Fréttablaðið - 15.02.2003, Blaðsíða 10
10 15. febrúar 2003 LAUGARDAGUR
Verkefnið leggst vel í mig. Égveit að þetta verður mjög
erfitt og krefjandi en jafnframt
skemmtilegt. Það hlýtur að vera
spennandi að starfa við þetta,“
segir Helena Ólafsdóttir, sem í
vikunni var ráðin þjálfari A-
landsliðs kvenna í knattspyrnu.
Helena er fædd árið 1969 og
er 33 ára gömul. Sjálf byrjaði hún
að sparka bolta þegar hún var um
það bil 10 ára, með strákunum
austur í Neskaupstað.
„Ég ólst þar upp til ellefu ára
aldurs og var þar mikið á sumrin.
Ég er ekki úr neinni fótboltaætt
eða þannig. Áhuginn kviknaði
einhvern veginn, kannski var ég
svona strákastelpa,“ segir Hel-
ena um uppvaxtarár sín.
Helena fór að æfa fótbolta
með Víkingi þegar hún var þrett-
án ára. Hún segir það hafa verið
afar frábrugðið því sem gerist
nú.
„Á þessum tíma spiluðu eigin-
lega allar Víkingsstelpurnar
handbolta á veturna enda hefðin
fyrir handboltanum mikil þar. Í
maí fluttu þær sig yfir í fótbolt-
ann. Ég var aðeins í handboltan-
um með þeim, þurfti að halda
mér í formi á veturna,“ segir
Helena en bætir við að fótboltinn
hafi alltaf verið númer eitt.
Árið 1986 var kvennaboltinn í
Víking lagður niður. Helena hóf
leit að nýju liði og þá kom bara
eitt lið til greina, Vesturbæjar-
veldið KR.
KR-fjölskyldan
„Ég man að ég fór á æfingu hjá
Fram og KR. Mér leist betur á allt
hjá KR og ákvað því að fara þang-
að,“ segir Helena. Hún lék með
Vesturbæjarliðinu til ársins 2002
að undanskildu einu ári þegar hún
lék með Skagastelpum.
„Það var frábært að vera hjá
KR. Þetta var svo góður kjarni og
mjög félagslegt. Við náðum vel
saman og héldum mikið saman
fyrir utan boltann. Þetta er eigin-
lega eins og ein stór fjölskylda,“
segir Helena. Hún er fjórði leikja-
hæsti leikmaður efstu deildar
kvenna frá upphafi, hefur leikið
193 leiki. Hún er sú þriðja marka-
hæsta frá upphafi, hefur skorað
154 mörk og var átta sinnum valin
í landsliðið.
Á þeim rúmlega 20 árum sem
Helena hefur leikið knattspyrnu
hefur margt breyst. Hún segir að
stelpur í dag séu farnar að æfa
eins og karlarnir. Keppnistímabil-
ið byrjar nú í lok október eða
byrjun nóvember en áður hófust
æfingar í maí. „Þegar ég var að
byrja þótti gott ef boltinn gekk á
milli þriggja leikmanna,“ segir
Helena. „Það er mikill munur á
knattspyrnunni nú og metnaður-
inn orðinn miklu meiri, eins og
sést á landsliðinu. Eftir að þetta
opnaðist með háskólana í Banda-
ríkjunum hefur þetta stóraukist.
Þó nokkrar íslenskar stelpur æfa
með bandarískum háskólaliðum
og leika með yfir vetrartímann.“
Erfitt að fylgja
árangrinum eftir
Helena er íþróttakennari að
mennt og hefur lokið þriðja stigi
í þjálfun hjá Knattspyrnusam-
bandi Íslands. Hún þjálfaði yngri
flokka KR um árabil en tók við
meistaraflokki Vals í fyrra.
„Það var farið að blunda í mér
hvort ég ætti að leggja þjálfun
fyrir mig þar sem ég ætlaði að
leggja skóna á hilluna. Síðan kom
þetta tilboð frá Val og eftir að
hafa íhugað það ákvað ég að slá
til. Þar var mjög mikill efniviður
og langt síðan þær höfðu unnið
eitthvað. Ég var líka alltaf ákveð-
in að byrja einhvers staðar ann-
ars staðar en í mínu liði. Ég var
heimagangur í Vesturbænum og
fannst því sniðugt að kynnast
nýjum hlutum,“ segir Helena.
Hún segir KR-fjölskylduna hafa
tekið því vel þegar hún tilkynnti
henni að hún væri á leið yfir í
Val. „KR-ingarnir tóku þessu
rosalega vel og studdu mig í því
eins og þeir gera í öllu sem ég hef
tekið mér fyrir hendur. Það var í
mesta bróðerni og allir skildu
það.“
Valur hafnaði í þriðja sæti Ís-
landsmótsins, sem verður að telj-
ast viðunandi árangur, enda
Valsliðið að mestu skipað ungum
og efnilegum leikmönnum með
þjálfara á sínu fyrsta ári.
Íslenska landsliðið hefur náð
frábærum árangri undir stjórn
Jörundar Áka Sveinssonar. Liðið
komst meðal annars í umspil
heimsmeistaramótsins í knatt-
spyrnu en féll úr leik gegn Eng-
lendingum. Helena segist búast
við að miklar kröfur verði gerðar
við liðið og að erfitt verði að
fylgja árangrinum eftir.
„Nú er nýtt verkefni og það er
mitt og liðsins að leysa það á sem
bestan hátt. Það er markmiðið,“
segir Helena.
Landsliðið mætir Bandaríkja-
mönnum, núverandi heimsmeist-
urum, í Charlotte á morgun. Jör-
undur Áki stýrir liðinu þar í síð-
asta sinn en Helena verður hon-
um til halds og trausts.
Næsta stórmót landsliðsins er
undankeppni Evrópumótsins og
er Ísland í geysisterkum riðli
með Rússlandi, Póllandi, Frakk-
landi og Ungverjalandi.
Sonurinn fékk
nóg af fótbolta
Eins og áður hefur komið
fram ólst Helena upp á Neskaup-
stað. Hún fluttist þaðan þegar
hún var ellefu ára og fór til
Hafnarfjarðar, sem oft hefur
verið nefndur „vagga handbolt-
ans“.
„Ég var ekkert í fótbolta þau
tvö ár sem ég bjó þar. Ég var í
handbolta og frjálsum íþróttum.
Síðan flutti ég í Breiðholtið og þá
hófst þessi fótboltaáhugi fyrir
alvöru,“ segir Helena.
Helena útskrifaðist sem
íþróttakennari frá Kennarahá-
skólanum árið 1992. Hún kenndi
eitt ár í Hagaskóla en hefur
kennt við Hólabrekkuskóla síð-
an. Hún bjó einnig í hálft ár á
Ólafsvík þar sem hún starfaði
meðal annars við þjálfun.
Helena býr með sjö ára göml-
um syni sínum, Ólafi Daða.
„Hann hefur ekki nokkurn
áhuga á fótbolta. Hann hefur
mætt með mér á æfingar síðan
hann var pínulítill en hefur ekki
haft neinn áhuga. Ætli hann hafi
ekki bara fengið nóg,“ segir Hel-
ena.
Helena segist ekki hafa mik-
inn tíma fyrir önnur áhugamál
en fótbolta.
„Ætli önnur áhugamál séu
ekki að gera eitthvað uppbyggi-
legt með syni mínum. Vinnudag-
urinn er oft langur svo ég reyni
að gefa mér tíma með honum.
Mér finnst líka ofsalega gaman
þegar við komumst út á land og
þá reynum við að ferðast austur
og til Ólafsvíkur,“ segir Helena,
sem ber greinilega enn miklar
taugar til Neskaupstaðar. Hel-
ena vonast til að geta ferðast
meira þegar öllu sparki er lokið
hjá henni.
kristjan@frettabladid.is
Helena Ólafsdóttir er nýráðinn þjálfari kvennalandsliðsins í knatt-
spyrnu. Hóf snemma að leika knattspyrnu í Neskaupstað. Lék um ára-
bil með KR en tók óvænt við þjálfun Vals í fyrra.
Undankeppni Evrópumótsins næsta verkefni.
Strákastelpa frá
Neskaupstað
LANDSLIÐSÞJÁLFARI KVENNA Í KNATTSPYRNU
Helena Ólafsdóttir hefur kennt í Hólabrekkuskóla í tíu ár og kann því vel. Hún er fjórði leikjahæsti leikmaður Íslandsmótsins frá upphafi og sá þriðji markahæsti.
ÓLST UPP FYRIR AUSTAN
Helena hóf feril sinn með Þrótti Neskaupstað. Hún fluttist þó stuttu síðar til Reykjavíkur
og hóf að leika með Víkingi áður en hún skipti yfir í KR. Helena er önnur til vinstri í efstu
röð. Þorsteinn Halldórsson, þjálfari Hauka, er þriðji frá vinstri og Birkir Sveinsson, móta-
stjóri KSÍ, situr fyrir framan Helenu.
UNDIRRITUN SAMNINGSINS
Helena var í vikunni ráðin þjálfari A-landsliðs kvenna í knattspyrnu.
FRÉTTAB
LAÐ
IÐ
/VILH
ELM
FRÉTTAB
LAÐ
IÐ
/RÓ
B
ERT