Morgunblaðið - 29.05.2003, Blaðsíða 42

Au
st
ur
la
nd
Möguleikar á gistingu á Austurlandi fara batn-
andi með hverju árinu, en það eru til dæmis
góðar fréttir fyrir þá sem hyggja á ferð með Nor-
rænu frá Seyðisfirði. Markús Einarsson hjá
Bandalagi íslenskra farfugla segir að þrjú far-
fuglaheimili séu í hæfilegri fjarlægð frá Seyð-
isfirði og góður kostur til að gista á síðustu
nóttina fyrir brottför. Þetta eru heimilin á Seyð-
isfirði, í Húsey og Berunesi.
Í fyrrahaust var opnaður nýr veitingastaður í
Berunesi í Djúpavogi. Bærinn er ofan við þjóð-
veg, við Berufjörð norðanverðan, miðja vegu
milli Mývatns og Skaftafells.
Um er að ræða smekklegan veitingastað
sem tekur 60 manns í sæti. Staðurinn hefur
vínveitingaleyfi og þar er seldur heimilislegur
matur.
Morgunverðarhlaðborð er framreitt í Gesta-
stofunni; hollur heimilismatur á kvöldin og girni-
legar hnallþórur með kaffinu. Gestgjafarnir eru
Anna og Ólafur, sem reka kúabú, og eru gestir
velkomnir í fjósið til að fylgjast með mjöltum.
Frá Berunesi er falleg leið upp á milli tind-
anna fyrir ofan bæinn og niður eftir dal hinum
megin. Fyrir aðra getur Búlandstindur (1.069 m)
handan fjarðarins verið freistandi áskorun.
Bærinn er ofan við þjóðveg við Berufjörð norðan.
Svefn, matur
og ganga
www.hostel.is/
Seyðisfjörður er aldamótabær 1900 og
þar er heillegasta bæjarmynd liðinna
tíma sem finnst á landinu. Húsasafnið er
án hliðstæðu. Þetta er lifandi bær og þar
eru veitingahús, Netkaffi, gististaðir,
sundlaug og verslanir, meðal annars
elsta verslun á landinu: Hjá Waage eða
Verzlun EJ Waage, en hjónin Eyjólfur
Jónsson Waage og Pálína Guðmunds-
dóttir Ísfeld opnuðu hana árið 1907. Í
búðinni er goðsagnakenndur lager og
hafa viðskiptavinir vitnað um að hafa
keypt þar kvendragt frá millistríðsárun-
um, svo dæmi sé tekið, enda er versl-
unin stundum kölluð Tískuhús Pálínu
Waage. „Fólk hefur meiri tröllatrú á mér
en ég get staðið undir,“ segir Pálína sem
nú rekur búðina. Annars er það ný og
stærri ferja sem hefur mest áhrif á kaup-
staðinn þessa dagana, því í kjölfar Nor-
rænu er verið að vinna að hinum ýmsu
endurbótum í bænum. Skeljungur mun
til dæmis opna nýjan söluskála í byrjun
júní, opnuð verður upplýsingamiðstöð í
nýju ferjuhúsi sem jafnframt mun þjóna
sem umferðarmiðstöð fyrir ferðamenn.
Endurbætur verða gerðar á tjaldsvæði
bæjarins, eins og kostur er, og gang-
stéttir lagðar. Hreinsunarátak er fram-
undan og hafnarmannvirki eru langt kom-
in.
Nýtt hótel verður svo opnað á Seyð-
isfirði um miðjan júní og er það hið svo-
kallaða „húsahótel“ sem fregnir hafa
borist af öðru hverju. Hótelið heitir Hótel
Alda og er í tveim húsum, fyrsta gistiálm-
an er í húsi sem byggt var fyrir 105 árum,
þá sem hótel, en þjónaði lengst af sem
banki. Nú hefur húsið fengið upprunalegt
hlutverk sitt aftur í níu rúmgóðum og fal-
legum herbergjum með sérbaði og nú-
tímaþægindum.
Annað athyglisvert sem tengist hinni
einstöku gömlu byggð á Seyðisfirði er að
elsta vélsmiðja á Íslandi verður opnuð til
sýnis fyrir almenning í júní. Elsta rið-
straums- og bæjarveita er einnig á Seyð-
isfirði, en hún var reist 1913 og verður
því 90 ára á þessu ári. Virkjunin er í eigu
Rarik sem hyggst halda upp á þessi
merku tímamót í ágúst. Hún er því sem
næst í upprunalegri mynd, enn starfhæf
og er hægt að skoða stöðvarhúsið ef
þess er óskað.
Pálína Waage í elstu verslun landsins sem
var opnuð árið 1907.
Andblær aldamóta
Úti fyrir austurströnd
Fáskrúðsfjarðar rís
klettaeyjan Skrúður og
reyndar dregur fjörður-
inn nafn sitt af honum.
Í Skrúði hefur óteljandi
fjöldi sjófugla sumar-
dvöl og kemur upp ungum sín-
um áður en aftur er haldið til
hafs. Í Skrúðnum er Skrúðs-
hellir, hár hellir og víður, og
hefur fallið allmikið úr hellis-
loftinu sem myndar stóra grjót-
hrúgu. Skrúðshellir er stærsti
hellir á Austurlandi. Fyrr á tím-
um voru róðrar stundaðir úr
Skrúði og höfðust vermenn þá
við í hellinum; notuðu hann
sem verbúð
Þekkt er þjóðsagan af
Skrúðsbóndanum, trölli nokkru
sem áður var trúað að byggi í
hellinum. Var sagt að vættur
þessi hafi verið meinlaus þeim
sem ekki gerðu á hlut hans. Þó
fer sögum af því að eitthvað
hafi hann fækkað sauðum sem
settir voru á beit í Skrúðnum.
Þjóðsagan segir að hann hafi
heillað prestsdóttur frá Hólm-
um í Reyðarfirði og náð til sín í
eyna. Segir sagan að þar hafi
hún búið lengi og eignast dótt-
ur með Skrúðsbónda. En dag
einn var komin líkkista í kirkj-
una á Hólmum. Þekktist þar
prestsdóttirin og hafði dáið af
barnsförum. Var útför hennar
gerð og meðan á jarðarförinni
stóð sást tröllið grátandi utan
við kirkjugarðinn. Gekk það síð-
an á skíðum sem leið lá út
fjörðinn og heim í Skrúð.
Skrúður
Morgunblaðið/Rax