Morgunblaðið - 03.10.2003, Page 4
4 | FÓLKIÐ | FÖSTUDAGUR 3|10|2003 MORGUNBLAÐIÐ
Hún vissi alveg hvað hún var að fara út í. Þetta var einmitt á
þeim tímapunkti í ævi hennar þar sem hún hafði svo mikla þörf
fyrir að sannreyna hversu huguð og sjálfstæð hún væri. Nicole
Kidman var nýbúin að slíta samvistum við Tom Cruise þegar
hún ákvað að taka að sér aðalhlutverkið í næstu mynd þessa
skrítna en sjóðheita Dana sem þá var nýbúinn að fá Gull-
pálmann í Cannes fyrir Myrkradansarann og gera söngkonuna
Björk að kvikmyndastjörnu. „Ég féll gjörsamlega fyrir Brim-
broti og lét þess getið í einhverju viðtali að ég vildi gjarnan
vinna með honum. Þegar ég fékk þau boð að hann væri búinn
að skrifa handa mér hlutverk, gat ég ekki annað en látið slag
standa.“ Umrætt handrit var fyrir myndina Dogville sem er sú
fyrsta í nýjum þríleik Lars Von Triers og er frumsýnd í dag á
Kvikmyndahátíð Eddunnar í Regnboganum. Önnur myndin á að
heita Mandalay og sú þriðja Wasington, með engu h-i. Mið-
punktur allra verður Grace, sú sem Von Trier skrifaði fyrir Kid-
man. Í þeirri fyrstu er hún á flótta og leitar skjóls í smábænum
Dogville, þar sem íbúar eru þröngsýnir og þverir – rétt eins og
Von Trier sjálfur sér einmitt bandarísk yfirvöld.
„Ég viðurkenni að þegar ég sá leikmyndina teiknaða á senu
þar sem öll myndin átti að vera leikin, þá leist mér ekki á blik-
una,“ segir Kidman. „Ekki dró úr efasemdum þegar ég sá hund
teiknaðan á gólfið og skrifað við hliðina „HUNDUR“! Svo átti
ég rogast um með einhverja hlekki! En ég ákvað að leggja allt
traust mitt á hann. Þó ekki fyrr en eftir að við héldum krísufund
og útkljáðum nokkur mál. Hreinsuðum loftið. Það er nauðsyn-
legt ólíkum listamönnum sem ætla sér að vinna saman.“
En hvernig voru samskipti þeirra Von Triers? Íslenskum
blaðamanni lék auðvitað forvitni að fá að vita það í ljósi
meintra samskiptaörðugleika Von Triers við Björk.
„Ég dæmi fólk út frá persónulegum samskiptum mínum við
það og engu öðru. Mín reynsla af Lars er mjög góð og því gæti
ég alveg hugsað mér að vinna með honum aftur.“
- „Til dæmis að Mandalay,“ grípur hinn óútreiknanlegi Von
Trier á lofti, sitjandi hjá Kidman á blaðamannafundinum.
Kidman fer greinilega hjá sér. „Þú ert að stilla mér upp við
vegg, Lars!“ segir hún, greinilega komin úr jafnvægi. „Við vor-
um búin að tala um þetta. Ég ætla að leika Grace áfram.“
- „Ég veit. Vildi bara að þau heyrðu þetta líka.“
Nýjustu fregnir herma að Kidman sé, þrátt fyrir yfirlýsingar í
Cannes, hætt við að leika í Mandalay. Beri við að vinnuálagið
sé búið að vera svo mikið að hún ætli frekar að sinna börnum
sínum. Og sannarlega hefur hún haft nóg að gera. Þrjár myndir
klárar, að undanskilinni Dogville, og þrjár aðrar væntanlegar.
Enginn tími fyrir hlekki Von Triers. |skarpi@mbl.is
Morgunblaðið/Halldór Kolbeins
NICOLE KIDM
AN