Morgunblaðið - 29.11.2003, Blaðsíða 35

MORGUNBLAÐIÐ LAUGARDAGUR 29. NÓVEMBER 2003 D 35
GUÐBJÖRG Þorsteinsdóttir leik-
skólakennari nýtur þess að gefa per-
sónulegar jólagjafir. Hún hefur í um
það bil áratug haft það fyrir reglu að
búa sjálf til flestar jólagjafirnar sem
hún gefur. Það tekur auðvitað meiri
tíma en því meiri er líka ánægjan,
jafnt hjá gefandanum sem viðtak-
andanum.
„Það hefur enginn skammað mig
fyrir þetta ennþá!“ segir Guðbjörg.
„Ég byrjaði nú á þessu af því að ég
átti ekki peninga fyrir gjöfum, leik-
skólakennarar hafa ekki mikil laun
og ég var að spara. En mér finnst
þetta líka miklu persónulegra og það
er svo gaman að fá útrás fyrir sköp-
unarkraftinn. Ég notast talsvert við
föndurbækur og fæ oft hugmyndirnar
þar en útfæri þær á minn hátt. Aðal-
lega hef ég búið sjálf til gjafir handa
systkinum mínum og foreldrum en
ég hef ekki selt þetta neinum.“
Guðbjörg er fædd og uppalin í sveit
í Borgarfirðinum en vann í nokkur ár
á Selfossi áður en hún flutti til
Reykjavíkur fyrir sex árum. Hún seg-
ist ekki hafa vanist því í æsku að
föndra og smíða, hugmyndin hafi
kviknað síðar. Hún á sex systkin og
að sjálfsögðu frænkur og frænda á
ýmsum aldri.
Nýtin og safnar afgöngum
Hún segist alltaf hafa augun hjá
sér og safnar afgöngum af ýmsu
tagi, hlutum sem annað fólk fleygir
yfirleitt án þess að velta því fyrir sér
hvort þeir hafi enn eitthvert nota-
gildi. Liti og sumt af hráefninu, til
dæmis trölladeig og gifs í smámynd-
ir, þarf hún þó að kaupa.
Framleiðslan er fjölbreytt, á borð-
inu eru jólakransar og litlar öskjur í
fallegum umbúðum utan um tvo ópal-
pakka. Sumt má hengja á tréð, ann-
að festa á gluggatjöld eða annars
staðar á heimilinu til að lífga upp.
Guðbjörg notar skurn af fjölmörgum
hnetutegundum til að búa til heils-
árskransa, einnig eru á kransinum
lystaukandi piparstangir og
kryddfræ. Grunnurinn er oasis-
plasthringur sem fæst í blómabúð-
um.
Frauðplastbolta, sem hvít, ósoðin
sagógrjón hafa verið límd á til að ná
fram fallegri áferð, má nota í jóla-
skreytingu. Tveir boltar eru líka fest-
ir saman og niðurstaðan er snjókarl.
Könglar sem tíndir eru uppi í Heið-
mörk koma að góðum notum á jóla-
trénu og síðustu árin hefur jólatréð á
Sogaveginum eingöngu verið skreytt
með heimatilbúnu jólaskrauti. Guð-
björg prjónar ullarsokka og er dugleg
við bútasaum, býr til dúka og líka
teppi handa krökkunum. Hún segir
fáfróðum blaðamanninum að búta-
saumurinn sé alls ekkert erfiður eða
seinlegur og útskýrir hvernig hún fer
að. „Maður saumar
saman ræmur af mis-
munandi lit og
munstri, klippir á milli
og rennir ræmunum til
þangað til rétta
munstrið er komið.
Það er heilmikið um
„fiff“ í þessu!“ Hún býr
einnig til litla hördúka
sem gjarnan eru lagðir
undir brauð í bast-
körfu. Þá kaupir hún
hörinn í metratali,
klippir hann niður í
hæfilega stærð og
saumar í hann skreyt-
ingu og rekur upp kant-
ana til að búa til kögur.
Ekki með próf á sög
Guðbjörg býr líka til
tauþrykk, hún smíðar
örlitla eftirlíkingu af
grindverki með snúru,
dvergvöxnum þvotta-
klemmum og kjól, hún
málar lítil skilti sem
hægt er að festa á
hurðir eða aðra staði innanhúss.
Efniviðurinn er plötur sem munu vera
gerðar úr pressuðum pappír.
Plöturnar líta út eins og þær séu úr
viði og eru reyndar sagaðar út eins
og krossviður. Bróðir Guðbjargar,
Skúli Þorsteinsson, er trésmiður og
hann sagar plöturnar á verkstæði
sínu í bílskúrnum eftir skapalóni og
fyrirmælum stóru systur. „Ég er ekki
með próf á sög!“ segir Guðbjörg.
Hún segist alltaf byrja á jólagjöf-
unum mörgum mánuðum fyrir hátíð-
ina og oft vera farin af stað um sum-
arið. Eina gjöfina á borðinu segist
hún hafa búið til þegar í maí. En nú
þarf Guðbjörg að rjúka vegna þess
að hún er í kirkjukór Óháða safnaðar-
ins og vikuleg æfing fer að byrja. Fyr-
ir kraftmikið fólk er sólarhringurinn
alls ekki of langur.
Allt jóla-
skrautið
er heima-
gert
Fígúra úr trölladeigi.
Morgunblaðið/Árni Sæberg
Guðbjörg með jólakransa.
Fígúra úr trölladeigi.
Framleiðslan er fjölbreytt. Guðbjörg notar eingöngu heimagert skraut á sitt eigið jólatré.
Máluð skilti af ýmsu tagi.
Engjateigi 5, sími 581 2141