Morgunblaðið - 30.04.2002, Blaðsíða 11

FRÉTTIR
MORGUNBLAÐIÐ ÞRIÐJUDAGUR 30. APRÍL 2002 11
ÚTLENDINGAEFTIRLITIÐ
hafði síðdegis í gær ekki fengið um-
beðin gögn til að veita kínverskum
ferðamönnum heimild til að koma til
landsins í vikunni. Samkvæmt upp-
lýsingum frá sendiherra Kína hér á
landi, Wang Ronghua, biðu landar
hans í Peking eftir því að fá vega-
bréfsáritun frá aðalræðisskrifstofu
Dana í Guangzhou, öðru nafni Kant-
on, en ferðaskrifstofa þar í borg hafði
skipulagt ferð Kínverjanna til Ís-
lands. Fyrst átti að koma 16 manna
hópur og síðan tveir 18 manna hópar,
allir frá Kína til Helsinki, og þaðan til
Íslands í gegnum Frankfurt með vél
Flugleiða.
Wang Ronghua sagði við Morgun-
blaðið að sendiráðið hefði ekki komið
að málinu og undraðist hann frétta-
flutning af því hér á landi. Ekkert
óeðlilegt væri við það að óskað væri
eftir upplýsingum til að samþykkja
vegabréfsáritun. Íslensk stjórnvöld
vildu auka komur ferðamanna frá
Kína og vonandi yrðu engin vanda-
mál því samfara. Ef þessir ferða-
menn gætu ekki útvegað fullnægj-
andi upplýsingar þá væri ekkert við
því að gera og áritanir yrðu ekki
gefnar út.
Georg Kr. Lárusson, forstjóri Út-
lendingaeftirlitsins, sagði við Morg-
unblaðið í gær að á meðan umbeðnar
upplýsingar bærust ekki frá Kína þá
væri ekki hægt að veita Kínverjunum
vegabréfsáritun. Um væri að ræða
hefðbundnar upplýsingar um ferða-
menn sem væru áritunarskyldir inn á
Schengen-svæðið. Sem dæmi væru
þetta ljósrit af vegabréfi, upplýsingar
um flugbókanir fram og til baka,
staðfestingar á því að um viðskipta-
fulltrúa væri að ræða og upplýsingar
um tilgang ferðarinnar til Íslands.
„Við tökum enga afstöðu til þess
hvort þetta fólk er óæskilegt eða
ekki. Við erum fyrst og fremst að
óska eftir upplýsingum til að leggja
mat á málið. Þarna er verið að vinna á
nákvæmlega sama hátt og þegar um
aðrar þjóðir er að ræða,“ sagði
Georg.
Ekki kvartað þegar 11
Kínverjum var snúið við
í síðasta mánuði
Fyrir rúmum mánuði, eða 18.
mars, sneri danska landamæralög-
reglan á Kastrup-flugvelli ellefu Kín-
verjum við sem ætluðu til Íslands á
vegum sömu ferðaskrifstofu í Gu-
angzhou, sem nefnir sig „Iceland
Commerce and Tourist Bureau“.
Taldi lögreglan hópinn vera „athug-
unarverðan“, eins og Georg orðaði
það, og tók Kínverjana til sérstakrar
rannsóknar. Niðurstaðan hefði verið
sú að svo mikið misræmi hefði verið
milli ferðagagna og frásagna hópsins
að tilgangur ferðarinnar hefði ekki
verið talinn sá sem upp var gefinn.
Aðspurður hvort athugasemdir
eða fyrirspurnir hefðu borist Útlend-
ingaeftirlitinu og dönsku landa-
mæralögreglunni vegna þessara 1l
Kínverja, sagði Georg svo ekki vera.
Yfirleitt bærust þessum yfirvöldum
kvartanir ef venjulegum ferðamönn-
um væri snúið við á þennan hátt, sem
búnir væru að ferðast langa leið og
greiða öll fargjöld.
„Við erum aðilar að Schengen-
svæðinu og höfum gert samning við
Dani um að þeir séu í forsvari fyrir
okkur í Kína. Við erum skuldbundnir
til að fylgja reglum hvers ríkis um
vegabréfsáritanir. Ef reglur Dana
eru strangari en okkar þá ber okkur
að fara eftir þeim. Til að fullnægja
skilmálunum þarf þetta mál að fara í
gegnum dönsku ræðisskrifstofuna í
Kína. Ef við síðan veitum heimild til
Íslands þá erum við um leið að gefa
heimild inn á allt Schengen-svæðið.
Um það snýst málið og því þurfum
við að vanda okkur og fara varlega,“
sagði Georg.
Öll gögn komin til
ræðisskrifstofu í Kína
Ólafur Egilsson, sendiherra Ís-
lands í Kína, sagðist í samtali við
Morgunblaðið hafa fengið upplýsing-
ar um það í gærmorgun að kínversk-
um tíma hefðu öll umbeðin gögn um
ferðamennina verði send til aðalræð-
isskrifstofunnar í Guangzhou. Einnig
hefðu greiðslur borist fyrir vega-
bréfsáritanirnar. Af þeim sökum
væri ekkert því til fyrirstöðu að veita
Kínverjunum áritun og ferðaheimild
til Íslands. Vonaðist Ólafur til þess að
málið leystist farsællega.
Hann sagði að það væri stefna ís-
lenskra og kínverskra stjórnvalda að
auka straum ferðamanna og viðskipti
milli landanna. Með bættum efnahag
fólks í Kína hefðu æ fleiri haft efni á
ferðalögum til fjarlægari landa.
Einnig væri mikið um ferðalög þessa
viku þar sem almenningur í Kína
fengi vikufrí eftir 1. maí.
Ólafur sagði ferðaskrifstofuna í
Guangzhou hafa verið í samstarfi við
Flugleiðir og Ferðaskrifstofu Íslands
um að senda Kínverja til Íslands.
Hún væri virt á sínu sviði og hefði
m.a. fengið viðurkenningu frá vara-
forsætisráðherra Kína. Alls hefðu um
50 manns komið til landsins á vegum
ferðaskrifstofunnar og sagði Ólafur
þá alla hafa skilað sér aftur heim og
engin vandamál komið upp, þar til
nýlega að 11 Kínverjum var snúið
heim frá Danmörku, sem fyrr segir.
Ólafur sagði sínar upplýsingar
herma að vegna seinkunar á flugi til
Kaupmannahafnar hefðu þessir Kín-
verjar misst af flugi til Íslands og
orðið að vera yfir nótt á Kastrup-
flugvelli.
„Hópurinn var talinn tortryggileg-
ur af dönsku landamæralögreglunni,
sem sneri honum til baka til Kína.
Ekkert hefur komið fram sem færir
sönnur á að þessi hópur hafi ætlast
eitthvað annarlegt fyrir. Eina sem
fyrir liggur í málinu er tortryggni
Dana um að þarna væri um óeðlilegt
ferðalag að ræða, sem ekki hefur ver-
ið sýnt fram á,“ sagði Ólafur og bætti
við að skömmu áður hefði hópur sjö
Kínverja komið til Íslands athuga-
semdalaust og ferðast fram og til
baka milli landanna. Þetta mælti
gegn því að eitthvað óeðlilegt væri á
ferðinni með ferðir Kínverjanna.
Ólafur sagði kínversku ferðamenn-
ina hafa áætlað að dvelja í fjóra daga
hér á landi og ferðir yrðu skipulagðar
af Ferðaskrifstofu Íslands. M.a. væri
áætlað að ferðamennirnir ættu fund
með íslensk-kínverska viðskipta-
ráðinu. Héðan yrði farið aftur til Kína
eftir nokkurra daga stopp í Evrópu.
Hjá Ferðaskrifstofu Íslands, sem
hefur áður tekið á móti hópum kín-
verskra ferðamanna, fengust þær
upplýsingar í gær að heimsókn Kín-
verjanna yrði ekki skipulögð fyrr en
að staðfesting bærist um að þeir ættu
bókað flug til Íslands.
Kínverskir ferðamenn á leið til Íslands hafa ekki fengið vegabréfsáritanir
Útlendingaeftirlitið ekki
fengið umbeðin gögn
Kínverjum á vegum sömu ferða-
skrifstofu snúið við í síðasta mánuði
UNGT Reykjavíkurlistafólk setti
upp fjárfestingaklukku Reykjavík-
urlistans í Kringlunni í gær, þar
sem Samband ungra sjálfstæð-
ismanna setti nýverið upp svo-
nefnda skuldaklukku borgarinnar.
Með þessu vill ungt R-listafólk
vekja athygli á þeirri uppbygg-
ingu sem hefur átt sér stað hjá
Reykjavíkurborg í valdatíð R-
listans á sama tíma og staða borg-
arsjóðs hafi batnað.
„Mörgum hefur runnið til rifja
að aðeins sé horft á skuldahliðina
í umræðum um fjármál borg-
arinnar,“ segir Dagur B. Eggerts-
son sem skipar 7. sæti R-listans.
„En fólk veit að skuldir eru ekki
merki um slæma stöðu ef eignir
aukast á móti,“ segir Dagur.
„Ungt Reykjavíkurlistafólk ákvað
því að ræsa fjárfestingaklukku
sem mun elta skuldaklukku Heim-
dallar eins og debet eltir kredit.“
Ungt R-listafólk bendir á að
skuldaklukkan gangi nærri tvöfalt
hraðar en tilefni er til þar sem
sjálfstæðismenn hafi lesið skakkt
út úr fjárhagsáætlunum borg-
arinnar fyrir árið 2002 og ofáætl-
að lántökur um 1,5 milljarða
króna. Skuldir aukist því ekki um
11 milljónir kr. á dag heldur 6,7
milljónir. Á móti aukast fjárfest-
ingar um 31,4 milljónir á dag.
Jafnframt gagnrýnir ungt R-
listafólk að sjálfstæðismenn skuli
leyna því að skuldir borgarsjóðs
hafi minnkað jafnt og þétt á síð-
asta kjörtímabili. Skuldaaukning
sé tilkomin vegna uppbyggingar
arðsamra fjárfestinga fyrirtækja
borgarinnar. Hér er ekki um að
ræða bagga á komandi kynslóðir,
heldur þvert á móti veganesti að
sögn Dags B. Eggertssonar.
Fjárfestingaklukka
Reykjavíkur-
listans komin upp
Morgunblaðið/Árni Sæberg
Dagur B. Eggertsson við ræsingu Fjárfestingaklukkunnar í Kringlunni.
ORKUVEITA Reykjavíkur hefur
látið endurnýja fyrrum íbúðarhús
starfsmanna við rafstöðina í Elliða-
árdal, en húsið varð síðar íbúðarhús
Aðalsteins Gudjohnsen rafveitu-
stjóra. Endurnýjunin með búnaði
kostaði um 26 milljónir kr. en húsið
er notað til móttöku, fundahalda,
námskeiða og slíks af hálfu Orku-
veitunnar.
Guðmundur Þóroddsson, for-
stjóri Orkuveitu Reykjavíkur, sagði
í samtali við Morgunblaðið að húsið
hefði verið í tekið í notkun fyrir um
tveimur árum. Það væri notað fyrir
móttökur, námskeið, vinnufundi og
ýmiss konar fundahöld og hefði
nýst mjög vel til þeirra hluta. Húsið
væri út af fyrir sig, en samt
skammt í hringiðuna og því gæfist
þar mjög gott næði til vinnu. Þetta
nýja hlutverk hæfði þannig húsinu
mjög vel, en hann gæti hins vegar
alveg viðurkennt að þeir hefðu ekki
farið út í að byggja slíkt hús sér-
staklega.
Aðspurður hvort húsið yrði selt
þegar nýjar höfuðstöðvar Orkuveit-
unnar yrðu teknar í notkun, sagði
Guðmundur að eiginlega væri ekki
hægt að selja húsið vegna staðsetn-
ingar þess, þar sem það stæði í
garðinum á gömlu rafstöðinni í
Elliðaárdal og tilheyrði þeirri þyrp-
ingu húsa sem þar stæði niður á ár-
bakkanum. Húsið væri sögufrægt.
Það hefði verið reist árið 1921 og
hefði verið íbúðarhús starfsmanna
við gömlu rafstöðina, en þar hefðu
búið þrjár fjöldskyldur starfs-
manna við rafstöðina á þeim tíma.
Guðmundur bætti því við að fyrir
nokkrum árum hefði Orkuveitan
selt öll íbúðarhús sem rafveitan
hefði átt á þessu svæði, en þá hefði
þetta hús verið undanskilið vegna
staðsetningar sinnar. Góð samstaða
hefði verið um að endurnýja húsið
vegna staðsetningar sinnar og
sögulegs hlutverks, enda væri
ómögulegt að eiga svona hús og
nýta það ekki á nokkurn hátt.
„Okkur þykir ósköp vænt um húsið
nú þegar það er komið í fulla notk-
un,“ sagði Guðmundur, ennfremur.
Hann sagði að endurnýjun húss-
ins hefði kostað um tuttugu millj-
ónir króna. Búnaður, eldhústæki og
annað slíkt hefði kostað sex millj-
ónir króna til viðbótar.
Hús starfsmanna rafstöðvarinnar í Elliðaárdal endurnýjað
Notað fyrir móttökur,
fundahöld og námskeið
Morgunblaðið/Kristinn
Íbúðarhúsið fyrir aftan rafstöðina.
HÆSTIRÉTTUR féllst í gær á
kröfu lögreglunnar í Reykjavík og
veitti henni þriggja vikna frest til að
synja verjanda manns, sem grunað-
ur er um smygl á 30 kílóum af hassi
til landsins, um aðgang að öllum
gögnum málsins.
Héraðsdómur Reykjavíkur hafði
hinn 23. apríl sl. fallist á að veita lög-
reglunni frest til að synja verjand-
anum um aðgang að gögnum málsins
þar til maðurinn hefði gefið skýrslu
fyrir dómi, en þó ekki lengur en til kl.
16 í dag, 30. apríl.
Skaut lögreglan niðurstöðu hér-
aðsdóms til Hæstaréttar sem með
vísan til umfangs málsins og fram-
vindu rannsóknar þess taldi ekki efni
til annars en að fallast á kröfu lög-
reglunnar.
Um er að ræða 30 kíló af hassi sem
smyglað var frá Danmörku. Hinn 12.
mars sl. lagði ávana- og fíkniefna-
deild lögreglunnar í Reykjavík hald
á umrædd fíkniefni og hefur málið
verið til rannsóknar síðan. Maður-
inn, sem málið varðar, var handtek-
inn 15. apríl og sama dag var honum
gert að sæta gæsluvarðhaldi til kl. 16
hinn 7. maí nk. Staðfesti Hæstiréttur
þann úrskurð 19. apríl. Maðurinn
hefur ekki kannast við aðild að mál-
inu. Fyrir liggur þó að hann þekkir
og hefur tengsl við a.m.k. einn grun-
aðra í málinu. Þá liggur fyrir að aðrir
grunaðir í málinu hafa borið nokkrar
sakir á hann.
Fær frest til að
synja verjanda
um aðgang
að gögnum
ÖKUMAÐUR var tekinn grunaður
um ölvun við akstur á Selfossi um
miðjan dag í gær. Um tveimur tím-
um áður höfðu yfirvöld afskipti af
honum þar sem hann hafði sofnað út
frá eldamennsku með þeim afleið-
ingum að eldur varð laus á pönnu og
mikinn reyk lagði um stigagang.
Snör viðbrögð
á Selfossi
♦ ♦ ♦