Morgunblaðið - 13.09.2003, Blaðsíða 7
m7
BRAUÐSÚPA MEÐ TÓMÖTUM OG BASIL F. 4
Ég hef alltaf átt erfitt með að borða brauðsúpur og þegar
amma Silla breytti matseðlinum í hádeginu og gaf mér
brauðsúpu í staðinn fyrir hrísgrjónagraut, þá dæsti ég alltaf,
reyndi þó að borða hana en var fljót að hella henni í vaskinn
þegar amma labbaði út úr eldhúsinu. Brauðsúpan sem ég
bý til núna er ekki einu sinni fjarskyld íslensku rúgbrauðs-
súpunni, í súpunni minni er gamalt ítalskt brauð, tómatar,
hvítlaukur og basil.
2 sneiðar gamalt ítalskt brauð
grænmetissoð, til að leggja brauðið í
2 dósir niðursoðnir tómatar eða ferskir tómatar
ólífuolía
4 hvítlauksgeirar
handfylli af basilíku
svartur nýmalaður pipar
Leggið brauðið í grænmetisoðið. Steikið hvítlaukinn í olíu.
Bætið tómötum út í og hrærið af kátínu, bætið basilíku út í,
kryddið með salti og nýmöluðum pipar. Takið brauðið úr
skálinni og kreystið safann úr brauðinu og maukið það í
höndunum og bætið út í tómatana. Hitið skál og berið
súpuna fram.
GRASKERSSÚPA F. 6
Þá er komið að mauksúpunum hans Kristjáns kokks í Ríkisút-
varpinu. Þær eru einstaklega skemmtilegar og hollar vegna
þess að þær eru ekki bakaðar upp en maukað grænmetið
gerir þær þykkar. Þessi súpugerð tekur svolitla stund því
það þarf að sjóða grænmetið í 2 klukkutíma.
1 lítið grasker, skrælað og skorið í teninga
1 laukur niðurskorinn
4-5 hvítlauksrif
handfylli af kóríander
cummin
2-3 sm af fersku engiferi
1 1/2 l vatn
chilipipar eða tapasco
hænsnakraftur eða nautakraftur
1/2 dós kókosmjólk
Steikið lauk og hvítlauk og látið malla við vægan hita.
Kryddið með kóríander, cummin og engifer. Bætið gras-
kerinu út í ásamt vatni, þó ekki öllu og sjóðið í tvær klukku-
stundir. Maukið súpuna í matvinnsluvél, hellið henni aftur í
pottinn og bætið við vatni. Kryddið ykkur áfram með salti
og pipar og hænsna- eða nautakrafti ásamt chilipipar og
hellið kókosmjólkinni í súpuna.
GULRÓTARSÚPA
1/2 kg gulrætur, niðurskornar
1 laukur
4-5 hvítlauksgeirar
handfylli af kóríander
3 sm engifer
kjötkraftur
rjómi
nýmalaður pipar
graslaukur til að skreyta
Skerið niður lauk og hvítlauk og og látið malla ásamt engifer
og kóríander. Bætið niðurskornum gulrótum út í ásamt vatni
þó ekki öllu (helmingnum). Látið sjóða í tvær klukkustundir.
Maukið í matvinnsluvél, hellið aftur í pottinn og kryddið
með kjötkrafti, pipar og salti. Bragðbætið með rjóma og
skreytið með graslauk.