Morgunblaðið - 29.10.2003, Blaðsíða 25
Eldhúsið býður upp á mikla möguleika. Það er tengt borðstofu og síðan stofu án
þess þó að teljast opið rými og þegar gengið er inn í húsið blasir það við úr and-
dyrinu inn af breiðum gangi. Þess vegna var það mikil áskorun að gera það þannig
úr garði að það tengdist þessum herbergjum í útliti og stíl.
Eigendur höfðu gert nokkrar lagfæringar á gamla eldhúsinu þegar þeir fluttu inn
fyrir nokkrum árum en ekki ráðist í meiri breytingar þar sem þeir vissu ekki hvernig
þeir vildu hafa það. Nú var hins vegar kominn tími til verulegra breytinga og þá
sérstaklega að endurnýja öll tæki í eldhúsið. Það þýddi bara eitt … að ráðast í
framkvæmdir.
Það höfðu komið upp ýmsar hugmyndir um skipulag og útlit eldhússins í gegnum
tíðina og draumurinn lengi verið sá að fá þar 90 cm eldavél. Slíkur gripur tekur
meira pláss en venjulega er gert ráð fyrir í eldhúsi og þarna var það alltaf ljóst að
eldavélin yrði að vera á endavegg og þar í kring áhöld og vinnuaðstaða.
Skipulag eldhússins býður upp á þann möguleika að hafa innréttingu á einum
löngum vegg og var ákveðið að hafa skúffur ráðandi í innréttingunni og eingöngu
neðri skápa. Sú hugmynd að setja efri hluta af skenk á vegginn þar fyrir ofan hafði
lengi komið til greina en leitin að skenknum hins vegar tekið tíma.
Nútímalegt en gamaldags yfirbragð, hvítt, svart og stál – einföld, hvít innrétting frá
IKEA sem öruggt er að segja að allt passi við. Krani og vaskur eru sömuleiðis frá
IKEA. Höldur eru frá HTH. Skenkurinn er úr Tekk-Company og er neðri hluti hans í
stofunni og kallast þannig á við eldhúsið. Lítið eldhúsborð úr eik og svartir
leðurstólar fást einnig í Tekk en eikin er á parketi í stofu og borðstofu og var tekin á
eldhúsbekkinn. Stólarnir eiga vel við svartan skápinn og eru einnig í borðstofu.
Gardínan er úr má mí mó og hagkvæm að því leyti að það kemst mikil birta í geg-
num hana og hægt að sjá út um gluggann án þess að sjáist mikið inn og þurfi alltaf
að færa hana til. Loftljós er úr Habitat. Öll tæki í eldhúsið eru úr Eirvík. Eldavélin er
90 cm SMEG, háfurinn og stálplatan sömuleiðis, ísskápur er Liebherr með klakavél
og uppþvottavél Miele með hurð í stíl við innréttingu.
eldhús
lifun