Morgunblaðið - 07.12.2003, Blaðsíða 38
38 | 7.12.2003
UM fátt er rætt og rifist af meiri áhuga af kvikmyndaáhugafólki þessimisserin en það hvaða leikari kemur til með að verða næsti JamesBond. Nú þegar Pierce Brosnan er dottinn í fimmtugt og yfirlýsing
liggur fyrir af hans hálfu að hann hyggist aðeins drepa samkvæmt leyfi í einni
mynd til viðbótar er óhjákvæmilegt að huga að eftirmanni. Endurnýjunin er
sosum tímabær og þörf, ekki síst er menn minnast þess hve „aldinn“ Roger
Moore var orðinn að sjá í sinni síðustu mynd, A View To a Kill. Margir verða
eflaust um hituna enda hlutverkið eitt það
eftirsóknarverðasta í heimi kvikmyndanna.
Lítum á hverjir hafa helst verið nefndir til
Bond-sögunnar að svo stöddu, og spáum í
möguleika hvers og eins á að hreppa hnoss-
ið. Fyrst er þó að reyna að kortleggja laus-
lega hvað leikari þarf að hafa til að bera til
að teljast líklegur Bond – James Bond.
James Bond er persóna tveggja öfga.
Annars vegar er hann hábreskur séntilmað-
ur (og um leið heimsmaður), skarpgreindur
og veraldarvanur, fágaður í framkomu, óað-
finnanlega klæddur í hvívetna, sérfróður
smekkmaður á allt er snýr að mat og vínum.
Hins vegar er hann njósnari og útsendari
fyrir bresku leyniþjónustuna, hann tilheyrir
sérstakri úrvalssveit sem er auðkennd með
tveim núllum sem þýðir að viðkomandi hef-
ur leyfi til að deyða fólk eftir þörfum við
störf sín án þess að eiga á hættu að verða
sóttur til saka, hann hefur gráður í boxi
bæði og júdó, er fullfær um að stjórna
hvaða farartæki og beita hvaða vopni í ver-
öldinni sem er og með afbrigðum úrræða-
góður á ögurstund. Eins og þetta séu ekki
nægir mannkostir þá er hann líka fjall-
myndarlegur. Það er því ljóst að sá leikari
sem gerir sér vonir um að verða trúverð-
ugur í hlutverki James Bond verður að geta
sýnt af sér fullkomna fágun sem og hörku-
tólshátt. Að milljón dollara útlitinu
ógleymdu. Sannarlega miklar kröfur, en
svona er Bond; konur þrá hann og karl-
menn þrá að vera hann.
Fyrst er að nefna hinn enska Jude Law.
Hann er sannarlega ástmögur almennings í
heimalandi sínu og skipar iðulega, ásamt
David Beckham, efstu sæti lista sem teknir
eru saman yfir kynþokkafyllstu og best
klæddu karlmenn Stóra-Bretlands. Law er
flinkur leikari, var til dæmis tilnefndur til
Óskarsverðlauna fyrhir frammistöðu sína
sem auðmannssonurinn Dickie Greenleaf í
The Talented Mr. Ripley. Vissulega hefur Law útlitið með sér, en þar gæti líka
fall hans verið falið; hann er máske fullunglegur að sjá til að taka að sér skyld-
ur njósnara hennar hátignar, ekki síst er manni verður hugsað til hinna hast-
arlegu umskipta sem ættu sér stað ef hann tæki nú við af Brosnan – sem er
næstum tuttugu árum eldri en Law. Hins vegar hefur Law til að bera útgeislun
og stíl sem myndu nýtast honum fullkomlega í hlutverkinu svo hann telst enn
koma alvarlega til greina.
Ástralski leikarinn Hugh Jackman hefur einnig þótt álitlegur kostur í stöð-
unni. Hann hefur útlitið klárlega með sér og harðjaxlaelementið er sömuleiðis
til staðar, það höfum við séð í Swordfish og X-Men myndunum tveim. Hann
sýndi ennfremur á sér fágaðar séntilmannahliðar í myndinni Kate & Leopold –
nokkuð sem ætti að koma sér vel þegar keppnin um Bond hefst fyrir alvöru.
Nýstirnið Colin Farrell á eflaust töluverða framtíð fyrir sér á hvíta tjaldinu, og
eftir reffilega frammistöðu á móti Tom Cruise í Minority Report fóru ein-
hverjir að flagga honum sem mögulegum næsta Bond. Hvað sem framtíðin
kann að bera í skauti sér er þó nokk ljóst að launatékki fyrir að leika Bond sést
tæplega í spilum Farrels; til þess er órakaða pörupiltagenið allt of ríkjandi hjá
honum og að kenna honum þá hnökralausu fágun sem Bond þarf að eiga í
handraðanum myndi líklega ganga jafnvel
og það hefur gengið að kenna Arnold
Schwarzenegger sæmilegan framburð á
enskri tungu. Ef Colin Farrell er ólíklegur í
hlutverkið sökum grófs yfirbragðs, þá er
næsti kandídat líklega út úr öllu korti. Þar
er átt við söngvarann og „Íslandsóvininn“
Robbie Williams, en hann hefur ítrekað lýst
yfir miklum áhuga á því að spreyta sig á því
að leika Bond, fyrr eða síðar – hefur meira
að segja birst í gervi njósnarans í tónlistar-
myndböndum sínum. Hann er því tekinn
hér til skoðunar mestmegnis vegna eigin
áhuga. Það er morgunljóst að það yrði ein-
hver afdrifaríkasti skandall kvikmyndasög-
unnar ef þessi götustrákur yrði gerður að
Bond. Enda hefur varla nokkrum manni
dottið það í hug, fyrir utan hann sjálfan.
Endrum og sinnum hef ég rekist á
lesendakannanir, einkum á Netinu, hvar
þátttakendur eru beðnir um að gefa sitt álit
því sem hér er til umræðu, næsta James
Bond. Þar ber Hugh Grant merkilega oft á
góma, og kemur það allnokkuð á óvart að
einhver geti séð hann fyrir sér í rullunni þar
eð hlutverk hans hingað til hafa ekki bein-
línis verið í línu við 007. Hann hefur varla
mundað skotvopn svo ég muni eftir. Hinn
fágaði helmingur hlutverksins ætti reyndar
ekki að vefjast fyrir honum og þeir eru ef-
laust til sem segja hann hafa útlitið – þó að
ég sjái Bond ekki fyrir mér með hárið skipt í
miðju og lubbagardínur niður á kinnbein.
En það er í harðjaxlahluta Bonds sem Grant
fer halloka; hann yrði ekki til stórræðanna í
slagsmálum og vopnaskaki, hvað þá er kem-
ur að því að bjarga heiminum. Pass.
Sá síðasti sem nefndur er að þessu sinni
er mun minna þekktur en þeir sem voru
reifaðir hér að framan, nefnilega enski leik-
arinn Clive Owen. Íslenskir áhorfendur
muna sjálfsagt einhverjir eftir honum í
breskum spennuþáttum sem kölluðust
Chancer og voru sýndir á Stöð 2 árið 1990
eða 1991, og svo í frábærri mynd Robert Altman, Gosford Park. Honum brá
einnig fyrir í The Bourne Identity hvar hann lék atvinnudrápara sem kallaður
var „Prófessorinn“. Það var hins vegar frammistaða hans í myndinni Croupier
sem fékk menn til að hripa nafnið niður í Bond-samhenginu, ekki síst þar sem
hann þykir taka sig vel út í smóking. Ef pródúserum er treystandi til að fín-
pússa Hr. Owen örlítið til og venja hann á framburð í áttina að Oxford-ensku
þá kemur hann óneitanlega sterkur inn í umræðuna, ekki síst með tilliti til þess
að framleiðendur myndanna hafa alla tíð forðast að ráða til starfans leikara
sem komnir eru á stjörnustall – sjálfsagt til að auðvelda þeim að eigna sér per-
sónuna sem og til að almenningur sjái viðkomandi fyrir sér sem 007, óhindrað
af þekktum eldri hlutverkum.
HVER VERÐUR BOND – JAMES BOND?
James Bond:Tomorrow Never Dies. Pierce Brosnan í hlutverki Bond.
Hugh Jackman
Hugh Grant Colin Farrell
Robbie Williams
Pierce Brosnan ætlar aðeins að vera í þjónustu hennar hátignar Bretadrottningar í einni mynd til viðbótar
Clive Owen
Jude Law
KVIKMYNDIR | JÓN AGNAR ÓLASON