Morgunblaðið - 20.12.2003, Blaðsíða 40

LISTIR
40 LAUGARDAGUR 20. DESEMBER 2003 MORGUNBLAÐIÐ
Allt frá fyrsta vetri sínumhefur KammersveitReykjavíkur haldið jóla-tónleika í desem-
bermánuði þar sem leikin er tónlist
frá barokktímanum. Tónleikar
Kammersveitarinnar í Áskirkju á
morgun kl. 17 verða að þessu sinni
helgaðir J.S. Bach, því Rut Ingólfs-
dóttir, sem frá upphafi hefur verið í
forsvari bæði sem fiðluleikari og
sem formaður Kammersveitarinnar,
ætlar að leika uppáhaldskonsertana
sína, sem eru fjórir fiðlukonsertar
eftir Bach. Með henni leika einleik
þau Daði Kolbeinsson óbóleikari og
Unnur María Ingólfsdóttir fiðluleik-
ari.
„Þetta eru þrítugustu jóla-
tónleikar Kammersveitarinnar á
jafnmörgum árum, en þeim var
strax mjög vel tekið enda finnst
fólki gott að geta komið og hlustað
á svona yndislega tónlist í jólaönn-
unum. Þegar við fórum af stað með
tónleikana á sínum tíma var mjög
lítið um tónleika í desember, en það
hefur vissulega breyst. Með árunum
hefur tónleikahaldið í desember
aukist svo mikið að það kemst eng-
inn lengur yfir að sækja þá alla.
Áherslan er þó enn að mestu á
söng- og kórtónlist og í raun fáir
tónleikar með hljóðfæratónlist,“
segir Rut Ingólfsdóttir.
Að sögn Rutar hefur fjölda tón-
listarmanna gefist tækifæri til að
spila einleik með lítilli hljómsveit á
jólatónleikum Kammersveitarinnar
í gegnum tíðina. „Jólatónleikarnir,
sem og aðrir tónleikar okkar, hafa
verið góður vettvangur fyrir fólk til
að koma fram sem einleikarar. Á
síðustu árum höfum við oft boðið
ungu fólki, sem t.d. er nýkomið
heim úr námi, að leika einleik á
jólatónleikum okkar. Í ár langaði
mig hins vegar til að leika þessa
uppáhaldskonserta mína.“
Aðspurð hvers vegna barokk-
tónlist hafi orðið fyrir valinu sem
viðfangsefni jólatónleika Kamm-
ersveitarinnar svarar Rut því til að
tónlistin hafi strax hitt í mark hjá
áheyrendum. „Enda líður fólki svo
vel af að hlusta á barokktónlist,
ekki aðeins á sál heldur einnig lík-
ama. Þannig hefur verið sannað vís-
indalega að fólki líður vel af því að
hlusta á þessa tegund tónlistar, m.a.
sökum þess hve jafn rytminn er í
verkunum, sérstaklega í hægu köfl-
unum sem eru í hjartsláttarhraða. Í
áranna rás höfum við leikið verk
eftir ýmis tónskáld barokktímans,
en ástæða þess að við leikum verk
eftir Bach að þessu sinni er að hann
er mestur allra meistara og þegar
maður ætlar virkilega að hafa mikið
við þá liggur beint við að spila verk
eftir hann.“
Tónleikarnir orðnir hluti af
jólaundirbúningnum
En meðlimir Kammersveit-
arinnar hafa ekki aðeins verið að
æfa fyrir tónleika morgundagsins
því á síðustu dögum hafa farið fram
upptökur í Áskirkju á efnisskrá tón-
leikanna. Að sögn Rutar hafa jóla-
tónleikar Kammersveitarinnar
nokkrum sinnum verið teknir upp.
„Fyrir tíu árum, í tilefni af tuttugu
ára afmæli Kammersveitarinnar,
gáfum við út diskinn Jólatónleikar
Kammersveitarinnar. Brand-
enborgarkonsertarnir, sem við
fengum frábæra dóma fyrir í Bret-
landi nú í haust og nýverið voru til-
nefndir til Íslensku tónlistarverð-
launanna, voru þannig teknir upp
og fluttir á jólatónleikum okkar fyr-
ir nokkrum árum. Fyrir þremur ár-
um fluttum við allar hljómsveit-
arsvítur Bachs á jólatónleikum og
tókum í framhaldinu upp og von-
andi koma þær út á næsta ári.
Þannig má segja að við séum með
nokkurs konar útgáfuröð tileinkaða
Bach.“
Spurð hvort jólatónleikarnir séu
ekki nánast orðnir hluti af jólaund-
irbúningnum hjá henni svarar Rut
því játandi. „Það fer ekki á milli
mála að í þrjátíu ár hefur desem-
bermánuður verið markaður hjá
mér af jólatónleikum Kammersveit-
arinnar. En þetta er einstaklega
gefandi starf, enda mjög góður og
samstilltur hópur sem starfar með
Kammersveitinni. Þetta er ynd-
islegt fólk sem vill virkilega leggja
sitt af mörkum til þess uppbygging-
arstarfs sem Kammersveitin hefur
unnið og tekur þátt í þessu af glöðu
geði þannig að það er alltaf líka
mjög gaman hjá okkur.“
Rut Ingólfsdóttir leikur uppáhaldsfiðlukonserta sína í Áskirkju
Bach mestur allra meistara
Kammersveit Reykjavíkur leikur í Áskirkju á morgun, sunnudag, kl. 17. Einleikar tónleikanna eru Unnur María
Ingólfsdóttir, Rut Ingólfsdóttir, sem verið hefur formaður sveitarinnar frá upphafi, og Daði Kolbeinsson.
silja@mbl.is
Morgunblaðið/Jim Smart
HÖFUNDUR Íslands eftir
Hallgrím Helgason hefur hlotið
góðar viðtökur hjá ítölskum
gagnrýnendum. Gagnrýnandi
Il Manifesto segir að Hallgrím-
ur hafi ekki aðeins skrifað
„lærða, djúpa og skemmtilega
skáldsögu“ heldur ekki síður
nýtt sér skyndilega frægð til að
senda frá sér bók sem annars
hefði ekki
komið út
vegna lögmála
markaðarins –
„bók sem get-
ur vakið for-
vitni á óhefð-
bundinni sýn á
landinu og lítt
þekktum rit-
höfundi.“
Í dagblaðinu
La Gazzetta di
Parma sagði að Höfundur Ís-
lands væri „tímalaus skáld-
saga, sem segir frá því hlut-
skipti og þeirri bölvun að vera
rithöfundur“.
Gagnrýnandi Avanti! della
domenica skrifar að Höfundur
Íslands sé „óvænt og velkomin
bók, sjaldgæf, óborganleg,
prýðileg og forvitnileg skáld-
saga.“
Óskammfeilinn stíll
Il Segnalibro birti dóm um
bókina þar sem sagði að bókin
væri heildstætt verk sem um-
lykti allan hinn íslenska veru-
leika „með vísun til fornra
sagna og hefða, og beygði hann
undir óskammfeilinn stíl sem
fer út á ystu nöf. Og frásagn-
armáti sögunnar túlkar lita-
dýrð, hrynjandi og andrúmsloft
landsins.“
Netmiðillinn stradanove.net
birti líka umsögn um Höfund
Íslands sem sagði að þetta væri
„óhefðbundin skáldsaga, frá-
bær bók til að uppgötva land og
höfund.“
„Óvænt og
velkomin
bók“
Hallgrímur
Helgason