Morgunblaðið - 02.10.2001, Blaðsíða 16
HÖFUÐBORGARSVÆÐIÐ
16 ÞRIÐJUDAGUR 2. OKTÓBER 2001 MORGUNBLAÐIÐ
HEILSUGÆSLUSTÖÐIN í Mjódd
hefur sagt upp þeim sjúklingum sem
ekki hafa lögheimili í Reykjavík en
hafa haft þar heilsugæslulækni. Um
er að ræða rúmlega 900 Kópavogs-
búa og um 300 manns úr öðrum
sveitarfélögum.
Að sögn Birgis Guðjónssonar, yf-
irlæknis á Heilsugæslunni í Mjódd,
er forsaga málsins sú að þegar stöðin
var að byggjast upp hafi verið mikill
skortur á læknum í Kópavogi og því
hafi mikið af fólki þaðan verið skrifað
inn á stöðina. Árið 1996 hafi launa-
kerfi læknanna síðan verið breytt
svo að þeir fá laun samkvæmt fjölda
þeirra sem búa á viðkomandi svæði.
„Þannig að Kópavogslæknar fá
borgað fyrir Kópavogsbúa og
Reykjavíkurlæknar fá borgað fyrir
Reykjavíkurbúa. Þetta hefur verið
látið afskiptalaust þar til við lendum
í þeim vandræðum að einn læknirinn
á stöðinni fer í ársfrí og það fæst
enginn fyrir hann. Þá hættir stöðin
að geta sinnt því sem hún á að gera,“
segir hann.
Að sögn Birgis hefur verið mikið
álag á heilsugæslustöðinni síðan
læknirinn fór. „Við eigum að vera
sex að vinna og erum þá núna að
jafnaði fimm. Auk þess eru náms- og
sumarfrí ekki ennþá búin þannig að
við erum stundum ekki nema fjögur
og jafnvel niður í þrjú á köflum. Hjá
mörgum okkar hefur verið tiltölu-
lega auðvelt að fá tíma hingað til en
biðtíminn er nú orðinn meira en vika
sem er alveg óviðunandi.“
Hann segir að farið hafi verið yfir
málið og niðurstaðan orðið að reyna
að fækka þeim sem sækja lækna-
þjónustu á stöðina og sinna þannig
hverfinu betur. Þar sem launakerfið
sé með þessum hætti þá hafi þótt
eðlilegast að Kópavogsbúarnir og
öðrum sjúklingum utan Reykjavíkur
hafi verið bent á að reyna að fá sér
lækni í heimabyggð.
Hann segir þó að ekki verði lokað
fyrir þjónustu á þetta fólk. „Það má
ekki horfa á þetta sem uppsögn
þannig að um 1200 manns séu skilin
eftir vegalaus. Ég vona að bréfið hafi
verið þannig að fólk skilji að það
megi leita hingað áfram þangað til
það er búið að koma sér fyrir annars
staðar.“
Að sögn Birgis gengur illa að fá
lækna til starfa, bæði vegna þess að
endurnýjun í starfsstéttinni er lítil
en einnig hafi verið brögð að því að
sérmenntaðir heimilislæknar hafi
horfið til annarra starfa. Hann telur
að vegna þessa gætu svipaðar að-
gerðir verið á döfinni á öðrum heilsu-
gæslustöðvum í borginni.
„Ég hef grun um að þar sem
manneklan er að grafa um sig sé
þetta í bígerð – ég held að ég geti
sagt það. Þá veit maður að þeir í
Kópavoginum segja sjálfsagt líka
upp fólki sem þeir hafa haft úr
Reykjavík þannig að ég reikna með
því að þetta verði keðjuverkun,“ seg-
ir hann.
Fólk skráð á stöðina
Halla Halldórsdóttir, sem er bæj-
arfulltrúi í Kópavogi og á sæti í
stjórn Heilsugæslunnar í Kópavogi,
segir að ekki hafi verið fundað um
málið í stjórn Heilsugæslunnar.
„Þetta hefur tíðkast á milli sveitarfé-
laga í mörg ár og það má segja að
það hafi verið einskonar þegjandi
samkomulag um þetta frá því að við
vorum bara með eina stöð hérna
uppi í Hamraborg.“ Hún segir að
þessar aðgerðir setji verulegt strik í
reikninginn hjá heilsugæslunni í
Kópavogi. „Nú er allt þetta fólk kom-
ið í bið. Við verðum einfaldlega að
skrá fólkið á stöðina en ekki á lækni
því við höfum ekki einu sinni lækna
til þess að sinna þessum sjúkling-
um.“
Tvær heilsugæslustöðvar eru í
Kópavogi, önnur í Hamraborg og hin
í Smáranum, en að sögn Höllu liggur
fyrir beiðni hjá heilbrigðisráðuneyt-
inu um nýja heilsugæslustöð í Linda-
og Salahverfi. Hún segir að menn
séu bjartsýnir á að fljótlega verði
hafist handa við að koma þeirri stöð
á laggirnar.
„Við höfum fengið jákvæðar mót-
tökur í heilbrigðisráðuneytinu og er-
um að vonast til þess að það verði
fljótlega settir peningar í þetta. Það
verður ekkert mál að finna húsnæði
því bæði er búið að bjóða okkur hús-
næði og svo er þarna húsnæði sem er
mjög auðvelt að nýta.“
Heilsugæslan í Kópavogi hefur að
sögn Höllu þjónað Reykvíkingum að
einhverju leyti en ekki er búið að
taka saman um hversu mikinn fjölda
er að ræða. Hún segir ekki geta sagt
til um hvað gert verður í framhald-
inu.
„Það eru Reykvíkingar sem eru
hjá okkur og það er ekki búið að
segja þeim upp. Þetta verður bara
rætt hjá okkur og tekið á þessu.“
Halla bendir á að heilsugæslu-
stöðvarnar í Kópavogi og Reykjavík
hafi mikla samvinnu sín á milli.
„Rekstur okkar er kominn alveg til
heilsugæslustöðva Reykjavíkur. Við
erum bara ennþá með okkar eigin
stjórn þannig að við erum að verða
eins og stöðvar frá Reykjavík.“
Aðspurð hvort ekki sé nauðsyn-
legt að reyna að fjölga læknum í
Kópavogi vegna þessa, segir Halla
að ekkert húsnæði sé fyrir hendi.
„Ég býst við því að þetta verði til
þess að fólk fari að nota Læknavakt-
ina miklu meira og það fari að verða
meira álag á henni. Þannig að vissu-
lega setur þetta strik í reikninginn.“
Morgunblaðið/Þorkell
Heilsugæslustöðin í Mjódd mun héðan í frá einungis þjóna sjúklingum
sem eiga lögheimili í Reykjavík. Þetta setur verulegt strik í reikninginn
hjá heilsugæslunni í Kópavogi, að sögn bæjarfulltrúa í Kópavogi, en 900
íbúar í bænum hafa haft heilsugæslulækni í Mjódd.
Um 1.200 sjúkling-
um sagt upp í Mjódd
Kópavogur
TILLAGA Borgarskipulags um
breytingu á aðalskipulagi og deili-
skipulagi vegna göngubrúar yfir
Miklubraut við Kringluna til móts
við Framheimilið hefur verið sam-
þykkt og verður málið tekið fyrir á
fundi borgarráðs í dag.
Samkvæmt reglum um kostn-
aðarskiptingu ríkis og sveitarfélaga
myndi Vegagerð ríkisins bera meg-
inhluta kostnaðar vegna slíkrar brú-
arsmíði þar sem Miklabrautin er
stofnbraut og skilgreind sem þjóð-
vegur í þéttbýli. Til þess að fjárveit-
ing fáist þarf framkvæmdin hins
vegar að vera komin á aðalskipulag
sveitarfélagsins, þ.e. Reykjavík-
urborgar. Breyting á aðalskipulagi
er þannig forsenda þess að fjármagn
fáist til verksins.
Þorvaldur S. Þorvaldsson, skipu-
lagsstjóri Reykjavíkur, segir að-
draganda brúarsmíðinnar hafa ver-
ið langan en hann eigi hins vegar
von á að nú verði höfð hröð handtök.
„Borgin hefur lengi þrýst á þessar
framkvæmdir. Þarna er ekki sýnd
göngubrú á núgildandi að-
alskipulagi Reykjavíkur en nú er
verið að klára skipulagsferlið. Síðan
er gert ráð fyrir að bjóða verkið út
snarlega,“ segir Þorvaldur og kveð-
ur framkvæmdir því sennilega hefj-
ast á næstu mánuðum. Sama útlits-
teikning og er á hinum tveimur
göngubrúnum yfir Miklubraut verð-
ur að sögn Þorvalds notuð í meg-
indráttum en heildarútlit verður
ekki það sama þar sem brúin verður
meira skáhallt yfir götuna en hinar
brýrnar.
Sigurður Skarphéðinsson, gatna-
málastjóri, segir heildarkostnað við
göngubrúna og nauðsynlegar breyt-
ingar í nánasta umhverfi hennar
nema um 85 milljónum. Af því greiði
ríkið sjálfa brúna sem kosti um 55 til
60 milljónir og borgin tengingar af
brúnni til austurs og vesturs.
„Við erum nú að hanna brúna.
Borgin hefur lýst vilja til að leggja
fé í brúarsmíðina á næsta ári og við
reiknum með að Vegagerðin sé
sama sinnis. Þannig er stefnt að því
að hefja framkvæmdir á næsta ári
en endanleg ákvörðun liggur ekki
fyrir. Um leið og við fáum grænt ljós
frá Vegagerð og skipulags-
yfirvöldum er hægt að bjóða verkið
út með það fyrir augum að brúin
verði smíðuð í vetur og undirstöð-
urnar eins fljótt og hægt er næsta
vor. Brúin ætti því að vera komin
upp seinnipart sumars ef allt gengur
eftir,“ sagði Sigurður en lagði enn
fremur áherslu á að endanlegar
samþykktir liggi ekki enn fyrir.
„Hjá borginni er unnið að því af
miklum krafti að þessi framkvæmd
komist upp.“
Lengi verið þrýst á um úrbætur
Foreldrar í Safamýri og Háaleit-
ishverfi hafa sl. rúm tvö ár ítrekað
ritað bréf, m.a. til borgaryfirvalda
og alþingismanna Reykvíkinga, þar
sem þeir hafa óskað eftir göngubrú.
Bréfaskrif íbúanna jukust mjög eftir
að Miklabrautin var breikkuð og
telja þeir þörfina á bættum sam-
göngum mjög brýna.
Borgarstjóri sagði á borgarstjórn-
arfundi í fyrrahaust að nauðsynlegt
væri að bæta öryggi gangandi veg-
farenda á þessu svæði, hins vegar
hefði aldrei verið gert ráð fyrir því í
aðalskipulagi Reykjavíkur að þarna
kæmi göngubrú og það hafi heldur
ekki verið tekið sérstaklega til um-
fjöllunar í borgarráði eða borg-
arstjórn þegar deiliskipulag Miklu-
brautar í heild var þar til sérstakrar
skoðunar. Erindi um göngubrú á
þessum stað var lagt fyrir sam-
göngunefnd Reykjavíkurborgar 5.
desember 2000 þar sem upplýst var
að forathugun á verkinu væri hafin.
Þar var einnig minnt á að þegar
deiliskipulag vegna breikkunar
Miklubrautar var samþykkt kom
fram í umsögn um athugasemdir að
göngubrú á þessum stað yrði sett
framarlega ef ekki fremst í for-
gangsröðun slíkra mannvirkja.
!"#!
$%
&'(
+
/
,
0
+ ) 12
Göngubrú yfir Miklu-
braut næsta sumar
Kringlan
DEILISKIPULAG nýrrar leik-
skólalóðar ásamt verslunar- og þjón-
ustulóð og litlum fjölbýlishúsum við
Breiðumýri er nú í vinnslu. Að sögn
sveitarstjóra Bessastaðahrepps er
áætlað að bygging leikskólans geti
hafist árið 2003. Gunnar Valur Gísla-
son sveitarstjóri segir að þörfin fyrir
leikskólarými á höfuðborgarsvæðinu
virðist alltaf vera að aukast.
„Sveitarfélög eru stöðugt í þeirri
stöðu að vera nýbúin að taka í notk-
un leikskóla þegar brýn þörf er á að
fara að byggja næsta. Eins fylgir það
einsetningu grunnskóla að þörfin
fyrir heilsdagsrými í leikskólum
eykst mjög mikið frá því sem var áð-
ur. Það þýðir hins vegar að leikskóli
sem annaði kannski 120 börnum fyr-
ir 5 eða 10 árum annar ekki nema 60
– 70 börnum í dag. Þar af leiðandi
þarf fleiri byggingar fyrir leikskóla-
börnin okkar.“ Að sögn Gunnars er
verið að huga að framtíðinni með
byggingu leikskólans. „Við erum
nýbúin að ljúka við okkar fjögurra
deilda leikskóla og um leið og fjórða
deildin var tekin í notkun þá fóru að
byggjast upp biðlistar fyrir framtíð-
ina.“ Hann segir að hreppsnefnd hafi
ákveðið að huga að skipulagningu
lóðarinnar þannig að undirbúningi
verði lokið þegar að byggingu leik-
skólans kemur en áætlað sé að það
verði árið 2003. Nýi leikskólinn verð-
ur við Breiðumýri en þar eru aðrar
skólabyggingar sveitarfélagsins.
„Leikskólinn okkar í dag stendur við
Breiðumýri og nýtur nálægðar við
grunnskólann, tónlistarskólann og
íþróttahúsið en það eru mikil sam-
skipti þarna á milli. Við erum því að
huga að nýjum leikskóla á sama
svæði þannig að sá skóli njóti sömu
nálægðar við aðra skóla á svæðinu.“
Nýr leikskóli
við Breiðumýri
Bessastaðahreppur