Morgunblaðið - 12.02.2003, Blaðsíða 13

MORGUNBLAÐIÐ MIÐVIKUDAGUR 12. FEBRÚAR 2003 B 13
bílar
„VIÐ fengum bílinn bara eins og
hann kemur af kúnni og byrjuðum á
því að skræla allt undan honum; allt
sem heitir framdrif og fjöðrun að
framan. Fjaðrirnar að aftan og aft-
urhásingin varð að fara líka því það
er ekki til í hana 100% læsing,“ seg-
ir Snorri Gíslason bifvélavirkja-
meistari og eigandi S.S. Gíslasonar
ehf., sem breytti Suburban-jeppa
Þórs Magnússonar. Bíllinn kemur á
blaðfjöðrum að aftan og með sjálf-
stæða fjöðrun að framan.
„Við settum undir hana Dana 60
hásingar að framan og aftan með
stærri afturöxlum en er orginal í
þessum hásingum, þ.e.a.s. 35 rillu
öxlar, sem þú brýtur ekki. Við smíð-
uðum undir hann fjögurra liða fjöðr-
un að framan og aftan.“
Snorri bendir á að Bandaríkja-
menn haldi sig mikið við blaðfjaðrir í
jeppum og pallbílum og ástæðan sé
sú að þeir þurfi ekki svo mikið á
mikilli fjöðrun að halda. Þeir séu að-
allega að horfa til þess að geta lest-
að bílana nógu mikið og notað þá til
flutninga.
Nú var hægt að setja í bílinn
100% loftlæsingar að framan og
aftan. „Það þarf að spila dálítið á
loftlæsingarnar þegar þær eru not-
aðar í ófærð og menn þurfa að
kunna vel á bílinn svo þær nýtist að
fullu. Það koma upp aðstæður þar
sem þær eru hreinlega til trafala.
Algengt er t.d. að keyra inn í snjó
ólæstur að framan og nota síðan
læsinguna til að bjarga þér til baka
þegar bíllinn drífur ekki lengra.“
Þá var settur í bílinn skriðgír, sem
er í raun annað lágt drif. Skriðgírinn
er smíðaður af Ljónsstaðabræðr-
um, sem eru þekktir jeppasmiðir í
Gaulverjabæjarhreppi.
„Við smíðum allt í fjöðrunina á
bílnum, t.d. hólkana sem fóðring-
arnar fara í og stífurnar eru bara rör
þegar við byrjum. Við smíðum líka
sætin fyrir púðana á grindinni og á
hásingunni og festingarnar fyrir
stífurnar. Við notum Koni-dempara
sem reynslan hefur sýnt að koma
vel út. Loftpúðarnir eru keyptir í
fjaðrabúðinni Parti, sem flytur inn
loftpúða í vörubíla og jeppa. Púð-
arnir bera 1.600 kg. Það er sett
sjálfstýring á loftpúðana þannig að
þegar púðarnir eru á réttri stillingu
heldur bíllinn alltaf sömu veghæð
óháð hleðslu. Það er líka hægt að
stjórna hverjum púða fyrir sig sem
getur nýst vel t.d. þegar bíllinn dett-
ur niður um ís. Ef dekkin sitja á
botninum og hafa grip er nóg að
setja meira loft í púðana til að lyfta
yfirbyggingunni frá ísnum. Þannig
er hægt að koma í veg fyrir stórtjón
á brettaköntum og öðrum hlutum
bílsins. Það er líka gott að hafa loft-
púða í akstri í hliðarhalla en þó ekki
nema fram til þess að nauðsynlegt
er að beygja undan. Þá getur það
orðið hættulegt séu menn ekki nógu
fljótir að pumpa í púðana hinum
megin. Oft lenda menn líka í þeim
aðstæðum að bíllinn situr fastur og
þá er hægt að lyfta honum upp og
moka undan honum,“ segir Snorri.
Hann segir að menn hafi óttast
það mest að ísinn gæti stungið gat
á púðana og skemmt þá. Það hafi þó
ekki reynst vera. Einu bílarnir sem
hafi skemmt púða séu þeir bílar
sem séu ekki nógu vel smíðaðir fyrir
púðana og eitthvað í bílnum sjálfum
rekist í púðana.
Hásingar færðar
Það voru smíðaðir brettakantar á
bílinn og þegar það er gert verða
menn að hafa ýmislegt að leið-
arljósi. Ekki síst í þessu tilviki að
gott sé að ganga um bílinn að aftan
þar sem hann er notaður til far-
þegaflutninga. Sömuleiðis verður að
taka mið af olíutankinum þannig að
hásingin fari ekki út í tankinn. Þess
vegna var ákveðin staðsetning
ákveðin á afturhásingunni og kant-
arnir smíðaðir eftir því.
„Framhásingin getur bara verið á
sínum upphaflega stað. Ef hún er of
framarlega fer hún í stýrismask-
ínuna og ef hún er of aftarlega fara
dekkin aftan í boddíið þegar bílnum
er beygt.“
Snorri smíðaði líka stigbrettin
sem eru stór og haganlega gerð.
Ekki eru til jafnvægisstangir í þenn-
an bíl svo Snorri varð að smíða þær
til þess að koma í veg fyrir stamp
og veltu þegar bílnum er ekið á veg-
um.
Brettakantarnir voru smíðaðir af
Gunnari Ingva.
Þór setur sjálfur í bílinn rafkerfi
sem er bæði tímafrekt og kostn-
aðarsamt. Nokkrar gerðir af tal-
stöðvum eru í bílnum og lagnir fyrir
alls konar ljós. Aukarafkerfi er í bíln-
um fyrir allan rafbúnaðinn.
Allt skrælt undan bílnum
Snorri Gíslason bifvélavirkja-
meistari fer í gegnum breyt-
ingarnar á Suburban Þórs
Magnússonar.
gugu@mbl.is
JEPPAFERÐIR ÚTIVISTAR Í VETUR OG FRAM Á VOR:
FEBRÚAR
21.2. - 23.2. Hveravellir - akstur yfir jökul
Þessi ævintýraferð á Hveravelli er í samvinnu við Arctic Trucks. Mikið breyttir bílar
fara yfir Langjökul eða Kjalveg eftir aðstæðum. Ætluð bílum sérstaklega útbúnum til
aksturs í snjó. Þátttaka háð samþykki fararstjóra.
MARS
7.3. - 9.3. Strútur
Farið inn að Strút með gönguskíðin á toppnum. Strútsöldur, Veðurháls og Kaldaklof
eru lítt kannaðar slóðir.
21.3. - 23.3. Setur. Jeppa- og skíðaferð
Ekið á föstudagskvöldi í Hrauneyjar. Skíðafólkið gengur frá Þúfuvötnum. Farið
verður yfir Þjórsá á Sóleyjarhöfðavaði. Ferðin er ætluð vönu skíðafólki og öflugum
bílum. Þátttaka er háð samþykki fararstjóra.
APRÍL
4.4. - 6.4. Landmannalaugar. Jeppa- og skíðaferð
Farið í Hrauneyjar og gist þar. Skíðamenn ganga frá Sigöldu á meðan jeppamenn
stefna á Ljótapoll og í Landmannalaugar. Sameiginlegt grill, söngur og gaman.
24.4. - 27.4. Drangajökull
Farið til Norðurfjarðar og gist þar. Þaðan um Eyrarháls yfir Drangajökul og í
Grunnuvík, þar sem gist er í tvær nætur. Farið yfir í Hrafnfjörð. Á heimleið er komið
við á Hrolleifsborg. Einungis fyrir vel útbúna bíla og þátttaka háð samþykki
fararstjóra
Munið Jepparæktina annan laugardag í mánuði. Allir velkomnir.
Ekkert þátttökugjald, bara að mæta og taka þátt.
Ítarlegri upplýsingar á www.utivist.is
GAGNASAFN
MORGUNBLAÐSINS
mbl.is