Morgunblaðið - 24.09.2003, Blaðsíða 8
8 B MIÐVIKUDAGUR 24. SEPTEMBER 2003 MORGUNBLAÐIÐ
bílar
FORRÁÐAMENN Ingvars Helgasonar
og Bílheima sem skipulagt höfðu ferð
eigenda jeppa frá Isuzu og Nissan í
Þórsmörk sl. laugardag fóru að ráðum
Veðurstofunnar og frestuðu för. Það
gerðu reyndar velflestir sem höfðu
ráðgert þátttöku en á sunnudags-
morgni mættu nærri 20 jeppaeigend-
ur við höfuðstöðvar umboðanna og var
hópurinn drifinn í aðra för og styttri en
erfiðari og fjölbreyttari. Var ekið úr
Mosfellsdalnum milli Móskarðshnjúka
og Skálafells yfir í Kjós, um Svínaskarð
og niður í Svínadal Kjósarmegin.
Leiðin liggur nokkuð hátt milli
fjallanna og er víða bratt af slóðinni
niður í gil og árfarvegi. Er næsta víst
að útsýni er stórbrotið á þessu svæði
en það var nokkuð stopult þennan
sunnudagsmorgun í roki og nokkrum
slydduhraglanda. Þó birti upp þegar á
leið og bjart var að sjá niður í Svínadal-
inn.
Fyrst farin á bíl 1930
Í árbók Ferðafélags Íslands 1985
kemur fram að Vígmundur Pálsson,
mjólkurbílstjóri og síðar bóndi, hafi
brotist þessa leið ásamt félögum sín-
um í fólksbíl árið 1930. Þá höfðu menn
ekki einu sinni látið sér detta í hug að
fara með hestvagna um Svínaskarð.
En síðan er mikið vatn runnið til sjávar
og nútíma jeppamönnum þykir slóðin
áhugaverð.
Svínaskarðleið hefur nánast allt til
að bera sem reynir á farartækin og
kannski ekki síður á ökumennina. Hún
er brött á köflum, langir kaflar eru
mjög stórgrýttir og grófir þar sem fara
verður með gát og víða þarf að þræða
hægt og varlega um gilskorninga.
Sums staðar er betra að fá einhvern til
að standa úti og leiðbeina ökumanni
þar sem grjótið getur skagað upp úr
miðri slóðinni og hætt við að það rek-
ist uppundir bílinn. Það er líka bara
öruggara og óþarfi að skemma nokk-
uð.
Skemmst er frá að segja að allt
gekk ferðalagið vel hjá hópnum. Farið
var rólega og örugglega yfir allar
torfærur og hvort sem bílar hétu Isuzu
eða Nissan og voru óbreyttir eða mikið
hækkaðir var þeim mjakað fetið og
víða stoppað og myndað. Með í för
voru vanir menn sem leiðbeindu
ökumönnum yfir mestu hindranirnar.
Þjálfun í óbyggðaakstri
Forráðamenn umboðsins og þátt-
takendur voru ánægðir í leiðarlok. Hér
reyndi mun meira á ökulagni en á til-
tölulega greiðfærum vegi í Þórsmörk
nema hvað þarna voru aðeins sprænur
en engar vatnsmiklar ár eins og þar.
Þær bíða næstu ferðar. Ferðir sem
þessar eru vel til þess fallnar að auka
jeppaeigendum færni og þjálfun í
akstri um óbyggðir og ófærur þar sem
menn geta borið saman bækur sínar
og velt vöngum yfir því hversu mikið
óhætt er að bjóða bílunum – sem oft er
meira en menn halda og jafnvel meira
en eigendur þeirra hafa trú á.
Morgunblaðið/jt
Víða þurfti að fá hjálparmenn til að leiðbeina þegar stórgrýtið ætlaði að ógna
undirvagninum.
Torfarin jeppaleið
um Svínaskarð
Morgunblaðið/jt
Brattara var norður af Svínaskarðsleiðinni og þurfti að fara þar fetið á mjórri og
stórgrýttri slóðinni.
joto@mbl.is
SAMEINAÐUR rútubíla-
floti Kynnisferða eftir að
fyrirtækið keypti allt
hlutafé í Austurleið-SBS er
nú yfir 50 bílar af ýmsum
stærðum og gerðum. Fyr-
irtækið er eitt hið stærsta í
sinni grein en bílar Kynn-
isferða hafa síðustu árin ek-
ið að meðaltali kringum
tvær milljónir kílómetra ár-
lega og floti Austurleiðar-
SBS um 1.800 þúsund km.
Stefán Eyjólfsson, fram-
kvæmdastjóri Kynnisferða, segir í
samtali við Morgunblaðið að með
samrekstri fyrirtækjanna náist hag-
ræðing varðandi yfirstjórn og ýmsa
aðra þætti í rekstrinum en fyrirtækin
eru ennþá rekin undir báðum nöfn-
um. Hann gerir ráð fyrir að um ára-
mótin muni Kynnisferðir kaupa bíla-
flota og tæki Austurleiðar-SBS og
nafn Kynnisferða ná yfir allan rekst-
ur beggja fyrirtækjanna í dag.
Mikilvægt að geta
endurnýjað reglulega
Meðalaldur bíla Kynnisferða er í
dag tæplega 7 ár en bílafloti Austur-
leiðar-SBS er heldur eldri eða kring-
um 10 ár. Stefán segir mjög mikil-
vægt að geta endurnýjað bílana
reglulega. Undir það tekur Bjarni
Birgisson, rekstrarstjóri fyrirtækis-
ins, og fylgjast þeir reglulega með því
sem í boði er á rútumarkaði, bæði nýj-
um og notuðum bílum, og segja þeir
einnig mikilvægt að sækja sýningar
öðru hvoru til að sjá hvað er að gerast
í greininni.
Stefán segir stjórnvöld hafa auð-
veldað hópferðaleyfishöfum endur-
nýjun bílanna með því að lækka virð-
isaukaskatt af bílunum í 8%. Segir
hann það mjög mikilsverða viðleitni
enda sé það brýnt að geta boðið sem
nýjasta og besta bíla. Ferðaheildsal-
arnir, hvort sem þeir eru íslenskir eða
erlendir, spyrji orðið beinlínis um
hver sé meðalaldur bíla hópferðafyr-
irtækjanna.
Fjórir nýir bílar í vor
Kynnisferðir keyptu síðastliðið vor
fjóra bíla, þrjá nýja og einn notaðan,
alla af gerðinni Mercedes Benz enda
má segja að fyrirtækið hafi lengst af
notað bíla af þeirri gerð. Keyptir voru
tveir af gerðinni Sprinter, 19 farþega
bílar og er annar þeirra í eins konar
lúxusútgáfu. Hann er með leður-
klæddum sætum, DVD-spilara og
meira er lagt í innréttingu og aðbúnað
en í öðrum bílum fyrirtækisins af
þessari stærð. Stefán segir þetta þýða
að bíllinn sé eftirsóttur af ýmsum sér-
hópum sem vilji sérstaklega góða og
þægilega bíla og þannig nýtist hann í
sérstök verkefni. Bíllinn kostaði
kringum 9 milljónir króna.
Þá keypti fyrirtækið í vor tvær
stórar rútur, aðra nýja og 53 farþega,
Intouro, sem smíðað var yfir í Tyrk-
landi og hina notaða frá Þýskalandi
og segir Stefán hana vera flaggskip
Kynnisferða. Er hún af gerðinni Tra-
vego og tekur 49 farþega. Settar voru
tvær nærri 10 ára gamlar rútur upp í
kaupverðið sem var um 20 milljónir.
Stefán Eyjólfsson segir að ýmis
hagræðing hafi orðið í rekstrinum
með sameiningu Kynnisferða og
Austurleiðar-SBS, einkum með
breytingum á yfirstjórn en starfs-
menn Austurleiðar-SBS eru lang-
flestir í störfum sínum áfram. Verk-
stæði er enn rekið bæði í Reykjavík
og Selfossi og er til skoðunar að reisa
fyrirtækinu nýja aðstöðu skammt frá
núverandi höfuðstöðvum Kynnisferða
við Vesturvör í Kópavogi.
Morgunblaðið/jt
Nýjustu bílar Kynnisferða eru af gerðinni Mercedes-Benz, Sprinter lengst til vinstri en keyptir voru tveir slíkir í vor, flaggskipið Travego og síðan Intouro.
Aka yfir þrjár
milljónir kíló-
metra á 54 rútum
Stefán Eyjólfsson, framkvæmdastjóri Kynnisferða, segir að öryggisbelti séu í
öllum bílum fyrirtækisins nema einum frá Austurleið-SBS. Bjarni Birgisson
rekstrarstjóri situr fyrir aftan Stefán.
Nýtt merki Kynnisferða var tekið upp í sumar og
bílaflotinn málaður upp á nýtt.