hússins og hann gerður að fullkomn-
um fjölnota sal fyrir leikhús, tónlist,
kvikmyndir og ráðstefnur. Sérstak-
lega verður hugað að góðum hljóm-
burði í salnum. Fyrsta hæð hússins
verður endurnýjuð fyrir verslun og
þjónustu og gengið frá rými fyrir
heilsurækt.
Gert er ráð fyrir að allt húsnæðið
verði leigt út til sjálfstæðra rekstr-
araðila, menningarsalur og kvik-
myndasalur, húsnæði heilsuræktar
og verslunar- og þjónusturými. Út-
leiga á þessu rými er í undirbúningi
og verður auglýst innan tíðar. Hótel-
og veitingaaðstaðan hefur þegar
verið leigð út til Kaupfélags Árnes-
inga sem mun reka hótelið undir
metnaðarfullum merkjum Icelanda-
ir hótela og Hótel Selfoss verður um
leið eina menningarhótel landsins.
Ársalir voru í eigu Sveitarfélags-
ins Árborgar þar til 9. mars 2000 en
þá keypti Kaupfélag Árnesinga allt
húsið en KÁ hefur frá 5. febrúar
1998 staðið að rekstri Hótel Selfoss.
Með kaupunum skuldbatt KÁ sig til
að standa að um 60 herbergja við-
byggingu ásamt frágangi 400 sæta
menningarsalar hússins og skyldi
þeim framkvæmdum lokið 1. júní
2002. Einnig var í kaupsamningi
getið um að KÁ myndi standa að
stofnun sérstaks hlutafélags um
eignina sem yfirtæki kaupsamning-
inn.
Hinn 12. júlí stóð Kaupfélag Ár-
nesinga ásamt Ísoport hf. að stofnun
Eignarhaldsfélagsins Brúar hf. og
yfirtók hið nýja félag kaupsamning-
inn. Framkvæmdastjóri hins nýja
félags er Sigurður Jónsson.
Við undirbúning framkvæmda
skipaði Brú hf. byggingarnefnd sem
í eiga sæti dr. Valdimar K Jónsson
verkfræðingur, Hildur Jónsdóttir
ferðaráðgjafi og Halldór Birgisson
lögmaður. Nefndin stóð að sam-
keppni milli arkitekta um hönnun á
byggingunni og fyrirkomulag. Arki-
tektastofan ARKÍS ehf. varð hlut-
skörpust í þeirri samkeppni og ligg-
ur hugmynd þeirra til grundvallar
frekari hönnun og framkvæmda.
ARKÍS sér um heildarhönnun húss-
ins og hefur með sér verkfræðistof-
una Hönnun hf. til þeirra verka.“
„Stórt skref í upp-
byggingu menningar“
Stefnt að því að menningarhús á Selfossi verði tilbúið fyrir rekstur 1. júní á næsta ári
Vestmannaeyjum - Þingflokkur
Framsóknarflokksins var á ferð í
Vestmannaeyjum dagana 22. og 23.
mars sl. Þingmenn og tveir ráðherrar
flokksins, þeir Guðni Ágústsson og
Halldór Ásgrímsson, fóru víða og
kynntu sér stöðu mála hjá Eyjamönn-
um. Meðal verka þeirra hér var að
Halldór Ásgrímsson, formaður
Framsóknarflokksins, í fjarveru heil-
brigðis- og tryggingaráðherra Ingi-
bjargar Pálmadóttur, undirritaði
samning við Vestmannaeyjabæ um
endurbætur á Heilbrigðisstofnun
Vestmannaeyja. Um leið og legu-
deildir verða allar endurnýjaðar
verða deildirnar sameinaðar á einni
hæð sem hefur í för með sér mikla
hagræðingu í rekstri. Það var tákn-
rænt að undirritun samninganna fór
fram í Landlist en árið 1847 var byggð
fæðingastofa við það hús og mun það
vera fyrsta sjúkrabygging á Íslandi.
Nú þegar hefur fyrsti áfangi fram-
kvæmdanna verið boðinn út, kostn-
aðaráætlun hönnuða við áfangann var
81,6 milljónir og lægsta tilboð sem
barst var frá Eyjatré upp á 81,8 millj-
ónir króna. Eftir er að yfirfara tilboð-
in en það verður gert á næstu dögum.
Morgunblaðið/Sigurgeir Jónasson
Halldór Ásgrímsson ráðherra og Guðjón Hjörleifsson bæjarstjóri und-
irrita samninginn. Fyrir aftan eru Guðbjörg Sigurgeirsdóttir, formaður
sjúkrahússstjórnar, og Gunnar Kr. Gunnarsson sjúkrahússforstjóri.
Endurbætur á
heilbrigðisstofnun
Stykkishólmi - Stofnað hefur verið
félagið Heilsuefling Stykkishólms
ehf. Að félaginu standa tveir hlut-
hafar, Stykkishólmsbær með 40%
og 3p-Fjárhús ehf. í Reykjavík
með 60%. Markmið félagsins er að
nýta heita vatnið í Stykkishólmi til
heilsuræktar.
Heita vatnið í Stykkishólmi er
efnaríkt og hefur haft góð áhrif
m.a. á þá sem þjást af húðsjúk-
dómum. Fyrsta verkefni félagsins
er að gera athugun á hagkvæmni
þess að setja upp heilsurækt í
Stykkishólmi og markaðsetja
hana. Stofnframlag Stykkishólms-
bæjar er sá kostnaður sem þegar
hefur verið lagður í undirbúning
þessa máls.
Í stjórn nýja félagsins eru: Páll
Kr. Pálsson, Bergþór Ólason og
Magnea Hjálmarsdóttir. Ásthildur
Sturludóttir hefur verið ráðin
framkvæmdastjóri hins nýja félags
Þeir sem standa að stofnun félags-
ins eru bjartsýnir á að hugmyndir
þeirra geti orðið að veruleika. Þá
er verið að ræða um að bjóða gest-
um upp á að dvelja í bænum og
njóta heilsutengdrar þjónustu þar
sem heita vatnið gegnir stóru hlut-
verki. Reiknað er með að niður-
stöður hagkvæmiathugana liggi
fyrir eftir nokkra mánuði.
Heitt vatn til heilsuræktar
Morgunblaðið/Gunnlaugur Árnason
Kristín Benediktsdóttir og Karl Dyrving, starfsmenn sundlaugarinnar í
Stykkishólmi, við heita pottinn. Stofnað hefur verið félag til að mark-
aðssetja vatnið til heilsuræktar og eru miklar vonir bundnar við það.
Blönduósi - Kvenfélögin í
landinu hafa undanfarið vak-
ið athygli landsmanna á holl-
ustu íslenska vatnsins sem
svaladrykks. Veggspjald sem
heitir einfaldlega „Vatn“ hef-
ur verið gefið út til að kynna
málefnið og hafa kvenfélags-
konur í A-Húnavatnssýslu
ekki látið sitt eftir liggja og
dreift veggspjöldum víða á
opinberum stöðum og í skól-
um í sýslunni. Austur-hún-
vetnskar kvenfélagskonur
vilja sérstaklega benda
skólayfirvöldum á að tryggja
góðan aðgang nemenda að
fersku og heilnæmu vatni.
Halda
vatni
að hér-
aðsbúum
Kvenfélagskonur í A-Húnavatnssýslu
standa þétt saman í því að kynna holl-
ustu íslenska vatnsins.
Kvenfélagskonur í Austur-Húnavatnssýslu
Morgunblaðið/Jón Sigurðsson
Egilsstöðum - Gönguleiðsögn,
ferðatækni og hópstjórn er heiti
helgarnámskeiðs sem nýlega var
haldið á vegum Fræðslunets Aust-
urlands. Emil Björnsson, fram-
kvæmdastjóri Fræðslunetsins,
sagði í samtali við Morgunblaðið
að með þessu væri verið að styðja
við ferðaþjónustu sem vaxandi at-
vinnugrein á Austurlandi og
mennta fólk sem fæst við að leið-
segja á hinum fögru gönguleiðum
í fjórðungnum.
Emil sat námskeiðið og var
spurður um framvindu þess. „Við
byrjuðum á að fara í gegnum allan
búnað göngumannsins og hvernig
best væri að útbúa sig í mat og
elda á gönguferðum. Við vörðum
töluverðum tíma í rötun, m.a. á
vettvangi, kortalestur og GPS-
staðsetningartækin og ítarlega
var fjallað um gönguleiðsögn,
mannlega þáttinn í henni og al-
menna gönguleiðsögutækni. Svo-
kölluð náttúrutúlkun, það að lesa í
landið, var einnig á dagskrá. Þá
stóð til að byggja snjóhús og gista í
því um nóttina, en vegna snjóleysis
varð að sleppa þeim dagskrárlið.“
Emil segir standa upp úr hvað
hópurinn sem tók þátt var
skemmtilegur og áhugasamur.
„Innan um og saman við voru
reyndir leiðsögumenn í endur-
menntun og svo fólk sem var að
sækja sér innsýn í listgreinina að
leiðsegja.“
Leifur Örn Svavarsson var
kennari á námskeiðinu, en hann er
þekktur fjallamaður og Græn-
landsfari. Hann starfar með Ís-
lenskum fjallaleiðsögumönnum og
er jafnframt jarðfræðingur og yf-
irkennari við björgunarskóla
Landsbjargar.
Fræðslunet Austurlands hefur
áður haldið námskeið tengd ferða-
þjónustunni og nefnir Emil í því
sambandi að það hafi verið aðili að
svæðisleiðsögunámi sem lauk fyrir
rúmu ári, en þá útskrifuðust 35
svæðisleiðsögumenn. Á döfinni
eru svo þjónustunámskeið fyrir
ferðaþjónustuna og námskeið þar
sem fjalla á um matreiðslu fyrir
ferðamenn með áherslu á íslensk-
an mat.
Gönguleiðsögn, ferðatækni og hópstjórn
Listin að veita leiðsögn
á fögrum gönguleiðum
Morgunblaðið/Emil Björnsson
Leifur Örn Svavarsson fræðir þátttakendur á námskeiði um göngu-
leiðsögn og fjallamennsku um ýmsar útgáfur af hentugum ferðamat.