Morgunblaðið - 10.06.2003, Blaðsíða 3
ÍÞRÓTTIR
MORGUNBLAÐIÐ ÞRIÐJUDAGUR 10. JÚNÍ 2003 B 3
CAFU, fyrirliði brasilísku heims-
meistaranna í knattspyrnu, hefur
gert tveggja ára samning við
ítölsku Evrópumeistarana í AC Mil-
an. Þeir fá hann án greiðslu frá
Roma, þar sem hann hefur leikið
frá árinu 1997. Samningur Cafu,
sem er 33 ára, við Roma var runn-
inn út. Hann er eini leikmaðurinn
sem hefur spilað þrjá úrslitaleiki í
röð í heimsmeistarakeppninni en
hann var í sigurliðum Brasilíu 1994
og 2002 og í silfurliðinu 1998.
Cafu er sókndjarfur hægri bak-
vörður og það kom því ekki á óvart
að fyrir helgina fékk danski bak-
vörðurinn hjá AC Milan, Thomas
Helveg, skilaboð um að hann væri
ekki lengur inni í myndinni hjá
Ancelotti, þjálfara félagsins.
Cafu samdi
við AC Milan
„ÉG vissi ekkert hver staðan var úti
á velli þegar ég var að ljúka leik á
síðustu holunni. Kylfuberinn minn
vissi það en vildi ekki segja mér
neitt,“ sagði Anna Lísa Jóhanns-
dóttir, kylfingur úr GR eftir sinn
fyrsta sigur í mótaröði GSÍ. „Það
var kannski eins gott því ég fékk
skolla á holuna og ef ég hefði vitað
hversu spennandi þetta var er aldr-
ei að vita nema ég hefði klúðrað
þessu. Ég fékk tvo skramba í röð á
13. og 14. holunni þannig að maður
veit aldrei,“ sagði Anna Lísa.
Hún sagðist nokkuð ánægð með
hvernig hún spilaði á Akranesi um
helgina. „Völlurinn var alveg frá-
bær og í eins góðu standi og hann
getur orðið held ég. Markmiðið hjá
mér var að spila almennilegt golf
og fyrir síðasta daginn að halda í
við Katrínu Dögg og Þórdísi, en
þær áttu eitt högg á mig. Ég var
með Ragnhildi og Þórdísi fyrstu tvo
hringina og það er frábært að spila
með þeim, þær hafa svo mikla
reynslu.
Ég hef stundum verið rög við að
treysta því sem ég er að gera en
núna ákvað ég að treysta sjálfri
mér og því sem ég hef verð að gera
og það gekk bara vel,“ sagði Anna
Lísa. Um framhaldið sagðist hún
vonast til að vinna fleiri mót því það
væri svo miklu skemmtilegra en að
vera neðar á listanum. „Fyrst og
fremst reynir maður samt að spila
það golf sem maður veit að maður á
að geta,“ sagði sigurvegari dagsins
á Akranesi.
Kylfuberinn vissi stöðuna
en sagði mér ekkert
Ljósmynd/Óskar Sæmundsson
Anna Lísa Jóhannsdóttir,
Íslenska A-landsliðið í handknatt-leik lenti í þriðja sæti á æfinga-
móti í Hollandi sem lauk á sunnu-
daginn en Danir lentu í fyrsta sæti.
Margir af bestu leikmönnum Ís-
lands léku ekki á mótinu og notaði
Guðmundur Guðmundsson, lands-
liðsþjálfari, tækifærið og leyfði
mörgum ungum leikmönnum að
spreyta sig. Ísland tapaði fyrir
Serbum ,31:32, á laugardaginn en á
sunnudaginn kom sigur hjá Íslend-
ingum gegn Dönum, 29:26. Snorri
Steinn Guðjónsson og Einar Örn
Jónsson voru markahæstir gegn
Serbum með sjö mörk og Guðjón
Valur Sigurðsson skoraði fimm
mörk. Á móti Dönum var Einar
Hólmgeirsson atkvæðamestur með
9 mörk, Róbert Gunnarsson skoraði
8 mörk og Guðjón Valur Sigurðsson
gerði 6 mörk.
Morgunblaðið náði tali af Einari
Þorvarðarsyni, aðstoðarþjálfara ís-
lenska landsliðsins, í gærdag og var
hann ánægður með hvernig til tókst
á mótinu. „Miðað við að við vorum að
prófa marga af ungu leikmönnunum
í mótinu, tókst þetta nokkuð vel og
við erum sáttir við hvernig til tókst.
Ungu leikmennirnir spiluðu stóru
hlutverkin á mótinu og þeir sinntu
þeim vel. Allir ungu strákarnir voru
að skila sínu, til dæmis Vignir Svav-
arsson sem spilaði aðallega í vörn-
inni og stóð sig mjög vel. Við færð-
um Guðjón Val Sigurðsson úr
vinstra horninu og notuðum hann
mikið í vinstri skyttunni. Það tókst
mjög vel og hann endaði sem marka-
hæsti leikmaður mótsins.“
Guðjón Valur Sigurðsson var
markahæsti leikmaður mótsins með
21 mark. Snorri Steinn Guðjónsson
var annar markahæsti Íslendingur-
inn með 17 mörk en það dugði hon-
um í þriðja sætið yfir markahæstu
leikmenn mótsins. Einar Hólm-
geirsson endaði í 5. sæti yfir marka-
hæstu leikmenn mótsins en hann
skoraði 13 mörk.
Ísland í þriðja sæti
ÍRAR sluppu með skrekkinn á
móti Albönum í undankeppni Evr-
ópumótsins í knattspyrnu á laugar-
daginn. Adrian Aliaj gerði sjálfs-
mark fyrir Albana á 90. mínútu og
tryggði Írum 2:1 heimasigur. Robbie
Keane kom Írum yfir en Ervin Skela
jafnaði metin fyrir Albana tveimur
mínútum síðar.
EISTLAND sigraði Andorra, 2:0 á
heimavelli. Teet Allas og Kristen Vi-
ikmäe skoruðu mörkin. Eistland hef-
ur komið á óvart í keppninni og er í
öðru sæti í sínum riðli, einu stigi á
undan Króatíu og Belgíu, og hefur
aðeins fengið á sig eitt mark til
þessa.
FINNLAND sigraði Serbíu-Svart-
fjallaland, 3:0 á heimavelli. Sami
Hyypia, Joonas Kolkka og Mikael
Forssell skoruðu mörkin.
ÚKRAÍNA marði sigur gegn
Armeníu, 4:3 á heimavelli, en sigur-
markið kom ekki fyrr en á 90. mín-
útu. Það var Sergei Fedorov sem
skoraði úrslitamarkið.
HOLLAND sigraði Hvíta-Rúss-
land, 0:2 á útivelli. Marc Overmars
og Patrick Kluivert skoruðu í síðari
hálfleik.
MATTIAS Jonsson skoraði
þrennu fyrir Svíþjóð gegn San Mar-
ino. Svíar sigruðu, 1:6 á útivelli.
Marcus Allbäck gerði 2 mörk og
Fredrik Ljungberg skoraði eitt
mark fyrir Svíþjóð.
TYRKIR unnu Slóvakíu, 0:1 á úti-
velli. Kahveci Nihat gerði eina mark
leiksins. Tyrkir eru í efsta sæti í sjö-
unda riðli, tveimur stigum á undan
Englandi en Englendingar eiga leik
til góða.
GRIKKLAND kom á óvart þegar
liðið sigraði Spán, 0:1 á Spáni. Stel-
ios Giannakopoulos var hetja gest-
anna en hann skoraði sigurmarkið.
PFULLINGEN tryggði sér um
helgina áframhaldandi sæti í þýsku
1. deildinni í handknattleik, þrátt
fyrir stórtap, 38:28, gegn Post
Schwerin. Pfullingen vann fyrri
leikinn á sínum heimavelli, 33:21.
Robert Licu, rúmenska stórskyttan,
skoraði 13 mörk fyrir Post Schwerin
en þau dugðu ekki til að koma liði
hans upp um deild.
HEIÐAR Davíð Bragason, kylf-
ingur úr GKj, lék mjög stöðugt golf á
Toyotamótaröðinni á Akranesi um
helgina. Síðasta daginn fékk hann
par á fyrstu braut, fugl á næstu og í
kjölfarið fylgdu 15 pör þar til hann
fékk skolla á síðustu holunni.
LIVERPOOL hefur komist að
samkomulagi við Fulham um kaup á
írska landsliðsbakverðinum Steve
Finnan. Rick Parry, framkvæmda-
stjóri Liverpool, sagði í gær að sam-
ið hefði verið við bæði Fulham og
Finnan sjálfan og gengið yrði frá fé-
lagaskiptum hans um mánaðamótin.
FÓLK
Birgir Leifur var með forystu áAkranesi allan tímann, lék
fyrsta hringinn á 71 höggi eins og
Helgi Birkir Þórisson úr GS gerði
raunar einnig. Næsta dag jafnaði
Birgir Leifur vallarmetið á Garða-
velli þegar hann lék á 69 höggum og
Heiðar Davíð Bragason úr GKj, sem
sigraði á fyrsta mótinu á mótaröð-
inni, lék einnig á 69 höggum þann
daginn og var því með þeim félögum
í síðasta ráshóp á sunnudeginum.
Birgir Leifur gerði keppnina
óþarflega spennandi í lokin því þeg-
ar lítið var eftir var hann með nokk-
uð örugga stöðu. Eftir þrettán holur
síðasta daginn var hann á fjórum
höggum undir pari, Helgi Birkir og
Heiðar Davíð voru þá báðir á
parinu. Birgir Leifur fékk skramba
á 14. braut og annan á 15. þannig að
allt í einu var hann kominn niður á
parið í heildina. Helgi Birgir var á
einu höggi yfir pari og Heiðar Davíð
var á parinu.
Birgir Leifur fékk fugl á 16. braut
en síðan skolla á síðustu og var því á
parinu. Heiðar Davíð fékk skolla á
síðustu og var á einu yfir pari eins
og Helgi Birkir og urðu þeir því að
leika bráðabana um annað sætið og
þar hafði Helgi Birkir betur þegar
kapparnir léku 18. holuna öðru
sinni.
„Ég tók tvær rangar ákvarðanir á
14. og 15. braut sem gerði þetta
óþarflega spennandi í lokin,“ sagði
Birgir Leifur sem sagðist einfald-
lega hafa verið of ákafur. „Það er
minn stíll en það slapp til að þessu
sinni, en maður þarf stundum að
vera á bremsunni,“ sagði hann en
þegar hér var komið sögu átti hann
fjögur högg á næsta mann.
Birgir Leifur lék síðasta í móta-
röðinni hér á landi árið 2000 þegar
hann vann í Grafarholtinu og þar áð-
ur árið 1996 þegar hann vann einnig
í Grafarholti. „Það eru komnir þrír
sigrar í röð!“ sagði hann sigrihrós-
andi.
Fyrsti sigur Önnu Lísu
Anna Lísa Jóhannsdóttir fagnaði
sínum fyrsta sigri á mótaröðinni á
Akranesi á sunnudaginn. Hún var í
næst síðasta ráshóp og vissi því ekki
stöðu mála þegar hún lauk leik þar
sem þær þrjár, sem leikið höfðu
best daginn áður, voru á eftir henni.
Í síðasta ráshóp lokahringsins
voru Ragnhildur Sigurðardóttir úr
GR, Katrín Dögg Hilmarsdóttir úr
GKj og Þórdís Geirsdóttir úr GK.
Með Önnu Lísu í hópnum á undan
voru Nína Björk Geirsdóttir og
Helga Rut Svanbergsdóttir, báðar
úr GKj.
Þegar þær komu á 14. holu átti
Ragnhildur tvö högg á Önnu Lísu en
á næstu náði hún að jafna metin.
Ragnhildur náði einu höggi á 16.
braut og á meðan Anna Lísa lauk
leik á síðustu braut, eftir að hafa
fengið par á 17. braut, lenti Ragn-
hildur í miklu veseni á 17. brautinni,
sem er 330 metra löng par fjórir.
Hún lék hana á þremur höggum yfir
pari og var kominn 24 högg yfir par
en Anna Lísa lék síðustu holuna á
skolla og leik á 23 yfir pari. Ragn-
hildur þurfti því að leika síðustu hol-
una, sem er par 3 á tveimur höggum
til að jafna en það gerði hún ekki,
heldur lék hún á pari og varð höggi
á eftir Önnu Lísu.
Birgir Leifur
og Anna Lísa
sterkust á
Garðavelli
BIRGIR Leifur Hafþórsson úr GKG og Anna Lísa Jóhannsdóttir úr
GR sigruðu á Ostamótinu, öðru móti Toyota-mótaraðar GSÍ um
helgina en leikið var á Garðavelli á Akranesi. Birgir Leifur lék hring-
ina þrjá á pari, 216 höggum, en Anna Lísa á 23 höggum yfir pari og
bæði urðu þau einu höggi á undan helstu keppinautum sínum.
borðtennis á Smáþjóðaleikum
Morgunblaðið/Brynjar Gauti
TONY Pulis, knattspyrnustjóri
Stoke City, sagðist bíða eftir því
hvað Brynjar Björn Gunnarsson,
James O’Connor, Clive Clarke og
Marcus Hall en þeir eru allir með
samningstilboð í höndunum frá
Stoke.
Paul Warhurst, sem var í láni hjá
Stoke á lokakafla síðasta tímabils,
og Roland Edge, fyrrum leikmaður
með Gillingham, hafa verið sterk-
lega orðaðir við Stoke. „Edge er
ákveðinn valkostur en ég er spennt-
ari fyrir því að fá jákvæð svör frá
þeim sem fyrir eru hjá okkur. Við
getum fengið Paul Warhurst, sem
stóð sig frábærlega með okkur, en
við munum flýta okkur hægt,“
sagði Pulis við dagblaðið Sentinel í
gær.
Pulis bíður
enn svara