Morgunblaðið - 30.08.2003, Blaðsíða 20
Morgunblaðið/Helgi Bjarnason
Baldur KE vegur 75 tonn. Það var því mikil framkvæmd hjá Ólafi Björnssyni að láta hífa Baldur upp á hafnar-
bakkann og flytja hann í Gróf. Þurfti öflug tæki til þess, tvo stóra krana og öflugan flutningabíl.
BALDUR KE-97 var í gær fluttur í
naust í nágrenni við smábátahöfnina
í Gróf í Keflavík. Þar hefur þessi
bátur, sem snemma fékk viðurnefnið
„Gullmolinn“ og markaði sín spor í
útgerðarsögu Keflavíkur, fengið
varanlegan samastað.
Baldur var smíðaður í Svíþjóð
1961 og var einn af fyrstu bátunum
sem smíðaðir voru fyrir aðstæður
hér á landi og fyrsta íslenska skipið
sem notaði skuttog. Lengst af var
Baldur gerður út frá Keflavík en var
gerður út frá Garði síðasta áratug-
inn.
Baldur fékk á sínum tíma við-
urnefnið „Gullmolinn“ vegna þess að
hann þótti einstök happafleyta. Var
hann aflahæsti báturinn á dragnót-
inni á Faxaflóa öll árin frá 1961 til
1990, að fyrsta árinu undanskildu en
þá var hann í öðru sæti.
Ólafur Björnsson, fyrrverandi út-
gerðarmaður Baldurs, hefur miklar
taugar til bátsins og lét sig dreyma
um að varðveita hann þegar hætt
Baldur kominn í naust
Ólafur Björnsson fylgdi Baldri sínum síðasta spölinn. Hér er hann, lengst
til vinstri, að ræða málin við Pétur Jóhannsson hafnarstjóra, Garðar K. Vil-
hjálmsson, dótturson sinn, og Borgar Ólafsson, son sinn.
yrði að gera hann út. Nú er sá tími
kominn og eigendur Nesfisks af-
hentu honum skipið. Ólafur fékk
Reykjanesbæ til að aðstoða sig við
varðveisluna með því að útbúa naust
til að geyma hann í og var því fund-
inn staður í nágrenni Duus-húsa þar
sem bátafloti Gríms Karlssonar er til
sýnis. Sjálfur stendur hann að varð-
veislu bátsins þar og flutningi hans á
staðinn. Baldur var hífður upp á
hafnarkantinn í Keflavíkurhöfn í
gær með stórum krönum, því næst
var hann fluttur á dráttarbíl í Gróf-
ina og honum komið þar fyrir.
Ólafur fylgdi gamla bátnum sín-
um síðasta spölinn. Á Ljósanótt í
Reykjanesbæ, laugardaginn 6.
september, klukkan 21, verður Bald-
ur lýstur upp.
Keflavík
HLJÓÐMÆLINGAR Heilbrigðis-
eftirlits Suðurnesja benda sterklega
til þess að hávaði í íbúðarhúsum við
ákveðnar götur í Reykjanesbæ sé yfir
leyfilegu hámarki vegna umferðar
ökutækja um Njarðarbraut í Njarð-
vík og Hringbraut í Keflavík. Bæjar-
yfirvöld hafa unnið að lækkun hraða
og Heilbrigðiseftirlitið áformar að
beita heimildum sínum til að beina
stærri ökutækjum framhjá þéttbýli.
Heilbrigðiseftirlit Suðurnesja
(HES) fékk ábendingu frá íbúa við
Brekkustíg í Njarðvík um ónæði
vegna umferðar um Njarðarbraut.
Starfsmaður stofnunarinnar mældi
hávaða þar tvo daga í júní og einnig
við Hringbraut í Keflavík í einn dag. Í
skýrslu HES kemur fram að niður-
stöður mælinganna benda sterklega
til þess að hávaði við þessar götur sé
yfir mörkum reglugerðar um hljóð-
vist, að minnsta kosti við þau hús sem
næst götunum standa. Rifjað er upp
að Heilbrigðiseftirlitið hafi áður feng-
ið kvartanir um hávaða við Hafnar-
götu og telur það ástæðu til að ætla að
ástandið sé svipað þar þótt það kunni
að hafa batnað með nýju hringtorgi
við Faxabraut. Þá kemur fram að eft-
irlitið hefur áður mælt hávaða við
Fitjar og þar hafi hann einnig verið
yfir settum mörkum.
Fram kemur í bréfi sem Heilbrigð-
iseftirlitið hefur sent Reykjanesbæ að
stór ökutæki valdi umtalsvert meiri
hávaða en minni og tilkynnt að Heil-
brigðiseftirlitið sé með til athugunar
að nýta sér heimild í reglugerð til að
beina slíkum farartækjum framhjá
þéttbýlinu og koma þannig í veg fyrir
gegnumakstur þeirra. Óskar eftirlitið
eftir samstarfi við Reykjanesbæ um
framkvæmdina og nánari útfærslur á
fyrirhuguðum takmörkunum á um-
ferð.
Bæjaryfirvöld sammála
Erindi HES var lagt fyrir á fundi
bæjarráðs Reykjanesbæjar í vikunni
og ákveðið að fela bæjarstjóra að
ræða við fulltrúa Heilbrigðiseftirlits-
ins.
Viðar Már Aðalsteinsson, fram-
kvæmdastjóri umhverfis- og tækni-
sviðs Reykjanesbæjar, segir að bæj-
aryfirvöld séu sammála mati
Heilbrigðiseftirlitsins. Vekur hann at-
hygli á því að unnið hafi verið skipu-
lega að því að minnka umferðarhraða
og unnið verði frekar að því á næstu
tveimur árum. Þannig hafi hámarks-
hraði verið minnkaður í 30 kílómetra í
mörgum íbúðargötum og hraðahindr-
anir settar upp til að styðja við það.
Nýir kantsteinar meðfram Njarðar-
braut stuðluðu að því að menn ækju
hægar og auk þess væri áformað að
minnka hámarkshraðann þar úr 60 í
50 kílómetra. Segir Viðar Már unnið
að fleiri verkefnum í þessu skyni og
verði það gert áfram í samvinnu við
Heilbrigðiseftirlitið. Þá vildi hann
beina því til íbúa við miklar umferðar-
götur að planta trjám í garða sína, það
væri árangursrík aðgerð til að draga
úr hávaðanum frá umferðinni en tæki
vissulega nokkuð langan tíma að
virka.
Varðandi hugmyndir um að beina
þungaumferð fram hjá þéttbýlinu
segir Viðar Már að bæjaryfirvöld vilji
stuðla að því. Ný gata með sjónum og
hringtorg á mótum Hafnargötu og
Víkurbrautar væru liður í því, einnig
aðgerðir til að beina þungaumferð til
iðnaðarsvæðisins á Iðavöllum um
Bolafót og Flugvallarveg.
Heilbrigðiseftirlit vill beina þungaumferð framhjá þéttbýli
Hávaðinn mælist vel
yfir settum mörkum
Reykjanesbær
SUÐURNES
20 LAUGARDAGUR 30. ÁGÚST 2003 MORGUNBLAÐIÐ
UMSÓKNUM um lóðir undir nýjar
bensínstöðvar í Reykjanesbæ rignir
yfir bæjaryfirvöld. Þrjár slíkar um-
sóknir voru lagðar fram á fundi bæj-
arráðs í vikunni og jafnmargir aðilar
hafa verið leita fyrir sér um hið sama
með samtölum við starfsmenn bæj-
arins.
Baugur Group óskar eftir viðræð-
um um staðsetningu bensínstöðvar á
mótum Smiðjuvalla og Flugvallar-
vegar. Tekið er fram í erindi félags-
ins að áformað sé að hefja rekstur
bensínstöðva félagsins á fyrri hluta
næsta árs.
Olíuverslun Íslands óskar eftir
formlegum viðræðum um lóð fyrir
sjálfsafgreiðslustöð á útrásum úr
Keflavík í átt að flugvellinum eða í
áttina að Innri-Njarðvík. Fram kem-
ur í erindi Olís að félagið hefur átt í
viðræðum við nokkur fyrirtæki varð-
andi uppsetningu á sjálfsafgreiðslu-
stöð innan þeirra lóðarmarka en
þyki nú rétt að óska eftir sérstakri
lóð undir þessa starfsemi.
Þá sækja Reisbílar ehf. sem reka
Go-kartbrautina í Njarðvík, um að-
stöðu fyrir ómannaða bensínstöð á
eða við lóðina sem körtubrautin er á.
Bæjarráð vísaði þessum erindum til
umfjöllunar umhverfis- og skipu-
lagsnefndar.
Viðar Már Aðalsteinsson, fram-
kvæmdastjóri Umhverfis- og tækni-
sviðs bæjarins, staðfestir að mikil
ásókn sé í lóðir fyrir bensínstöðvar.
Auk þessara þriggja fyrirtækja hafi
að minnsta kosti þrír aðilar til við-
bótar óskað eftir lóðum fyrir bens-
ínstöðvar. Flestir hafi áhuga á að
tengja stöðvar sínar umferð um
Reykjanesbrautina, á leiðinni í flug-
stöðina á Keflavíkurflugvelli, eða að
þær verði að minnsta kosti vel sýni-
legar frá brautinni.
Viðar Már segir að ekki séu neinar
lóðir lausar fyrir þessa starfsemi en
ákveðnir möguleikar séu fyrir hendi
sem þurfi að skoða. Segir hann að
málið verði væntanlega skoðað í
þeirri vinnu við rammaskipulag sem
nú standi yfir.
Fjöldi umsókna
um lóðir undir
bensínstöðvar
Reykjanesbær
SANDGERÐISDAGAR voru settir formlega í gærkvöldi. Fullt var út úr
dyrum við tónlistardagskrá í safnaðarheimilinu og fylgdust gestir af áhuga
með söng Helga Maronssonar þegar myndin var tekin.
Hátíðin hófst raunar í fyrrakvöld með menningarkvöldi í Ævintýrahús-
inu Púlsinum og sögukvöldi í Vitanum. Fjölmenni var á báðum stöðum. Í
Púlsinum komu fram ungir tónlistarmenn úr Sandgerði, auk Önnu Pálínu
og Aðalsteins Ásbergs.
Fjölbreytt dagskrá verður á Sandgerðisdögum í dag og nær hún há-
marki með varðeldi og flugeldasýningu í kvöld.
Morgunblaðið/Reynir Sveinsson
Fjölsótt tónlistaratriði
Sandgerðisdaga
Sandgerði
MÁLVERKASÝNINGU Sossu
Björnsdóttur í Listasafni Reykjanes-
bæjar lýkur á morgun, sunnudag. Af
því tilefni er aðgangur endurgjalds-
laus á morgun og verður listamaður-
inn á staðnum frá klukkan 15 til 16.30.
Sossa sýnir ný olíuverk og er með
þessari sýningu að feta nýjar slóðir í
túlkun sinni. Góð aðsókn hefur verið
að sýningunni, samkvæmt upplýsing-
um Valgerðar Guðmundsdóttur,
menningarfulltrúa Reykjanesbæjar.
Sýningarsalur Listasafns Reykja-
nesbæjar er í Duushúsum í Keflavík
og er opinn alla daga frá klukkan
12.30 til 19.
Síðasta sýningarhelgi
Sossu í Listasafninu
Reykjanesbær
FLUGMÓDELFÉLAG Suðurnesja
stendur fyrir kynningu á flugmódel-
sportinu í dag, laugardag, og á morg-
un, báða dagana frá klukkan 10 til 13.
Kynningin verður á flugvelli félagsins
í Grófinni í Keflavík og er háð veðri.
Kynningin nýtur fjárhagslegs
stuðnings Menningar-, íþrótta- og
tómstundaráðs Reykjanesbæjar. Í til-
kynningu frá stjórn Flugmódelfélags-
ins kemur fram að gestir fá að með-
höndla flugmódelin með aðstoð
leiðbeinenda.
Kynning á
flugmódelum
Keflavík
♦ ♦ ♦