Morgunblaðið - 31.12.2003, Blaðsíða 48
Ólafur sagði fyrir ári þegar hannvar kjörinn íþróttamaður árs-
ins 2002 að markmiðið væri að
tryggja sér rétt til að leika á Ól-
ympíuleikunum. „Jú, jú, þegar þú
segir það þá var þetta ágætt ár hjá
manni. Við náðum að tryggja okkur
sæti á Ólympíuleikunum og það var
auðvitað aðalmarkmiðið á árinu sem
er að líða. Nú verður maður að
setja sér önnur markmið og þau eru
alveg ljós í mínum huga. Ég ætla á
Ólympíuleikana til að ná í verðlaun
og ég held að við getum það alveg.
Maður verður að setja sér slík
markmið og skilja ólympíuhugsjón-
ina eftir heima, það dugar ekki að
vera bara með. Ég held að enginn
sem vinnur til verðlauna á svona
móti leggi af stað með þá hugmynd,
að vera bara með. Menn verða að
sjá það fyrir sér áður en farið er í
keppnina að þeir ætli sér að afreka
eitthvað. Það er fyrsta skrefið,“
sagði Ólafur.
„Næsta verkefni er reyndar Evr-
ópukeppnin og hún verður að ganga
vel hjá okkur til þess að við fáum
aukið sjálfstraust fyrir Ólympíu-
leikana. Það þýðir ekkert að fara á
EM til að taka því rólega. Þetta er
sterkt mót og við förum þangað til
að gera okkar besta. Það er kannski
ekki allt undir í mótinu, en samt er
allt undir því EM er hluti af heild-
ardæminu. Það eru reyndar orðin
dálítið mörg mikilvæg mót í hand-
boltanum, árlega einhver stórmót
þannig að það er alltaf eitthvað að
stefna að. Það er dálítið öðruvísi í
mörgum öðrum greinum þar sem
stórmótin eru á fjögurra ára fresti.“
Ólafur er fyrsti handknattleiks-
maðurinn sem valinn er íþróttamað-
ur ársins tvö ár í röð. „Það er bara
flott,“ sagði hann og spurður um
hvort hann hygðist halda áfram að
vera íþróttamaður ársins, brosti
hann og sagði: „Það er auðvitað
langt frá því að vera sjálfgefið því
við eigum svo marga frábæra
íþróttamenn eins og sást hér í
kvöld. Hins vegar væri það góður
bónus í lok ársins að verða fyrir
valinu á ný – að því tilskildu auðvit-
að að við náum markmiði okkar á
Ólympíuleikunum og komum heim
með medalíu og að maður leiki þar
eins og maður.“
Íþróttamaður ársins hafði vista-
skipti í ár, færði sig frá Magdeburg
í Þýskalandi yfir til Ciudad Real á
Spáni. „Það er mjög gott að skipta
um félag og ég held það sé hverjum
manni hollt að breyta aðeins um
umhverfi stöku sinnum sé þess
kostur. Maður fær aðra vídd á
handboltann, ég er í öðru hlutverki
núna en ég var hjá Magdeburg og
maður hefur gott af því. Auk þess
er gaman að prófa eitthvað nýtt,
kynnast annarri menningu og slíkt.
Fyrir mér er þýska deildin samt
ennþá sú sterkasta í heimi. Á Spáni
eru mun fleiri leikir sem við erum
búnir að vinna fyrirfram, en leikir
sterkustu liðanna eru hörkuleikir.
Út frá handboltanum er þetta í
raun lítil breyting, þannig séð, þó
svo áherslurnar séu aðrar en í
Þýskalandi.
Eini munurinn sem maður finnur
í fljótu bragði er að menn taka sér
mun lengri tíma í að borða á
Spáni,“ sagði Ólafur.
– Finnur þú fyrir ábyrgð sem
íþróttamaður ársins?
„Já, vissulega. Fyrir mig er það í
rauninni auðvelt því ég reyni bara
að vera ég sjálfur og vona að það
dugi, ég þarf ekki að leika neitt.“
Bróðir Ólafs, körfuknattleiks-
maðurinn Jón Arnór, varð í fimmta
sæti í kjörinu og sagði Ólafur að
hann stæði sér orðið jafnfætis í lík-
amsstyrk þó ungur væri. „Við spil-
uðum oft maður á mann í körfu og
ég hafði nú oft betur, en strákurinn
er orðinn svo sterkur að ég hef ekk-
ert að gera í hann núna – ekki í
körfubolta í það minnsta. Hann er
miklu sterkari en ég og tekur fljót-
ar út þroska – hefur mikinn
sprengikraft þannig að ég ræð ekk-
ert við hann.“
Ólafur Stefánsson kjörinn Íþróttamaður ársins annað árið í röð
„Verðlaun í Aþenu
eru markmiðið“
„ÉG átti ekki von á þessu. Þetta
kom virkilega á óvart og mun
meira en í fyrra,“ sagði Ólafur
Stefánsson, landsliðsmaður í
handknattleik og leikmaður
Ciudad Real á Spáni, eftir að
kunngjört hafði verið um val
Samtaka íþróttafréttamanna á
íþróttamanni ársins 2003. Þar
varð Ólafur hlutskarpastur,
hlaut 322 stig af 380 sem í pott-
inum voru og er Ólafur fyrsti
handknattleiksmaðurinn sem
kjörinn er tvö ár í röð.
Morgunblaðið/Brynjar Gauti
Ólafur Stefánsson, Íþróttamaður ársins ásamt Kristínu Þorsteinsdóttur eiginkonu sinni og þýska
landsliðsmanninum Stefan Kretzschmar, félaga sínum frá Magdeburg, sem er í heimsókn hjá Ólafi.
■ Þeir fengu/50
ÍÞRÓTTIR
48 MIÐVIKUDAGUR 31. DESEMBER 2003 MORGUNBLAÐIÐ
OTTMAR Hitzfeld, þjálfari Bayern
München, segist engan áhuga hafa á
að taka við þjálfun enska landsliðsins í
knattspyrnu að lokinni Evrópukeppni
landsliða sem fram fer í Portúgal
næsta sumar. Enskir fjölmiðlar hafa
undanfarna daga sagt frá því að Hitz-
feld sé efstur á óskalista enska knatt-
spyrnusambandsins yfir eftirmenn
Svens Görans Erikssons, núverandi
landsliðsþjálfara, sem þráfaldlega hef-
ur verið orðaður við knattspyrnu-
stjórn hjá Chelsea.
Hitzfeld segist hafa það gott og sér
líki vel að vinna í þýskri knattspyrnu
og því sé engin ástæða til að róa á önn-
ur mið. Ekki nokkur maður frá enska
knattspyrnusambandinu hafi verið í
sambandi við sig vegna landsliðsþjálf-
arastarfsins, eftir því sem hann segir,
auk þess sem hann hefði ekki áhuga á
starfinu þótt honum stæði það til boða.
Hitzfeld hefur verið einstaklega sig-
ursæll þjálfari og eitt sinn sagði Sir
Alex Ferguson, knattspyrnustjóri
Manchester United, að Hitzfeld væri
besti knattspyrnuþjálfari í Evrópu.
Undir hans stjórn hefur Bayern Münc-
hen unnið þýska meistaratitilinn fjór-
um sinnum á fimm árum, hann stýrði
Dortmund í tvígang til meistaratitils í
Þýskalandi á tíunda áratug síðustu
aldar auk þess sem Grasshopper í
Sviss vann svissneska meistaratitilinn
undir stjórn Hitzfelds. Ýmsir hafa orð-
að hann við starf landsliðsþjálfara í
Þýskalandi að loknu heimsmeist-
aramótinu árið 2006.
Ottmar Hitzfeld langar
ekki til Englands
FORRÁÐAMENN körfuknattleiksdeildar KR hefur samið við
tvo bandaríska leikmenn og munu þeir leika með liðinu á nýju
ári. Bandaríkjamaðurinn Chris Woods sem lék með liðinu í
haust er horfinn á braut og munu þeir Trevor Diggs og Josh
Murray bætast í leikmannahóp liðsins á nýju ári. Diggs er 25
ára gamall skotbakvörður en Murray er 24 ára gamall fram-
herji.
Diggs lék tvö tímabil (1999–2001) með UNLV-háskólanum í
NCAA-deildinni í Bandaríkjunum og skoraði 15 stig í leik fyrra
tímabilið og 14,1 stig seinna tímabilið. Diggs hefur einnig spilað
með Essex Leopards London í ensku úrvalsdeildinni og síðast
með Ciudad Bolivar í Kólumbíu. Murray spilaði með IUPUI-
háskólanum í Indianapolis í NCAA-deildinni tímabilið 2002–2003
og skoraði 13 stig og tók 8 fráköst í leik. Áður var hann í Ball
State University. Bandaríkjamaðurinn Chris Woods leikur ekki
fleiri leiki með KR, honum var sagt upp störfum á dögunum en
danski bakvörðurinn Jesper Sörensen verður áfram í liði KR.
KR er sem stendur í 5. sæti í Intersportdeildinni með sjö
sigra og fjögur töp.
Trevor Diggs og Josh
Murray í raðir KR-inga
KÖRFUKNATTLEIKSFÉLAG Ísa-
fjarðar, KFÍ, hefur samið við banda-
ríska leikmanninn Shon Eilenstein en
hann er 2,06 metrar á hæð og leikur í
stöðu miðherja. Eilenstein hefur leikið
í heimalandi sínu sem atvinnumaður
og einnig í Frakklandi. Honum er ætl-
að að fylla skarð Adams Spanich sem
sagt var upp á dögunum en Spanich
skoraði mest allra í Intersportdeild-
inni. Á heimasíðu KFÍ er Eilenstein
sagður vera 114 kg að þyngd og hann
á að vera frár á fæti og geta stokkið
hátt. KFÍ er í 9. sæti Intersportdeild-
arinnar með 4 stig að loknum 11 um-
ferðum.
Shon Eilen-
stein samdi
við KFÍ
FÓLK
NORSKU knattspyrnuliðin Lyn
og Rosenborg hafa áhuga á að
semja við Jo Tessem sem verið hef-
ur í herbúðum enska úrvalsdeild-
arliðsins Southampton undanfarin
misseri. Tessem er hinsvegar ekki í
náðinni hjá Gordon Strachan knatt-
spyrnustjóra liðsins og vill Norð-
maðurinn enda feril sinn í heima-
landinu. Tessem lék með Molde
áður en hann var keyptur til South-
ampton.
JAKOB Sigurðarson landsliðs-
maður í körfuknattleik lét mikið að
sér kveða á móti sem fram fór í San
Francisco í Bandaríkjunum um s.l.
helgi. Jakob leikur með háskólalið-
inu Birmingham Southern og skor-
aði hann 19 stig að meðaltali á
mótinu og gaf 7,5 stoðsendingar í
leik. Liðið lék tvo leiki og sigraði í
öðrum þeirra.
SAM Allardyce, knattspyrnu-
stjóri enska úrvalsdeildarfélagsins
Bolton, gerir sér vonir um að fá
Javi Moreno, framherja Atletico
Madrid, í sínar raðir þegar opnað
verður fyrir leikmannamarkaðinn í
janúar. Stefnt er að því að Moreno
verði lánaður frá spánska liðinu til
Bolton í sex mánuði.
MORENO, sem er 29 ára, hefur
hins vegar enn ekki ákveðið hvort
hann vilji fara til Englands. Leik-
maðurinn reis til metorða hjá Ala-
ves og gerði tvö mörk fyrir félagið
þegar það tapaði fyrir Liverpool í
úrslitum UEFA-keppninnar 2001.
Hann gekk svo til liðs við AC Mílan
á Ítalíu en hélt í raðir Atletico Ma-
drid í júní á þessu ári.
ENSKA úrvalsdeildarfélagið
Wolves ætlar að semja við Carlos
Ruiz, framherja frá Gvatemala. Fé-
lagið ætlar að gera þriggja mánaða
samning við hinn 24 ára Ruiz, sem
hefur leikið með Los Angeles Ga-
laxy. Hann hefur skorað 15 sinnum
í 25 leikjum frá apríl fram í nóv-
ember.
THIERRY Henry var valinn
knattspyrnumaður Frakklands
2003 af knattspyrnutímaritinu
France Football. Zinedine Zidane
varð í öðru sæti og Ludovic Giuly,
fyrirliði Mónakó, varð í þriðja sæti.
FORSETI ítalska knattspyrnu-
liðsins Juventus, Luciano Moggi,
segir við ítalska fjölmiðla að hol-
lenski landsliðsmaðurinn Edgar
Davids verði ekki í herbúðum liðs-
ins á næsta keppnistímabili. Hinn
30 ára miðvallarleikmaður er samn-
ingsbundinn liðinu út leiktíðina og
hefur hann ekki hug á því að semja
á ný við Juventus.
DAVIDS hefur leikið með Juven-
tus frá árinu 1997 en hann var áður
hjá AC Milan. Í vetur hefur hann
ekki verið í náðinni hjá Marcelo
Lippi þjálfara Juventus og hefur
aðeins leikið 5 leiki í ítölsku deild-
inni það sem af er.