Morgunblaðið - 31.01.2005, Blaðsíða 6
6 MÁNUDAGUR 31. JANÚAR 2005 MORGUNBLAÐIÐ
FRÉTTIR
ÓLAFUR Hauksson, talsmaður Ice-
land Express, segist lítið gefa fyrir
svör forsvarsmanna Icelandair að
um mistök hafi verið að ræða, þegar
auglýsingar fyrirtækisins voru
skornar burt úr auglýsingabæklingi
Ferðamálaráðs sem dreift var á
ferðakaupstefnu á Spáni. Lögfræð-
ingur fyrirtækisins mun hafa sam-
band við Ferðamálaráð og óska eftir
að málið verði kannað betur.
Guðjón Arngrímsson, upplýsinga-
fulltrúi Icelandair, segir um mistök
að ræða. „Það er rétt að starfsmaður
okkar á þessari sýningu hafði klippt
út auglýsingarnar úr einhverjum
hluta af þessum bæklingi. Það voru
klárlega mistök,“ segir Guðjón.
„Mér finnst þetta skrýtinn skiln-
ingur á orðunum „mistök“. Hvernig
er hægt að gera mistök með því að
sitja og klippa burt auglýsingar
keppinautar úr opinberum bæklingi.
Auðvitað hljóta starfsmenn fyrir-
tækisins að hafa fengið línu frá ein-
hverjum sem fær þá til að gera þessi
mistök.“ Sama hefði verið uppi á ten-
ingnum þegar Icelandair skráði lén-
ið icelandexpress.org og vísaði á
heimasíðu Icelandair. „Þá var þetta
líka kallað mistök. Ég kaupi ekki
þennan mistakaskilning,“ segir Ólaf-
ur. „Í ljósi þess að Icelandair er
væntanlega mjög stór dreifiaðili á
þessum bæklingi, bæði í Evrópu og
Bandaríkjunum, höfum við ekki
ástæðu til að ætla annað en að þeir
hafi verið að föndra við að fjarlægja
okkar auglýsingar úr öllum þeim
bæklingum sem þeir hafa látið fara
frá sér.
Ef þeir gera þetta frammi fyrir
augunum á fólki, hvað hafa þeir verið
að gera þegar þeir senda frá sér
samkvæmt beiðnum í pósti?“ spyr
Ólafur.
Sætta sig ekki við svör Icelandair
Ferðamálaráð kanni
bæklingamálið betur
NÝTT einbýlishús, sem fyrirhugað
er að reisa við Grenimel, var aug-
lýst til sölu í Morgunblaðinu í gær
og hefur vafalítið vakið mikla at-
hygli þar sem um eitt glæsilegasta
og stærsta einbýlishús landsins er
að ræða.
Í lýsingu hússins kemur fram að
um sé að ræða 660 fm einbýlishús á
þremur hæðum auk kjallara. Í hús-
inu verður lyfta, gert er ráð fyrir
tvöfaldri lofthæð í stofu, þ.e. 6,6
metrar, þjónustuíbúð og vínkjallara
svo eitthvað sé nefnt. Ofan á hús-
inu verður um 70 fm þakgarður þar
sem möguleiki er á að hafa heitan
pott og að fyrir framan stofu á
jarðhæð verði 75 fm timburverönd
með steyptum skjólveggjum. Arki-
tekt hússins er Logi Már Ein-
arsson hjá arkitektastofunni Koll-
gátu á Akureyri.
Mikil viðbrögð
Aðspurður sagðist Engilbert
Runólfsson, forstjóri fyrirtækisins
Stafna á milli, sem reisa mun ein-
býlishúsið, ekki vilja gefa upp verð
hússins að svo stöddu. Að sögn
Engilberts hefur hann þegar fengið
mikil viðbrögð. Hann segir að þeir
sem séð hafi teikningar af húsinu
séu mjög hrifnir, enda verði hér
um „eitt glæsilegasta hús landsins
að ræða. Allur frágangur, vinna og
efnisval við húsið verður fyrsta
flokks. Það má í raun segja að
þetta sé hið fullkomna hús, bara
eitt með öllu,“ segir Engilbert og
tekur fram að húsið er í nýfunkis-
stíl sem sé að koma mjög sterkt
inn í arkitektúr aftur.
Að sögn Engilberts geta vænt-
anlegir kaupendur fengið húsið af-
hent hvernig sem þeir vilja, ann-
aðhvort aðeins fullbúið að utan og
fokhelt að utan eða tilbúið til inn-
réttinga eða fullbúið á allan hátt.
Spurður hvenær ráðgert sé að
reisa húsið segir Engilbert að byrj-
að verði að steypa það í sumar, en
fyrst þurfi að rífa núverandi hús á
lóðinni og verði byrjað á því afar
fljótlega.
Spurður hverjir það séu helst
sem ráði við að kaupa fasteign á
borð við þessa segir Svavar Geir
Svavarsson, sölumaður hjá Fast-
eignasölunni Klöpp, þann hóp sí-
fellt fara stækkandi. Æ fleiri Ís-
lendingar horfi til fasteigna í þeim
verðflokki sem hér sé um að ræða.
Til stendur að reisa 660 fermetra hús við Grenimel
„Eitt glæsilegasta
hús landsins“
Morgunblaðið/Jim Smart
Hafist verður handa við að rífa núverandi hús á Grenimel 46 um næstu
mánaðamót til að rýma fyrir einu glæsilegasta húsi landsins.
Útlitsteikning af nýja einbýlishúsinu sem fyrirhugað er að reisa við Greni-
mel 46. Það verður eitt það stærsta á landinu, eða 660 fermetrar.
SIGURÐUR Baldurs-
son hæstaréttarlög-
maður lést föstudag-
inn 28. janúar, 82 ára
að aldri.
Sigurður var fædd-
ur 4. janúar 1923 í
Reykjavík. Foreldrar
hans voru Baldur
Sveinsson, skólastjóri
á Ísafirði og síðar rit-
stjóri Vísis, og Maren
Ragnheiður Friðrika
Pétursdóttir, kennari,
húsfreyja og umboðs-
maður Happdrættis
Háskóla Íslands.
Sigurður varð stúdent frá
Menntaskólanum í Reykjavík árið
1942 og cand. juris frá Háskóla Ís-
lands 1948. Hann öðlaðist réttindi
sem héraðsdómslögmaður árið
1949 og sem hæstaréttarlögmaður
árið 1960. Hann var fulltrúi hjá
Ragnari Ólafssyni hrl. í Reykjavík
1948–67, er hann stofnaði eigin
lögfræðiskrifstofu í
Reykjavík sem hann
rak fram til sjötugs.
Af félags- og trún-
aðarstörfum má nefna
að Sigurður var ritari
læknaráðs 1952–84,
endurskoðandi Stúd-
entafélags Reykjavík-
ur um áratuga skeið,
formaður Íslenzk-
þýska menningar-
félagsins (síðar félags-
ins Íslands – D.D.R.)
1966–72 og í yfirkjör-
stjórn Reykjavíkur
1967–87. Árið 1971 var
Sigurður sæmdur Gullstjörnu
Stúdentafélags Reykjavíkur og ári
síðar Gullmerki Liga für Völker-
freundschaft der DDR.
Eftirlifandi eiginkona Sigurðar
er Lilja Bernhöft. Fyrri eiginkona
Sigurðar var Anna Gísladóttir og
eignuðust þau tvo syni, Baldur og
Gísla.
Andlát
SIGURÐUR
BALDURSSON
VALGERÐUR Sverrisdóttir við-
skiptaráðherra segir að frumvarp til
laga um breytingar á samkeppnis-
lögum verði lagt fram á Alþingi á
næstunni. Frumvarpið sé í samræmi
við niðurstöður nefndar ráðherra
um íslenskt viðskiptaumhverfi, sem
kynntar voru sl. haust.
Frumvarpinu muni jafnframt
fylgja tvö önnur frumvörp. Annað
þeirra fjalli um óréttmæta viðskipta-
hætti og gagnsæi markaðarins en
hitt fjalli um talsmann neytenda, en
samkvæmt frumvarpinu verður það
embætti stofnað. Að sögn Valgerðar
er gert ráð fyrir því að lögin, verði
þau samþykkt, taki gildi á þessu ári.
„Ég er að leggja fram frumvarp
til breytinga á samkeppnislögum,“
segir hún, og tekur fram að ekki sé
verið að leggja fram frumvarp um
hringamyndun, eins og stóð í Morg-
unblaðinu í gær. „En auðvitað má
segja að samkeppnislögin séu að
hluta til lög gegn hringamyndun því
þar er verið að setja skorður við því
að fyrirtæki séu tekin yfir og sam-
einuð og svo framvegis.“ Hún minn-
ir þó á að fyrrgreind nefnd um ís-
lenskt viðskiptaumhverfi hafi komist
að þeirri niðurstöðu að breyta ætti
samkeppnislögum í stað þess að
setja sérstaka löggjöf um hringa-
myndun.
Valgerður ítrekar að frumvörpin
þrjú gangi út á að breyta Sam-
keppnisstofnun í Samkeppniseftirlit.
Sérstök þriggja manna stjórn verð-
ur sett yfir eftirlitið en samkeppn-
isráð verður lagt niður. Ákveðin
verkefni, sem Samkeppnisstofnun
hefur sinnt, verða jafnframt samein-
uð Löggildingarstofu í nýrri stofn-
un, Neytendastofu. Auk þess er gert
ráð fyrir því að starfrækt verði emb-
ætti talsmanns neytenda.
Nefnd að störfum
Valgerður segir að í frumvörpun-
um sé ekki fjallað um valdsvið sam-
keppnisyfirvalda gagnvart ríkislög-
reglustjóra. „Forsætisráðherra
hefur skipað nefnd sem er að fjalla
um þetta efni, þ.e. að hve miklu leyti
skuli beita stjórnvaldssektum sem
viðurlögum. Og þetta varðar líka
Fjármálaeftirlitið.“
Spurð um hugsanlegar niðurstöð-
ur þeirrar nefndar segir hún.
„Nefndin hefur frítt spil með það að
fara yfir öll þessi mál og hvernig t.d.
aðrar þjóðir gera þetta.“
Þrjú frumvörp um
samkeppnismál lögð
fram á næstunni
FÉLAG leikskólakennara sam-
þykkti í allsherjaratkvæða-
greiðslu nýjan kjarasamning
félagsins og launanefndar
sveitarfélaganna sem undirrit-
aður var í síðasta mánuði.
Á kjörskrá voru 1.491. At-
kvæði greiddu 1.365, eða 91,5%.
„Já“ sögðu 880, eða 64,5%. „Nei
“ sögðu 443, eða 32,5%. Auðir
seðlar og ógildir voru 42, eða
3,0%.
Samþykktu
samning
TÖLUVERÐUR erill var hjá
lögreglunni í Reykjavík aðfara-
nótt sunnudags, meiri en hefð-
bundið getur talist, að hennar
sögn.
Þurftu lögreglumenn að hafa
afskipti af fjölmörgum ölvuðum
og slagsmálaglöðum í borginni.
Þá voru tveir teknir fyrir ölvun
við akstur.
Lögreglan segir erfitt að
segja til um ástæður þess að
fleira fólk var í bænum þetta
kvöld en verið hefur undanfar-
ið. Huganlegt sé að veðrið spili
þarna inn í, hlýrra var um
helgina en verið hefur undan-
farið.
Óvenju mik-
ill erill hjá
lögreglu