Morgunblaðið - 25.09.2004, Blaðsíða 24
24 LAUGARDAGUR 25. SEPTEMBER 2004 MORGUNBLAÐIÐ
MINNSTAÐUR
Enski boltinn
Sérstök umfjöllun um enska
boltann verður alla laugardaga
í vetur í íþróttablaði
Morgunblaðsins.
Skjóttu á úrslitin!
Á vefnum getur þú tekið þátt í getraunaleik
og unnið til verðlauna.
Á finnur þú einnig allt
um enska boltann á einum stað
l staðan
l umferðir
l dagskrá útsendinga
l úrslit
Húsavík | Ómar Þorgeirsson heitir
ungur Húsvíkingur sem unnið hefur
að skráningu fiskimiða Þingeyinga í
þingeyska kortagrunninn á vegum
Safnahúss Þingeyinga. Þrátt fyrir
að faðir hans sé smábátasjómaður
segist Ómar ekki hafa haft sér-
stakan áhuga á fiskimiðum til
þessa.
„Þetta er einungis faglegur
áhugi, ég er sagnfræðinemi og er
einmitt að vinna að BA-ritgerð
minni þessa dagana. Það var Óli
Halldórsson í Þekkingarsetri Þing-
eyinga sem benti mér á þann ágæta
möguleika að vinna rannsóknar-
vinnu af einhverju tagi hér á Húsa-
vík. Mér leist strax nokkuð vel á
þann kost, auk þess sem það kom
mér vel því ég hafði gert samning
um að leika knattspyrnu með Völ-
sungum í sumar,“ segir Ómar.
Ómar segist í framhaldinu haf-
asett sig í samband við Guðna Hall-
dórsson, forstöðumann Safnahúss-
ins á Húsavík, sem kynnti honum
þetta skráningarverkefni varðandi
gömlu árabátamiðin á Skjálfanda.
„Þetta æxlaðist þannig að við sótt-
um saman um styrk hjá Nýsköp-
unarsjóði námsmanna, ég sem
námsmaður og þeir Óli og Guðni
sem umsjónarmenn verkefnisins.
Það gekk sem betur fer upp og ég
efast um að ráðist hefði verið í
þetta verkefni í sumar nema með
þessum styrk og fleiri slíkum sem
Guðni náði að afla,“ sagði Ómar.
Sagnfræðinemi skrásetur fiskimið Þingeyinga
Mikið verk að sam-
ræma upplýsingar
Morgunblaðið/Hafþór
Skráning Ómar Þorgeirsson hefur haft aðstöðu í Þekkingarsetri Þing-
eyinga við að skrásetja fiskimið Þingeyinga. Það er mikið verk.
LANDIÐ
ÁRBORGARSVÆÐIÐ
Þorlákshöfn | Nú í haust hófu nem-
endur í 2. 3. og 4. bekk í Grunnskól-
anum í Þorlákshöfn nám í ensku.
„Þetta er tilraunaverkefni og ef ár-
angur verður góður mun verða
framhald á kennslunni,“ segir Hall-
dór Sigurðsson skólastjóri.
Sigrún Berglind Ragnarsdóttir,
enskukennari skólans, sem sér um
kennsluna, segir að það hafi lengi
verið hennar skoðun að ensku-
kennsla ætti að hefjast sem allra
fyrst í grunnskólum. „Börn í yngstu
bekkjum eru svo móttækileg fyrir
öllu nýju og finnst verulega spenn-
andi að geta tjáð sig á „útlensku“
eins og þau segja. Tilgangurinn er
líka að reyna að jafna getumuninn
áður en þau koma í 5. bekk og hefja
bóklega enskukennslu. Í 5. bekk er
munurinn oft það mikill að hópurinn
skiptist ósjálfrátt fljótlega eftir getu
en úr því má draga verulega með tal-
og leikkynningu á tungumálinu á
yngsta stigi grunnskóla.“
Sem „útlenskukennari“ fór Sigrún
Berglind fram á við skólastjóra að fá
nokkra tíma á viku til að deila niður
á 2. til 4. bekk og sjá hvernig þau
tækju við enskukynningu. Ætlunin
er að hafa þetta sem allra frjálsast
og vinna aðallega með talmál og
söngva.
Þetta hefur farið mjög vel af stað
og börnin verið spennt og jákvæð að
læra og taka þátt í tímum. Hún
reynir að hafa börnin í sem allra
minnstum hópum, sjaldan fleiri en 6
til 8 í einu, til að hvert og eitt njóti
sín sem best. Suma morgna flæða
börnin um gangana og bjóða öllum
góðan daginn á ensku og reyna að
tjá sig sem allra mest á „útlensku“.
Eru áhugasöm um útlenskuna
Morgunblaðið/Jón H. Sigurmundsson
Læra ensku Sigrún Berglind Ragnarsdóttir með nemendur úr 2. bekk.
Selfoss | „Við erum búnir að vera með þetta í höfðinu í rúm
tíu ár en okkur langar að hafa bíó á staðnum, eins og svo fjöl-
marga aðra á Selfossi. Við sáum á eftir gamla Selfossbíói þeg-
ar það var rifið og lifðum lengi í voninni eins og aðrir að það
kæmi nýtt, en það kom aldrei,“ segja félagarnir Magnús
Ninni Reykdalsson og Einar Rúnar Einarsson sem stefna að
opnun nýs Selfossbíós í tveimur kvikmyndasölum sem eru í
nýbyggingu Hótels Selfoss.
Gera þeir ráð fyrir að fyrsta sýningin verði 1. desember.
Um er að ræða tvo bíósali, 120 og 50 sæta, sem Selfossbíó
mun leigja af eigendum hússins en framkvæmdir við salina
eru hafnar og búið að panta innréttingar og tæki.
„Nú eru komnar upp þær aðstæður að hægt er að gera Sel-
fossbíó að veruleika en það gerist með mjög góðu samstarfi
við eigendur hússins. Þetta er sameiginlegt átak okkar og
þeirra. Við breytum áður hugsaðri aðkomu að þessum sölum
en inngangur í bíóið verður að norðanverðu. Þetta mun allt
virka mjög vel og verða vel aðgengilegt fyrir bíógesti,“ sögðu
bíómennirnir en þeir hafa gert samninga við kvikmyndahúsin
í Reykjavík um sýningar á myndum sem þar eru sýndar,
frumsýningar og forsýningar á stórum myndum á sama tíma
og í Reykjavík en aðrar myndir koma eitthvað seinna á Sel-
foss. Þeir félagar segjast hafa átt gott samstarf við kvik-
myndahúsin í Reykjavík og líta björtum augum til framtíðar.
Fyrstu sýningar í nýju Selfossbíói áformaðar 1. desember
Sáum eftir gamla bíóinu
Morgunblaðið/Sigurður Jónsson
Bíómenn á Selfossi Magnús Ninni Reykdalsson og
Einar Rúnar Einarsson hefja bíósýningar á Selfossi.