Morgunblaðið - 29.09.2003, Blaðsíða 6
FRÉTTIR
6 MÁNUDAGUR 29. SEPTEMBER 2003 MORGUNBLAÐIÐ
Ferðir Blóðbankabílsins:
Þriðjudagur 23. september Háskóli Íslands við Odda 9.00-15.00
Miðvikudagur 24. september hjá Alcan í Straumsvík. 9.00-15.00
www.blodbankinn.is
NÁLÆGT sjötíu börn mættu í Fjöl-
skyldu- og húsdýragarðinn í gær til
þess að taka þátt í skákmóti fyrir
nemendur úr fyrsta til sjötta bekk
grunnskóla.
Mótið er liður í keppni sem tafl-
félagið Hrókurinn og Húsdýra-
garðurinn standa fyrir í vetur.
Keppt var í fjórum flokkum og var
hart barist á öllum vígstöðvum.
Annað mót þessarar keppni fer
fram í október. Í frétt frá Hróknum
kemur fram að öllum börnum á
þessum aldri er boðið að taka þátt.
Morgunblaðið/Kristinn
Sjötíu börn að tafli
NÚ bíða 146 einstaklingar sem lokið hafa með-
ferð á Landspítala – háskólasjúkrahúsi á legu-
deildum eftir varanlegri vistun utan spítalans. Er
þetta um 50% fjölgun frá því sem verið hefur
undanfarin ár. Margir bíða eftir plássi á dvalar-
og hjúkrunaheimilum fyrir aldraða. Lækninga-
forstjóri spítalans segir að ef þetta rými losnaði
mætti fjölga aðgerðum svo biðlistum yrði nánast
eytt.
Biðlistar eftir þjónustu á Landspítala – há-
skólasjúkrahúsi hafa styst í flestum sérgreinum,
ef borið er saman við sama tíma fyrir ári, að því
er fram kemur í greinargerð framkvæmdastjóra
fjárreiðna og upplýsinga, Önnu Lilju Gunnars-
dóttur, með stjórnunarupplýsingum fyrstu sjö
mánaða ársins. Meðal annars hefur náðst að
stytta bið eftir bæklunarlækningum enda hefur
aðgerðum fjölgað um rúm 5% frá síðasta ári.
Tvöfalt fleiri bíða eftir
skurðaðgerð vegna offitu
Aftur á móti hafa biðlistar lengst í tveimur sér-
greinum skurðlækninga, almennum skurðlækn-
ingum og augnlækningum. Nú bíða liðlega 1.200
einstaklingar eftir skurðaðgerð á augasteini en
til samanburðar má geta þess að á öllu síðasta ári
voru gerðar þannig aðgerðir á 1.179 sjúklingum.
Innan almennra skurðlækninga er aðallega bið
eftir aðgerðum vegna vélindabakflæðis og þind-
arslits og eftir skurðaðgerð á maga vegna offitu.
Liðlega 350 einstaklingar bíða eftir skurðaðgerð
vegna vélindabakflæðis og þindarslits. Er það
heldur minna en á sama tíma í fyrra en ef miðað
er við fjölda aðgerða á síðasta ári tekur nærri því
tvö ár að vinna þennan biðlista upp þótt engir ný-
ir sjúklingar bætist við á þeim tíma.
Gríðarleg aukning hefur orðið í eftirspurn eftir
skurðaðgerðum á maga vegna offitu. Nú bíða 225
einstaklingar eftir aðgerð af því tagi og er það
meira en tvöföldun frá sama tíma á síðasta ári.
Hins vegar voru einungis um 50 slíkar aðgerðir
framkvæmdar á öllu síðasta ári.
Jóhannes M. Gunnarsson, framkvæmdastjóri
lækninga, segir að offita sé mjög vaxandi vanda-
mál og þá hafi aukin umræða í fjölmiðlum um
þennan möguleika leitt til aukinnar eftirspurnar.
Einnig hafi þróun í aðgerðatækni sem geri þess-
ar aðgerðir, eins og margar aðrar, léttari og
öruggari aukið áhuga fólks á að gangast undir
þær.
Dýrari pláss og verri
Anna Lilja Gunnarsdóttir vekur í greinargerð
sinni sérstaka athygli á mikilli fjölgun einstak-
linga á biðlistum eftir varanlegri vistun utan spít-
alans. Er þetta fólk sem lokið hefur meðferð en
ekki tekst að finna rétt pláss fyrir. Nú eru 146
einstaklingar á þessum lista en voru 119 á sama
tíma á síðasta ári og Jóhannes Gunnarsson bend-
ir á að á undanförnum árum hafi gjarnan verið 80
til 110 á biðlistum eftir varanlegri vistun. Margt
af þessu fólki er aldrað og þarf að komast á dval-
ar- eða hjúkrunarheimili en einnig er þar ungt
fólk sem lent hefur í alvarlegum slysum eða veik-
indum og geðfatlaðir einstaklingar.
Jóhannes segir að þessi fjölgun komi svo sem
ekki óvænt. Hjúkrunarrýmum á höfuðborgar-
svæðinu fjölgi svo hægt að ekki hafist undan.
Nefnir hann að spítalinn hafi bundið vonir við að
Vífilsstaðahúsið yrði tekið fyrr í notkun en það
verði ekki fyrr en eftir áramót. Þótt spítalainn
eigi þar ákveðinn forgang muni varla sjást högg á
vatni þegar Vífilsstaðir opni. Segir Jóhannes að
unnið sé að stækkun heimila en á móti komi að
rúmum fækki á eldri stofnunum þegar þau fái
eðlilega endurnýjun.
„Rýmisins vegna gætum við nánast eytt öllum
biðlistum eftir aðgerðum á spítalanum ef við
hefðum þessi legupláss. Við höfum skurðstofurn-
ar tilbúnar og fasti kostnaðurinn er sá sami þótt
við fjölgum aðgerðum,“ segir Jóhannes og bætir
því við að ekki megi gleyma því að notkun á
sjúkrarúmum spítalans sé mun dýrari og verri
fyrir þetta fólk en pláss í viðeigandi umhverfi.
146 sjúklingar á Landspítala bíða eftir varanlegri vistun utan sjúkrahússins
Gætu nánast eytt öllum
biðlistum á spítalanum
„VIÐ ætlum að fylgjast með
þessum hræringum og ef við
getum átt einhverja aðild að því
að halda þessu í sem farsælleg-
ustum farvegi fyrir okkur, þá
reynum við það,“ segir Magnús
Jónsson, sveitarstjóri á Skaga-
strönd, um hugsanlegar breyt-
ingar sem kunna að verða á
Brimi, sjávarútvegsstoð Eim-
skipafélagsins, í kjölfar nýlegra
breytinga á eignarhaldi félags-
ins.
Dótturfélög Brims eru Út-
gerðarfélag Akureyringa, Har-
aldur Böðvarsson og Skag-
strendingur, en allt atvinnulíf á
Skagaströnd byggist á Skag-
strendingi, að sögn Magnúsar.
Hann segir að Skagstrendingar
viti ekki hvað sé í spilunum
varðandi Brim. „Við höfum
enga sérstaka ástæðu til að
ætla að þetta sé gert okkur til
miska eða verði okkur til miska.
Það hafa vissulega komið fram
yfirlýsingar um það að sjávar-
útvegssviðinu verði skipt upp
að einhverju leyti en það hafa
verið yfirlýsingar sem hafa
kannski ekki komið frá þeim
sem munu endanlega útkljá
það. Menn segja ýmislegt í hita
leiksins og ef sjávarútvegssvið-
inu verður skipt getur það
táknað ýmislegt fyrir okkur.
Við þurfum þá að huga að því
hvernig við bregðumst við því.“
Vissulega ástæða
til að óttast
Magnús segir að vissulega sé
alltaf ástæða til að óttast um
kvótann, en það sé tilgangs-
laust að spá í framtíðina eða
velta sér upp úr henni.
„Ég hef ekki trú á því að
menn fari að hlaupa upp til þess
að gera eitthvað sem er óhag-
kvæmt eða óskynsamlegt. Ég
hef trú á því að þeir sem höndla
með þetta muni huga vel að því
að hlutirnir séu gerðir af fyllstu
skynsemi og það er okkar von
að þeir standi með okkur því
hér er verið að reyna að vinna
hlutina af skynsemi og
ábyrgð.“
Gísli Gíslason, bæjarstjóri á
Akranesi, sagði í Morgun-
blaðinu á laugardag að íbúar á
Akranesi væru á varðbergi
gagnvart hugsanlegum áhrif-
um sem fylgdu breyttu eignar-
haldi á Brimi.
Sveitarstjóri
Skagastrandar
Trúir að
menn geri
þetta af
skynsemi
HÁTT í þrjú þúsund manns var við
að draga sundur á sjöunda hundrað
hross í Laufskálarétt í Hjaltadal á
laugardag. Allt fór vel fram, að sögn
lögreglunnar.
Til Laufskálaréttar eru rekin
hross bænda úr Hjaltadal og Viðvík-
ursveit sem ganga á sumrin á afrétti
á Kolbeinsdal og einnig hross sem
smalað er í landi Ásgarðs. Hross-
unum fækkar heldur en alltaf bætist
við mannskapinn sem kemur til rétt-
ar enda eru réttirnar einn af stærstu
viðburðum ársins í Skagafirði.
Lögreglan á Sauðárkróki áætlar
að hátt í þrjú þúsund manns hafi
verið við Laufskálarétt að þessu
sinni en það er með því mesta sem
sést hefur, ef ekki það mesta. Þrátt
fyrir fólksmergðina gengu réttar-
störfin vel. Þeir sem ekki voru við
sundurdráttinn fengu útrás í söng
og gleði og tóku sumir vel á því. Þó
fór allt vel fram. Einnig á afar fjöl-
mennum dansleik sem fram fór í
reiðhöllinni á Sauðárkróki um kvöld-
ið en lögreglan telur að nálægt 1500
manns hafi verið á ballinu.
Vel tekið á
því í Lauf-
skálarétt
Morgunblaðið/Sigurður Sigmundsson
Ólafur Sigurgeirsson bóndi á Kálfsstöðum hugar að marki í Laufskálarétt. Fjöldi fólks fylgdist með réttarstörfum.