Morgunblaðið - 17.01.2005, Síða 11
MORGUNBLAÐIÐ MÁNUDAGUR 17. JANÚAR 2005 11
VIÐSKIPTI/ATHAFNALÍF
HJÁ Franch Michelsen úrsmíða-
meistara á Laugavegi má nú kaupa
úr sem reynst gæti hinn ágætasti
fjárfestingarkostur.
Um er að ræða sérframleitt af-
mælissett; sjálftrekkt 2ja tíma arm-
bandsúr og 8 daga vekjaraklukku
frá svissneska úraframleiðand-
anum Oris sem átti 100 ára afmæli á
síðasta ári. Af því tilefni framleiddu
verksmiðurnar 1904 númeruð sett
eða jafnmörg ártali stofnársins.
Franch Michelsen úrsmíðameistari
hefur selt Oris-úr allt frá árinu
1945 og vegna þessara tengsla fékk
fyrirtækið eitt úrasett, númer 891,
en þó ekki fyrirhafnarlaust, að sögn
Franks Úlfars Michelsen úr-
smíðameistara og framkvæmda-
stjóra fyrirtæksins. „Ég þurfti að
hafa talsvert fyrir því að fá úrið en
vegna góðra tengsla og vegna þess
að við áttum sjálfir merkisafmæli á
árinu lánaðist mér að ná einu setti,“
segir Frank en fyrirtækið fagnaði
95 ára afmæli á síðasta ári.
Hann segir Oris vera nokkuð
þekkt vörumerki, aðallega í Mið- og
Norður-Evrópu og þá einkanlega í
Sviss en Svisslendingar séu þekktir
fyrir að vera vandlátir þegar kem-
ur að úrum. Þá sé Oris mjög eftir-
sótt vörumerki í Asíu, sérstaklega í
Japan.
Víða erlendis eru safnarar sem
sérhæfa sig í sjaldgæfum úrum og
þeir hafa, ásamt fjárfestum, sýnt
þessum settum mikinn áhuga, að
sögn Franks. „Það eru einnig sífellt
fleiri Íslendingar sem safna úrum,
aðallega karlmenn. Fyrir utan að
vera notadrjúgt fylgir því einnig
mikil prýði og ánægja að ganga
með vandað úr. Auk þess eru góð úr
oft á tíðum prýðilegar fjárfestingar
sem bera góðan ávöxt þegar fram
líða stundir,“ segir Frank.
Og úrsettið er enda ekki í ódýrari
kantinum, kostar 387.300 krónur
en Frank segir talsvert um að Ís-
lendingar kaupi sér vönduð og dýr
úr og það hafi færst í vöxt á und-
anförnum árum. En honum er ekki
allskostar sama um hver kaupand-
inn verður. „Ég mun senda nafn og
heimilisfang kaupandans til fram-
leiðandans í Sviss. Kaupandinn fær
síðan senda sérstaka bók um sögu
Oris. Mér er annt um í hvaða hönd-
um úrið lendir, sérstaklega vegna
þess að ég þurfti að hafa mikið fyrir
því að fá úrið í sölu.“
Í föruneyti konungs
Saga fyrirtækisins Franch Michel-
sen úrsmíðameistara nær aftur allt
til ársins 1909, en þá hóf J. Frank
Michelsen störf í fyrirtæki kenndu
við Michelsen. Hann kom til Íslands
í föruneyti Friðriks VIII, konungs í
Danmörku árið 1907 en konungur
var þá hér í opinberri heimsókn.
Árið 1909 stofnaði hann F. Michel-
sen úr & gullsmíði á Sauðárkróki
og rak fyrirtækið einn til ársins
1940 er sonur hans Franch Michel-
sen kom frá námi í úrsmíði og starfi
í Danmörku og tók við úrsmíða-
vinnustofunni en J. Frank rak
áfram verslunina. Árið 1945 flutti
hann frá Sauðárkróki og hóf störf
með syni sínum Franch sem opnað
hafði aðra verslun í Reykjavík með
sama nafni árið 1943. Stóð samstarf
þeirra allt þar til J. Frank féll frá
þann 16. júlí 1954. Franch Michel-
sen er enn starfandi að úrsmíðafag-
inu og hefur kennt 12 úrsmiðum og
þar á meðal syni sínum, Frank Úlf-
ari Michelsen sem starfað hefur við
hlið hans frá því hann hóf nám í úr-
smíði árið 1973. Frank Úlfar tók við
rekstri fyrirtækisins árið 1992 og
rak það fyrir föður sinn allt þar til
er hann keypti það á 90 ára afmæl-
isári þess, 1. janúar 1999.
Úr nr. 891
Morgunblaðið/ÞÖK
Frank Ú. Michelsen úrsmiður með úrasettið góða frá Oris. hema@mbl.is
● MIDEM-tónlistarkaupstefnan verð-
ur haldin í Cannes í Suður-Frakklandi í
lok mánaðarins, taka níu íslensk fyr-
irtæki þátt í stefnunni og mun
menntamálaráðherra, Þorgerður Katr-
ín Gunnarsdóttir, sækja sýninguna.
Midem kaupstefnan, sem er nú hald-
in í 39. sinn, er helsti vettvangur tón-
listarútgefenda og -dreifenda í heimi.
Þetta er í annað sinn sem íslensk fyr-
irtæki eru saman á bás á Midem.
Íslenskur kynnningarbás á Midem
verður á vegum Útflutningsráðs líkt
og síðasta ár en níu íslensk fyrirtæki
taka þátt í sýningunni, þar af átta á
bás Útflutningsráðs, auk þess sem
fulltrúar fleiri fyrirtækja og stofnana
verða á staðnum.
Íslensku fyrirtækin sem taka þátt í
Midem að þessu sinni eru Bang,
Reykjavik Records, Skífan, Smekk-
leysa, Zonet, 12 Tónar, Tónlist.is, Ís-
lensk tónverkamiðstöð og Concert.
Auk þess verða þar fulltrúar frá Sam-
tóni, Stefi og FÍH. Midem kaup-
stefnan hefst í Cannes 23. janúar
næstkomandi og stendur til 27. jan-
úar.
Níu íslensk
fyrirtæki til Cannes
PÓLLAND, Slóvakía og Tékkland
voru efst á lista yfir lönd sem íslensk
útflutningsfyrirtæki hafa áhuga á að
heimsækja á árinu 2005 skv. niður-
stöðum skoðanakönnunar sem Út-
flutningsráð gerði í byrjun nóvember.
Auk þess reyndist vera mikill áhugi
fyrir viðskiptasendinefndum til Jap-
ans og Danmerkur. Þetta kemur fram
í frétt frá Útflutningsráði Íslands.
Haft er eftir Vilhjálmi Guðmunds-
syni hjá Útflutningsráði að viðbrögð-
in hafi verið góð og vinna sé nú hafin
við skipulagningu ferða viðskipta-
sendinefnda með hliðsjón af niður-
stöðum könnunarinnar. Hann segir
ráðgert að fara til Tékklands og Slóv-
akíu um miðjan apríl, Danmerkur í
maí, Póllands um mánaðamótin maí/
júní og Japans í haust. Einnig sé í
undirbúningi ferð sendinefndar til
Úganda um miðjan mars svo fremi að
næg þátttaka fáist.
Vilhjálmur segir ferðirnar yfirleitt
skipulagðar í tengslum við áhuga-
verða atburði á viðkomandi svæði, s.s.
sýningar og menningarviðburði, auk
þess sem reynt sé að tengja þær op-
inberum heimsóknum ráðamanna og
samstarfsverkefnum útflutningsaðila
erlendis. Til að mynda hafi fjöldi fyr-
irspurna borist vegna opinberrar
heimsóknar forseta Íslands til Kína á
þessu ári.
Á síðasta ári voru skipulagðar ferð-
ir sex viðskiptasendinefnda til sjö
landa og telur Vilhjálmur það endur-
spegla vaxandi áhuga íslenskra fyr-
irtækja á þátttöku í slíkum viðburð-
um.
Pólland, Slóvakía og
Tékkland vinsælust
ÞETTA HELST …
VIÐSKIPTI
● TUTTUGU og einu íslensku félagi
var á árinu 2004 veitt heimild til að
færa bókhald sitt í erlendum gjald-
miðli. Í árslok hafði því 101 félagi
verið veitt slík heimild frá árinu
2002, að því er segir í Vefriti fjár-
málaráðuneytisins.
Langflest félaganna, eða 66 tals-
ins, færa bókhald sitt í bandarískum
dollurum, 25 í evrum, 8 í enskum
pundum, eitt í norskum krónum og
eitt í kanadískum dollurum.
Átta þessara félaga eru skráð í
Kauphöll Íslands; Actavis, Bakkavör
Group, Flugleiðir, Hampiðjan, Marel,
Medcare Flaga, SÍF og Össur. Þá eru
mörg félaganna eignarhaldsfélög
sem eru í tengslum við erlend félög.
Opnað var á heimild fyrir félög til
að færa bókhald sitt og birta árs-
reikninga í erlendri mynt með breyt-
ingu á lögum um ársreikninga vorið
2002. Ársreikningaskrá gefur til
þess leyfi að uppfylltum einu eða
fleiri skilyrðum, s.s. að félagið hafi
meginstarfsemi sína erlendis, það
sé með verulegan hluta viðskipta í
erlendum gjaldmiðli eða hafi veru-
legan hluta fjárfestinga sinna og
skulda þeim tengdra skráðan í er-
lendum gjaldmiðli.
101 félag gerir
upp í erlendri mynt