Morgunblaðið - 30.12.2003, Blaðsíða 6

FRÉTTIR
6 ÞRIÐJUDAGUR 30. DESEMBER 2003 MORGUNBLAÐIÐ
KVEIKT verður í áramótabrennum
kl. 20:30 á gamlárskvöld víða í
Reykjavík. Treglega gekk að safna í
bálkesti í gær vegna ófærðar, en
þeireru reistir í samstarfi við Eld-
varnareftirlit og sækja þarf um
brennuleyfi hjá lögreglunni í
Reykjavík.
Ekki er heimilt að setja hvað sem
er í brennur en almenningi er frjálst
að koma með ýmislegt úr fórum sín-
um sem ekki er hættulega meng-
andi. Kjósa því margir að farga
drasli sínu á áramótabrennu og sjá
logana gleypa jafnvel heilu eldhús-
innréttingarnar og kyrja um leið
Máninn hátt á himni skín. Að þessu
sinni er spáð rigningu á gamlárs-
kvöld en votviðrið eitt ætti þó ekki
að skemma fyrir brennuglöðu fólki,
sem upp til hópa hefur það fyrir
fastan sið að sækja brennur í sínu
hverfi, sýna sig og sjá aðra.
Æskilegasta brennuefni er ómeð-
höndlað timbur, pappi og pappír.
Óheimilt er að brenna gagnfúavarið
timbur, plast og gúmmíefni svo sem
plastkassa, fiskikör, netaafskurð,
bíldekk og spilliefni.
Lögreglan í Reykjavík vekur at-
hygli fólks á því að vera ekki með
skotelda við brennur, enda getur
notkun skoteldanna verið varasöm
þar sem margir safnast saman. Við
brennur þarf að sýna ýtrustu var-
kárni engu síður en annars staðar.
Enginn má versla með skotelda í
smásölu nema hann hafi til þess
leyfi frá hlutaðeigandi lögreglu-
stjóra. Skotelda má ekki selja til
unglinga yngri en 16 ára. Öll sala á
skoteldum til barna yngri en 12 ára
er óheimil nema annars sé sérstak-
lega getið.
Fullorðið fólk þarf að hafa vit fyr-
ir börnunum og gæta þess að þeim
stafi ekki hætta af skoteldum og
blysum. Börnin geta stundum orðið
áköf, vilja gleyma sér við spennandi
aðstæður og ganga þá stundum
lengra en æskilegt er.
Lögreglan hvetur fólk þá til að
gæta hófs í áfengisneyslu og for-
eldra til að gleyma ekki börnum sín-
um svo flestir megi eiga ánægjuleg
áramót. Hverjum og einum má einn-
ig vera ljóst að meðferð áfengis og
notkun skotelda og blysa fer alls
ekki saman.
Tekið á móti efni
fram á gamlársdag
Söfnun í áramótabrennur hófst í
gær og verður tekið á móti efni þar
til bálkestir eru orðnir hæfilega
stórir eða í síðasta lagi kl. 14 á gaml-
ársdag. Tveir til þrír starfsmenn frá
hverfabækistöðvum Gatnamálastofu
verða á vakt fram á gamlársdag og
taka á móti efni. Bálkestir verða síð-
an vaktaðir fram til 20:30 á hverjum
söfnunardegi.
Um hádegi á morgun verður olía
sett á bálkesti og frá þeim tíma
verður einn starfsmaður á vakt fram
til kl. 20:30, en þá verður kveikt í
bálköstunum. Frá kl. 20:30 til mið-
nættis verður brennustjóri ásamt
aðstoðarmanni á vakt til miðnættis.
Gert er ráð fyrir að 4 vatnsbílar fari
út um kl. 2 aðfaranótt nýársdags og
hefji slökkvistarf.
Bálkestir rísa víða í Reykjavík
Morgunblaðið/RAX
MEÐ upptöku neta er hægt að auka
verulega arðsemi vatnasvæðis Ölfus-
ár og Hvítár í Árnessýslu og þar með
tekjur veiðiréttarhafa og annarra
sem tengjast sölu veiðileyfa og þjón-
ustu. Með því að hætta netaveiðum
og taka alfarið upp stangveiði má allt
að tífalda tekjur af laxi, eða úr 500
krónum kílóið fyrir netalax í 5.000 kr/
kg fyrir stangveiddan lax.
Þetta er ein helsta niðurstaða loka-
verkefnis nokkurra nemenda í verk-
efnastjórnun og leiðtogaþjálfun við
Endurmenntunardeild Háskóla Ís-
lands. Verkefnið miðaði að því að
kanna hvort hægt væri að auka arð-
semi vatnasvæðisins með upptöku
neta og seiðasleppingum með kvía-
aðferð. Einnig var ætlunin að kanna
viðhorf og væntingar veiðiréttarhafa
og stangveiðifélaga.
Verkefnavinnan fólst í því að safna
upplýsingum, m.a. með viðtölum við
ellefu einstaklinga; hagsmunaaðila,
menn með reynslu af sambærilegum
verkefnum annars staðar og með
þekkingu á stangveiðimarkaðnum.
Einnig var viðhorf meðal 182 veiði-
réttarhafa á svæðinu kannað í þeim
tilgangi að fá fram hug þeirra til þess
að netaveiði yrði hætt, stangaveiði
tekin upp og laxagengd aukin með
seiðasleppingum.
Niðurstaða þessarar viðhorfskönn-
unar, þar sem svarhlutfallið var 67%,
var að 55% þeirra sem svöruðu vildu
að netaveiði yrði hætt, 40% vildu það
ekki og 5% voru hlutlaus eða óákveð-
in. Er spurt var um seiðasleppingar
með kvíaaðferð á vatnasvæðinu vildu
83% svarenda taka upp þá aðferð,
13% vildu það ekki og 4% voru hlut-
laus eða óviss. Þá töldu 57,4% svar-
enda að tekjur sínar myndu aukast
við upptöku neta og með seiðaslepp-
ingum, 32% töldu svo ekki gerast og
10,6% voru óviss.
Þau sem unnu verkefnið; Helga
Jónsdóttir, Hulda Bergvinsdóttir,
Kristín Lára Ólafsdóttir, Sigurður
Jónsson og Steinar Jónsson, telja að
upptaka neta sé lykilatriði til að ná
arðseminni fram. Veiðifélag Árnes-
inga gegni lykilhlutverki í því sam-
bandi að ná samstöðu og samningum
um það. Miðað við gefnar forsendur
aukist arðsemin mest við upptöku
netanna og sé grunnur að stóraukinni
fiskirækt og fiskgengd á svæðinu sem
skapi mikinn arð. Taka nemendurnir
undir með einum viðmælanda sínum
sem sagði að þetta væri „stærsta
tækifærið í íslenskri laxveiðisögu.“
Viðkvæmt mál
Netaveiði á vatnasvæði Ölfusár og
Hvítár hefur verið viðkvæmt mál í
gegnum tíðina og skiptar skoðanir
verið uppi meðal neta- og stangveiði-
manna. Þetta birtist m.a. í því að for-
maður Veiðifélags Árnesinga svaraði
ekki spurningum sem honum voru
sendar, gjaldkeri félagsins neitaði
viðtali við nemendurna og hið sama
gerði einn netabóndi.
Morgunblaðið/Brynjar Gauti
Netaveiði í Ölfusá og Hvítá hefur snarminnkað á undanförnum árum og er nú ekki nema um 20% af því sem hún var
árin 1972–1980, og hefur stangveiði einnig minnkað. Hægt er að auka tekjur af þeim með því að hætta netaveiðum.
Unnt að tífalda veiðitekjur
LÖGREGLAN í Reykjavík vekur
sérstaka athygli á því bannað er
að nota skotelda að nóttu til fram
til 6. janúar að nýársnótt undan-
skilinni. Eftir þrettándann, 6. jan-
úar, eru skoteldar alfarið bann-
aðir, hvort heldur er að degi eða
nóttu.
Lögreglan segist munu fylgja
þessu banni fast eftir og hvetur
fólk til þess að virða bann um að
skjóta engum skoteldum upp eftir
miðnætti og fram til klukkan níu á
morgnana næstu daga. Nýársnótt
er því eina nóttin þar sem skot-
eldar eru leyfilegir.
Undanfarin ár hefur mikið verið
kvartað við lögregluna undan sí-
felldri skoteldanotkun að næt-
urlagi með tilheyrandi hávaða og
hefur nú verið brugðist við með
því að banna slíkt.
Skoteldar bannaðir
að næturlagi
ÞREMUR jeppamönnum á þremur
jeppum var komið til aðstoðar í fyrri-
nótt skammt austan við Landmanna-
laugar. Mennirnir voru á sínum
jeppanum hver og völdu sér Fjalla-
baksleið af Breiðbaki í Laugar. Það
er nokkuð algeng leið úr austri í
Laugar, en færið reyndist ferðalöng-
unum of þungt og fjórhjóladrifið í
einum jeppanum bilaði. Fjórir björg-
unarsveitarmenn frá Dagrenningu á
Hvolsvelli og Flugbjörgunarsveit-
inni Hellu fóru til aðstoðar á og
komu mönnunum á greiðan veg svo
þeir urðu sjálfbjarga. Þeir voru á
Toyota, Isuzu og Musso jeppum og
vel búnir að sögn Jóns Her-
mannssonar vettvangsstjórnanda.
Útkallið kom kl. 23 á sunnudags og
lauk aðgerðum kl. 8 í gærmorgun.
Jeppamönnum við
Laugar hjálpað
GRUNUR leikur á að flugeldur
hafi orsakað eldsvoða í gamla Ís-
bjarnarhúsinu á Seltjarnarnesi í
fyrrakvöld. Rannsókn á tildrögum
eldsvoðans stendur yfir hjá lögregl-
unni í Reykjavík.
Rannsóknin nær einnig til þess
gífurlega magns af bensíni sem
geymt var í húsnæðinu í trássi við
reglur.
Um eitt þúsund lítrar voru
geymdir þar á brúsum og stenst
slíkt ekki byggingarreglugerð nr.
441/1998. Samkvæmt henni verður
að geyma eldfim efni í sérstökum
brunahólfum og varðar brot á
reglugerðinni sektum eða varðhaldi.
Búið er að fjarlægja bensínið og
rannsakar lögreglan hvernig á því
stóð að því var komið fyrir í jafn-
miklum mæli og raun ber vitni. Þá
var mikið af flugeldum í húsnæðinu
en þar voru öll leyfi í lagi að sögn
lögreglunnar.
Kanna bens-
ínbirgðir
ÞÓRÓLFUR Árnason borgarstjóri
segir að landrými sé mjög tak-
markað í vesturbæ Reykjavíkur og
því hafi borgin ekki á lausu lóðir
fyrir hjúkrunarheimili í þeim bæj-
arhluta. „Við höfum fengið um-
sóknir frá aðilum í Reykjavík en
höfum ekki getað brugðist við
þeim óskum.“
Fram kom í Morgunblaðinu í
gær að bæjarstjórn Seltjarnarnes-
bæjar hefði falið Jónmundi Guð-
marssyni bæjarstjóra að vinna að
áformum um byggingu hjúkrunar-
heimilis á svonefndri Lýsislóð við
Eiðsgranda. Þórólfur bendir á að
þegar einkaaðilar eigi lóðir, eins
og í tilviki Lýsislóðarinnar en hún
er í eigu Íslenskra aðalverktaka,
séu þær falar á markaðsvirði. „Það
gerir þeim aðilum, sem eru í upp-
byggingarstarfsemi fyrir ríki og
borg erfiðara fyrir, þ.e. fjárhags-
legur grundvöllur verður erfiðari,
ef þeir þurfa að kaupa lóðirnar á
markaðsvirði.“
Lóðir ekki
á lausu
♦ ♦ ♦