Morgunblaðið - 02.07.2003, Blaðsíða 11

innlit
lifun
Það tekur á móti manni ótrúlegur kökuilmur
þegar komið er heim til Helgu. Hún er að
baka smjörköku. Stuttu síðar er kökuilmurinn
orðinn að brauðilmi og loks hvítlaukslykt.
Helga er að elda fyrir lesendur Lifunar en
þegar hún bjó í Bandaríkjunum fór hún í 2 ára
nám í námskeiðsformi í matreiðsluskóla sem
ítölsk kona stofnaði og leggur aðallega
áherslu á ítalska matargerð. Þess ber að geta
að Helga er skírð í höfuðið á afasystur sinni,
Helgu Sigurðardóttur hússtjórnarkennara og
skólastýru Húsmæðrakennaraskólans sem á
sínum tíma skrifaði hinar þekktu matreiðslu-
bækur sem margar húsmæður drógu lærdóm
sinn af.
Foccacia með pestói
Gott gerdeig smurt með heimalöguðu pestói. Pestó: 2 bollar fersk basilíka . 2 hvítlauksrif . 1/2 bolli ristaðar
furuhnetur . 1/2 bolli parmesanostur . 1/2 bolli olía . salt og pipar eftir smekk . Allt hráefnið er hrært vel saman
í matvinnsluvél en gott er að setja ostinn síðast út í blönduna. Helga notar aldrei salt og pipar í pestóið fyrr en hún
notar það eða ber það fram. Einnig er gott að gera pestó með klettasalati (rucola) en þá notar Helga 3 bolla af salati
í stað basilíkunnar.
Kjúklingasamloka
Lögur á kjúkling: 2 dl olía . safi úr ferskri sítrónu . lófafylli af saxaðri ferskri steinselju . salt og pipar eftir
smekk . Allt hrært saman, kjúklingabringur látnar liggja í leginum í 24 tíma og þá skellt á grillið. Bornar fram í
bagettubrauði sem hefur verið smurt með smjöri og hvítlauk og grillað örlítið í ofni. Gott að hafa klettasalat, tómata,
avokado og kóríander á milli með kjúklingnum.