Lesbók Morgunblaðsins - 01.02.2003, Síða 12

12 LESBÓK MORGUNBLAÐSINS ˜ MENNING/LISTIR 1. FEBRÚAR 2003
Ofurvel minnist ég þessa frá æskunnar dögum,
undi ég löngum í varpa og grösugum högum.
Fór ekki af bæ nema beðinn þess vísast ég væri
ef vantaði kaffi eða mjöl eða nagla og snæri.
Ólatur var ég með gleði og fögnuð í fangi
um fjöruna gekk ég ilmandi af sjávarins þangi
Mjúkt undir fæti og mildust var gola af landi
merki um gönguna augljós í fjörunnar sandi.
Dvaldist mér nokkuð en aftur er heim vildi halda
hálfflætt þá reyndist og öldurnar seildust til valda.
Fótspor mín afmáð þær höfðu með áleitni sinni
angurværð saknaðar fann ég í huganum inni.
Núna er minningin dagljós og merlar hér inni,
mildur fer blærinn um vanga og gleður nú sinni.
Ævispor gengin nú týnast í gleymskunnar sandi,
gjálfrandi öldurnar bera þau síðustu að landi.
Senn mun þó brima og sandurinn lífsins mun rjúka,
seinustu merkin um gönguna burtu þá fjúka.
HELGI SELJAN
Höfundur er fyrrverandi alþingismaður.
FÓTSPOR Í SANDI