Morgunblaðið - 13.09.2003, Blaðsíða 45
m451
nýtt í nestisboxið
FERSKT OG SVALANDI
• Það er góð hugmynd að nota lítið kælibox sem nestisbox því
þá verður nestið lystugra, sum nestisbox eru þannig úr garði
gerð. Hafið svalann eða vatnsflöskuna í frysti þannig að þegar
það er tekið út um morguninn helst það kalt frameftir degi.
AUSTRÆNIR STRAUMAR
• Hitið núðlur og sigtið vatnið frá, setjið í box. Munið gaffal með.
NESTISSPJÓT
• Raðið á trépinna eða tréspjót, t.d. gúrkubitum,
kirsuberjatómötum, pulsubitum, salatblöðum, paprikubitum –
einnig hægt að setja skinku á brauð og skera brauðið svo í
teninga og hafa með á spjótinu. Í raun sama venjulega hráefnið
en í spennandi útfærslu.
TIL AÐ NAGA:
• Gulrætur, rófubiti, radísur, ostastangir, gúrkubitar. Hægt að
hræra súrmjólk með dijonsinnepi, krydda með salti og pipar og
dilli og hafa með sem ídýfu í litlum bikar.
• Skerið niður mangó í bita, melónur eða aðra ávexti og setjið í
lítil box. Nokkur vínber eða jarðarber eru líka vinsæl og þurrkaðir
ávextir eins og apríkósur eða döðlur.
• Ef perur eða epli eru skorin í báta er gott að kreista sítrónusafa
yfir til að gefa frískandi bragð og þá verða ávextirnir ekki brúnir í
boxinu.
• Seríós í poka er alltaf vinsælt hjá yngri deildinni til að maula á –
nú eða poppkorn.
SAMLOKUTILBRIGÐI
• Bregðið út af venjulegu skinkusamlokunni með því að rista
brauðsneiðarnar og kalla herlegheitin klúbbsamloku.
FYLLING Í PÍTUBRAUÐ
• Hrærið saman vel þroskað avakadó með sýrðum rjóma og
smyrjið pítubrauðið með því, saltið og piprið. Einnig má smyrja
með tómatssósu. Fyllið með kjúklingi, gúrkum, papriku, salati,
jafnvel sólþurrkuðum tómötum ef barnið er ævintýragjarnt.
AFGANGAR
• Notið afganginn af hrísgrjónunum eða pastanu kvöldið áður í
salat eða sem fyllingu í pítu, notið kjötafgangana í samloku.
HUNANGSBANANAR
• Skerið banana í 4 bita og steikið í dálitlu hunangi á pönnu þar
til bitarnir eru orðnir gullinbrúnir. Kælið í hálftíma eða svo – gott
og öðruvísi með í boxið.
GOTT RÁÐ FYRIR BÖRNIN
• Fáið einhvern til að skipta við ykkur – alveg merkilegt hvað
öðrum þykir “alltaf-sama-nestið” manns svakalega gott – og
öfugt :)
Er barnið orðið þreytt á eilífri jógúrt og banana í
nestisboxinu? Ekki bjóða allir skólar upp á heitan mat
og því er nestið nauðsynlegt. Samloka og ávöxtur er
auðvitað alltaf gott en það er líka vinsælt að breyta til
– og geta kannski notað afgangana úr ísskápnum í
leiðinni.
Auglýsing