Morgunblaðið - 22.08.2003, Blaðsíða 8
8 B FÖSTUDAGUR 22. ÁGÚST 2003 MORGUNBLAÐIÐ
AUÐLESIÐEFNI
MENNINGARNÓTT var haldin í
Reykjavík um síðustu helgi.
Þetta er í áttunda sinn sem
menningarnótt er haldin
hátíðleg og var fjölbreytt
dagskrá í miðbæ Reykjavíkur.
Meðal þess sem finna mátti
voru tískusýningar, tónleikar,
ljóðalestur, bókalestur,
leiktæki og leiksýningar. Mjög
margir fóru í bæinn til að njóta
skemmtiatriðanna og talið að
alls hafi 100.000 manns
notið menningarnætur.
Dagskránni lauk með
glæsilegri flugeldasýningu við
Reykjavíkurtjörn en ekki fóru
allir heim eftir það heldur voru
margir áfram á
skemmtistöðum bæjarins og
dönsuðu fram eftir nóttu.
Morgunblaðið/Árni Torfason
Meðal þess sem í boði var fyrir börnin á menningarnótt var andlitsmálun. Málarinn vandar sig
við að teikna skrautlegt mynstur á þessa stelpu sem stendur alveg grafkyrr á meðan.
Gaman á menningarnótt
ÍSLENSKA landsliðið í
knattspyrnu sigraði
Færeyinga, 2:1, í miklum
baráttuleik í 5. riðli
undankeppni Evrópumótsins
í Þórshöfn á
miðvikudagskvöldið. Eiður
Smári Guðjohnsen og Pétur
Hafliði Marteinsson skoruðu
mörk íslenska liðsins og
skoraði Pétur sigurmarkið 20
mínútum fyrir leikslok. Með
sigrinum skutust Íslendingar
á topp riðilsins og eiga þar
með enn von um að komast í
úrslitakeppnina í Portúgal á
næsta ári. Íslendingar hafa
tólf stig eftir sex leiki,
Þjóðverjar hafa ellefu stig og
Skotar átta, en báðar þjóðir
hafa lokið fimm leikjum.
Íslendingar eiga eftir að
mæta Þjóðverjum tvívegis, á
Laugardalsvelli 6. september
og ytra 11. október.
„Það var þungu fargi af mér
létt þegar flautað var til
leiksloka og ég er alveg
sérstaklega ánægður með að
hafa unnið stigin þrjú,“ sagði
Ásgeir Sigurvinsson,
landsliðsþjálfari í
knattspyrnu, þegar flautað
var til leiksloka á Tórsvelli í
Þórshöfn. „Knötturinn gekk
oft vel á milli manna og
skiptingar gengu vel, en í
síðari hálfleik vantaði þessi
atriði í leik okkar á köflum.
Þegar öllu er á botninn hvolft
var þetta bara einn af
þessum leikjum þar sem
menn vinna þrátt fyrir að
þeim takist ekki að sýna allar
sínar bestu hliðar. Það er hið
jákvæða sem við tökum fyrst
og fremst með okkur úr
þessum leik.“
Morgunblaðið/Kristinn
Stuðningsmenn íslenska landsliðsins fagna eftir að sigur
Íslendinga var í höfn.
Ísland skaust í toppsætið
AÐ minnsta kosti 23 menn
týndu lífi og á annað
hundrað slösuðust er
bílsprengja sprakk við
aðalstöðvar Sameinuðu
þjóðanna í Bagdad í Írak á
þriðjudag. Meðal hinna
látnu er Sergio Vieira de
Mello, fulltrúi SÞ í Írak.
Hefur þetta grimmilega
hryðjuverk verið fordæmt
um allan heim.
Um var að ræða
sjálfsmorðsárás en talið er,
að um hálft annað tonn af
sprengiefni hafi verið í
steypubíl, sem ekið var að
byggingunni þegar þar fór
fram ráðstefna um
uppbygginguna í Írak. Var
sprengingin svo öflug, að
byggingin rústaðist að hluta.
Ekki er enn vitað hverjir
stóðu að hryðjuverkinu en
getgátur eru um, að það hafi
annaðhvort verið menn
hliðhollir fyrrverandi stjórn
Saddams Husseins eða
erlendir hryðjuverkamenn en
vitað er, að þeir hafa verið
að koma sér fyrir í Írak.
Stjórnvöld og stofnanir
um allan heim hafa fordæmt
voðaverkið og hefur Vieira
de Mello verið minnst með
mikilli virðingu fyrir
áratugalangt og giftudrjúgt
starf í þágu Sameinuðu
þjóðanna.
Ráðist á Sameinuðu
þjóðirnar í Bagdad
Í GÆR seldi Hagkaup fyrsta
hrefnukjötið, sem hefur fallið
til vegna vísindaveiða
Hafrannsóknar-stofnunar.
Tæplega 400 kíló seldust
upp og kostaði hvert kíló
1.098 kr. Búist er við að
meira kjöt verði komið í
verslanir eftir hádegi í dag
eða á morgun samkvæmt
Leifi Þórssyni,
framkvæmdastjóra Ferskra
kjötvara.
Í fyrradag veiddi Halldór
Sigurðsson ÍS níu metra
langan tarf norður af landinu.
Ætluðu skipverjar að halda
áfram veiðum og reyna að ná
fleiri hrefnum. Tveimur
dögum áður var fyrsta
hrefnan skotin á Breiðafirði,
frekar lítið karldýr. Gert hefur
verið að hrefnunum úti á sjó
og forðast skipin myndavélar
erlendra fjölmiðla, sem hafa
elt skipin þrjú.
Mikið af tölvupósti, þar
sem vísindaveiðum íslenskra
stjórnvalda er mótmælt,
hefur borist sendiráðum
Íslands í Washington,
London og síðast Berlín.
Bandarísk stjórnvöld segjast
hafa tekið til skoðunar hvort
ástæða sé til þess að beita
refsiaðgerðum gegn
Íslendingum vegna veiðanna,
að sögn AFP-fréttastofunnar.
Þá hefur stjórnvöldum borist
áskorun frá 21 evrópskri
ferðaskrifstofu. Í henni er
skorað á ríkisstjórnina að
láta af hvalveiðum þar sem
veiðarnar fara illa saman við
hvalveiðar. Flestar
ferðaskrifstofurnar eru í
Bretlandi en nokkrar eru
þýskar og norskar.
Seldu fyrsta
hrefnukjötið
Morgunblaðið/Alfons Finnsson