Morgunblaðið - 25.02.2003, Blaðsíða 18

HÖFUÐBORGARSVÆÐIÐ
18 ÞRIÐJUDAGUR 25. FEBRÚAR 2003 MORGUNBLAÐIÐ
GÓÐ og jöfn aðsókn var að skíða-
svæðinu í Bláfjöllum á laugardag
og að sögn Grétars Þórissonar,
umsjónarmanns svæðisins, er
nægur snjór enn í fjöllunum þrátt
fyrir snjóleysið í borginni. Vegna
hvassviðris var þó lokað í fjöll-
unum í gær og á sunnudag en
stefnt er að opnun á ný um leið og
veður leyfir.
Unnið var að uppsetningu nýrr-
ar byrjendalyftu í Bláfjöllum í
gær og bjóst Grétar við að hægt
yrði að taka hana í notkun um
næstu helgi. Verður það tólfta
skíðalyftan í Bláfjöllum.
Morgunblaðið/Brynjar Gauti
Nægur snjór á skíðasvæðunum
Bláfjöll
SKIPULAGS- og bygginganefnd
Reykjavíkur hefur lýst sig jákvæða
í garð umsóknar um að byggja
fjögurra hæða íbúða- og hótelbygg-
ingu á Laugavegi 22A í Reykjavík.
Byggingin mun einnig innihalda
verslunar- og þjónustuhúsnæði.
Það er eignarhaldsfélagið GAM
og verktakafyrirtækið Gerpir sem
standa sameiginlega að bygging-
unni. Um er að ræða viðbyggingu
við bakhús sem er á lóðinni. Er
áformað að láta húsið sjálft standa
en ofan á það verði síðan byggðar
þrjár hæðir.
Í kjallara hússins verða
geymslur og á fyrstu hæð þess
verslun, sem gullsmíðaverkstæði
Guðjóns A. Magnússonar verður
rekið í, og veitingastaður þar sem
kaffihúsið Kaffi Royal verður til
húsa. Á annarri og þriðju hæð
hússins er gert ráð fyrir að hafa
eina íbúð og fjórar hótelíbúðir á
hvorri hæð og loks verði þrjár
íbúðir á fjórðu hæð þess. Alls verða
því fimm tveggja herbergja íbúðir
og átta hótelíbúðir, sem allar verða
stúdíóíbúðir og á vegum Hótels
Fróns, í húsinu.
Þá er sótt um leyfi til að rífa
framhús byggt árið 1888 á sömu
lóð.
Kemur fram í fundargerð nefnd-
arinnar að skipulagsferli vegna
hótelbyggingarinnar er ólokið.
Umsóknin var tekin fyrir á fundi
skipulags- og bygginganefndar síð-
astliðinn miðvikudag og var af-
greidd á þann hátt að nefndin gerir
ekki athugasemd við að veitt verði
leyfi fyrir byggingunni eftir að
teikningar að henni hafa verið lag-
færðar.
Hönnuður byggingarinnar er
Gunnar Rósinkranz í samvinnu við
teiknistofuna Arkþing.
Íbúðir og
hótel verði á
Laugavegi 22A
Miðborg
Framhlið byggingarinnar eins og hún mun snúa að Laugavegi. Hægra
megin við hana er Laugavegur 22 en Laugavegur 24 vinstra megin.
STEFNT er að því að koma á lagg-
irnar 10–11-verslun á Stúdentagörð-
um við Eggertsgötu en Félagsstofn-
un stúdenta (FS) og forsvarsmenn
verslunarkeðjunnar hafa undirritað
samkomulag þar um. Gangi áætl-
anirnar eftir má búast við að versl-
unin verði opnuð næsta haust.
Að sögn Guðrúnar Björnsdóttur,
framkvæmdastjóra Stúdentagarð-
anna, yrði verslunin á Eggertsgötu
24, sem nú er í byggingu, en það er
síðasta fjölbýlishúsið sem byggt
verður á svæði Stúdentagarðanna. Í
byggingunni verða að öðru leyti 124
einstaklingsíbúðir og hafa 52 þeirra
þegar verið teknar í notkun. Nú er
unnið að innréttingu þriðja áfanga
hússins en gert er ráð fyrir að fjórði
áfanginn og jafnframt sá síðasti
verði afhentur í haust.
„Það var alltaf meiningin að koma
upp einhverri þjónustu á stúdenta-
garðasvæðinu og upphaflega voru
ýmsar hugmyndir í því sambandi,“
segir Guðrún en eina þjónustan sem
fyrir er á svæðinu er fólgin í rekstri
leikskóla á vegum FS annars vegar
og Reykjavíkurborgar hins vegar.
„Þessar hugmyndir hafa síðan verið
skornar talsvert niður, meðal ann-
ars vegna þess hversu dýrt er að
taka húsnæði undir þetta, en versl-
unin hefur alltaf verið inni í mynd-
inni.“
Guðrún segir að ákvörðunar um
hvort verði af verslunarrekstrinum
sé að vænta í mars. Gangi hug-
myndirnar eftir verður þetta í
fyrsta sinn sem kjörbúð verður rek-
in innan stúdentagarðasvæðisins. „Í
dag búa þar á milli 700 og 800
manns og þegar þetta hús klárast í
haust verða þarna um 900 manns.
Auk þess liggur Litli Skerjafjörður
að svæðinu en á því er lítil sem eng-
in þjónusta – reyndar held ég að
það sé ekki verslun í öllum Skerja-
firðinum.“
Margir íbúa ekki á bíl
Hún er ekki í vafa um að mikil
þörf sé á verslun af þessu tagi.
„Þetta er orðið löngu tímabært því
mikið af því fólki sem býr þarna er
ekki á bíl og það er langt í næstu
búð. Það er ekki nokkur spurning
um að þetta mun létta því lífið
þannig að við verðum eiginlega að
láta þetta rætast.“
En af hverju hefur verslun ekki
verið komið á laggirnar fyrr á svæð-
inu? „Það eru ýmsar ástæður fyrir
því,“ segir Guðrún. „Við höfum
kannski ekki verið með nægilega
heppilegt húsnæði undir þetta því
þetta þarf að vera sérstaklega útbú-
ið með mikilli lofthæð, góðri að-
komu og svo framvegis. Þegar
hverfið sem slíkt var hannað var
gert ráð fyrir að það yrði þjónusta í
þessu tiltekna húsi og önnur hús á
þessu svæði voru einfaldlega ekki
hugsuð sem þjónustueining. Svo var
þetta hús síðast í byggingu og þess
vegna er þetta að koma fyrst inn
núna.“
Hún segist vonast til að verði af
verslunarrekstrinum geti hann haf-
ist í haust enda sé stefnt að því að
verktakar skili síðasta hluta hússins
í ágúst, þar með töldum þeim hluta
sem verslunarrýmið verður í.
Kjörbúð komi næsta
haust á Stúdentagarða
Vesturbær
Morgunblaðið/Árni Sæberg
Gert er ráð fyrir að verslunarreksturinn verði í vestari enda hússins á
Eggertsgötu 24 en pláss verður fyrir lager í kjallara hússins.
TÍU tilboð bárust í gerð gatna og
veitna í 1. áfanga Vatnsendalands –
Hvörf V en tilboðin voru lögð fram á
fundi bæjarráðs Kópavogs síðastlið-
inn fimmtudag. Lægsta tilboðið í
gatnagerðina átti E.K. vélar ehf. og
hljóðaði það upp á tæpar 94,5 millj-
ónir króna. Lægsta tilboðið í veiturn-
ar átti hins vegar Fleygtak ehf. og
hljóðaði það upp á 16 milljónir króna.
Kostnaðaráætlun bæjarins vegna
gatnagerðarinnar var rúmar 137
milljónir en hæsta tilboðið hljóðaði
upp á tæpar 150,5 milljónir króna. Sé
litið til gerðar veitnanna var kostn-
aðaráætlunin rúmar 23 milljónir er
hæsta tilboðið í þær var tæpar 29
milljónir.
Bæjarráð frestaði því á fundi sín-
um að taka afstöðu til tilboðanna.
Tíu tilboð í
gatnagerð
og veitur
Vatnsendi
EINAR Sveinbjörnsson, fulltrúi
Framsóknarflokks í bæjarstjórn
Garðabæjar, vill að boðað verði til
samráðs- og kynningarfundar með
íbúum Ása- og Grundahverfa um
staðsetningu nýs grunnskóla. Til-
laga hans þar að lútandi var felld í
bæjarstjórn á fimmtudag.
Valið stendur milli tveggja stað-
setninga fyrir skólann, annars vegar
á hluta lóðar Héðins við Stórás og
hins vegar á svokölluðu Sjálandi, þar
sem nýtt bryggjuhverfi mun rísa á
uppfyllingu í Arnarnesvoginum. Í
greinargerð með tillögu Einars, sem
hann lagði fram á bæjarstjórnar-
fundi á fimmtudag, segir að þessir
tveir staðsetningarkostir hafi komið
svipað út í forgangsröðun sem gerð
var á íbúaþingi í Garðabæ síðastliðið
haust.
Segir hann þó galla að afar fáir
íbúar hafi tekið þátt í þessari for-
gangsröðun á íbúaþinginu og mikil-
vægt sé að almenningi verði gefinn
kostur á að hafa áhrif á þróun máls-
ins. „Nú er rétti tímapunkturinn til
að kalla eftir samráði við íbúa hverf-
isins þegar tveir heppilegir kostir á
staðsetningu liggja fyrir ásamt út-
færslu mannvirkja, aðkomu og
gönguleiðum,“ segir í greinargerð-
inni.
Hönnun þurfi að
hefjast á næstunni
Sem fyrr segir var tillagan felld
með fjórum atkvæðum gegn þremur.
Segir í bókun bæjarstjóra vegna
málsins að náið samráð hafi verið
haft við íbúa Garðabæjar um stað-
setningu skóla fyrir Ásahverfi og
Sjáland, m.a. á fyrrgreindu íbúa-
þingi þar sem niðurstaðan hafi verið
sú að bæði Héðinslóðin og lóðin á
Sjálandi kæmu til greina. „Nú liggja
fyrir kostir og gallar hvorrar lóðar
fyrir sig. Hönnun skólans þarf að
hefjast á næstunni til að hann geti
verið risinn haustið 2005. Því er mik-
ilvægt að bæjarstjórn tefji ekki mál-
ið heldur taki ákvörðun um staðsetn-
ingu skólans á næstu dögum,“ segir í
bókuninni.
Vill fund með
íbúum um stað-
setningu skóla
Bæjarstjóri segir mikilvægt að tefja
ekki málið heldur taka ákvörðun
Garðabær