Fréttablaðið - 25.06.2004, Blaðsíða 12

12 25. júní 2004 FÖSTUDAGUR
MÚR MÓTMÆLT
Palestínskir þorpsbúar safnast saman til að
mótmæla byggingu aðskilnaðarmúrs
Ísraela en þetta var fyrsti dagur byggingar
múrsins á svæðinu. Einnig gerðu þeir til-
raun til þess að fjarlægja gaddavír sem
ísraelskar hersveitir höfðu komið með.
Húsfélag alþýðu kallað til ábyrgðar:
Hefur ekki sent sam-
þykktir til kærunefndar
FÉLAGSMÁL Húseigendafélagið
hefur sent formanni Húsfélags
alþýðu kröfu um að stjórn
félagsins efni skyldur sínar og
sendi kærunefnd fjöleignarhúsa
nýjar samþykktir sínar til um-
sagnar, samkvæmt einróma
ákvörðun aðalfundar félagsins.
Harður ágreiningur kom upp
í Húsfélagi alþýðu í vetur þegar
stjórn þess hugðist leggja nýjar
samþykktir sínar fyrir aðal-
fund. Var það álit margra
félagsmanna að samþykktirnar
gæfu stjórninni ótakmarkað
vald. Aðalfundurinn samþykkti
því að vísa þeim til kæru-
nefndarinnar. Þangað voru þær
ekki enn komnar í gær, þrátt
fyrir að aðalfundur hefði verið
haldinn í mars.
Húseigendafélagið hefur því
fyrir hönd umbjóðenda sinna
sem eru í Húsfélagi alþýðu sent
formanni félagsins bréf, þar
sem skýringa er óskað á þeim
drætti sem orðið hafi á að erindi
aðalfundarins hafi verið sent til
kærunefndarinnar
Segir að eftir aðalfundinn
„hafi rekið á reiðanum“. Meðan
málið sé óútkljáð ríki bagaleg
óvissa um réttarstöðu félagsins
og íbúðareigenda. Er allri
ábyrgð vegna þess lýst á hendur
stjórnar Húsfélags alþýðu. ■
Hverfisgötu verður
lokað við Hlemm
Samþykkt hefur verið að unnin verði tillaga að nýju deiliskipulagi Hlemmsvæðisins í tengslum
við breytingar á leiðakerfi Strætós bs. Gert er ráð fyrir að Hverfisgötu verði lokað
milli Snorrabrautar og Rauðarárstígs og lega Laugavegar breytist.
SKIPULAGSMÁL Nýjar hugmyndir
Reykjavíkurborgar í skipulags-
málum gera ráð fyrir að Hverfis-
götu verði lokað milli Snorra-
brautar og Rauðarárstígs. Skipu-
lags- og byggingarnefnd hefur
samþykkt að unnin verði tillaga
að nýju deiliskipulagi svæðisins
og stendur hagsmunaaðila-
kynning yfir.
„Það á að taka í notkun nýtt
leiðakerfi fyrir almenningsvagna
á öllu höfuðborgarsvæðinu og
Strætó bs. hefur óskað eftir að
koma fyrir á Hlemmi nýrri og
stækkaðri aðalstöð og biðstöð
fyrir almenningsvagna,“ segir
Jóhannes S. Kjarval arkitekt, sem
hefur umsjón með skipulagsmál-
um miðborgarinnar. Umsvif
strætisvagna á Hlemmi aukast
verulega við breytingarnar að
sögn Jóhannesar en gert er ráð
fyrir að Hlemmur verði endastöð
sex stofnleiða.
„Í breytingunum felst meðal
annars að lokað verður fyrir
almenna umferð fyrir framan lög-
reglustöðina á Hverfisgötu,“
segir Jóhannes. Þar er áætlað að
almenningsvagnar komist fyrir í
götustæðinu. Þá er gert ráð fyrir
að Laugavegurinn verði tengdur
beint í gegnum Hlemmsvæðið að
sögn Jóhannesar. „Til að svara
þessari breytingu á umferðar-
kerfinu er einnig gert ráð fyrir
fleiri breytingum í næsta ná-
grenni sem verið er að vinna að,“
bætir Jóhannes við.
Að sögn Ásgeirs Karlssonar,
framkvæmdastjóra Strætós bs.,
er líklegt að útfærð verði ein-
hvers konar biðstöð eða viðkomu-
staður á göturýminu framan við
lögreglustöðina. Engar breytingar
á húsinu við Hlemm liggja hins
vegar fyrir í augnablikinu. „Húsið
verður þarna áfram fyrst um sinn
í óbreyttri mynd,“ segir Ásgeir.
„Hins vegar munum við væntan-
lega í tengslum við þessa
breytingu á umferðarskipulagi á
svæðinu gera einhvers konar
skoðun á því hvernig hentugast sé
að leysa okkar þarfir þar.“
Áformað er að vinna tillögu að
deiliskipulagi á næstu vikum og
er gert ráð fyrir að hún verði
auglýst lögformlega á tímabilinu
frá 7. júlí til ágústloka, að því er
fram kemur í auglýsingu frá
skipulags- og byggingarsviði
Reykjavíkurborgar.
helgat@frettabladid.is
■ ASÍA
TEKIST Í HENDUR
Leiðtogi Palestínumanna, Yasser Arafat,
tekur í höndina á forstöðumanni egypsku
leyniþjónustunnar, Omar Suleiman, á fundi
þeirra í höfuðstöðvum Arafats í gær.
Forsætisráðherra Ísraels:
Lætur ekki
undan
þrýstingi
JERÚSALEM, AP Forsætisráðherra
Ísraels, Ariel Sharon, segist ekki
ætla að láta undan þrýstingi Egypta
til þess að hefja viðræður við
Palestínumenn á ný. Hann fagnar
þó áhuga Egypta á því að vinna að
öryggismálum á Gaza-svæðinu eftir
fyrirhugað brotthvarf ísraelskra
hersveita.
Egyptar hafa verið í samninga-
viðræðum bæði við Ísraelsmenn og
Palestínumenn til þess að koma í
veg fyrir öngþveiti á Gaza eftir
brotthvarf ísraelskra hersveita sem
áætlað er á næsta ári. Omar Suleim-
an, forstjóri egypsku leyniþjónust-
unnar, hitti palestínska ráðamenn í
gær og hefur í hyggju að hitta ísra-
elska ráðamenn síðar til að ræða um
brotthvarfið. ■
AÐALSTRÆTI
Borgarráð hefur skipað verkefnisstjórn
vegna minjaskálans sem reisa á
í nýju hóteli við strætið.
Minjaskálinn í Aðalstræti:
Verkefnis-
stjórn skipuð
FORNMINJAR Borgarráð hefur sam-
þykkt að skipa verkefnisstjórn þrigg-
ja aðila til að fara með öll málefni
tengd menningarminjum í Aðalstræti.
Hlutverk verkefnisstjórnar verð-
ur að sjá til þess að byggingafram-
kvæmdir við minjaskála þann er
reisa á í tengslum við nýtt hótel í Að-
alstræti taki mið af sýningu forn-
minja og geri skálann þannig úr
garði að nýting hans verði sem allra
best. Skal stjórnin enn fremur skila
borgarráði skýrslu fyrir áramót og
skulu liggja þar fyrir allar helstu
upplýsingar og kostnaðaráætlun.
Ljúka á byggingu minjaskálans vor-
ið 2005. ■
ÓLYMPÍUSPILLING Stjórnendur
Ólympíuleikanna í Peking 2008 hafa
lagt mikla áherslu á að engin spill-
ing verði liðin. Það var þeim því
mikið áfall þegar í ljós kom að millj-
arði króna var varið í að byggja
íbúðir fyrir starfsmenn ólympíu-
nefndarinnar og hundruðum millj-
arða í ólöglegar fjárfestingar.
Breytingar á aðalskipulagi samþykktar:
Uppbygging íbúða
á Mýrargötusvæði
SKIPULAGSMÁL Tillaga að breytingu
á aðalskipulagi Mýrargötusvæðis
var samþykkt í borgarráði á
þriðjudag. Breytingarnar fela í
sér að slippastarfsemi hverfur frá
svæðinu og í staðinn verður byggt
upp íbúða- og skrifstofusvæði
ásamt hafnarstarfsemi. Skipu-
lags- og byggingarnefnd hafði
áður samþykkt breytingarnar.
Gert er ráð fyrir um 200 nýjum
íbúðum á svæðinu og mun hluti
þeirra ná inn á svæði sem nú er
einungis ætlað hafnar- og atvinnu-
starfsemi. Ekki verður hins vegar
gert ráð fyrir íbúðum á hafnar-
bakkasvæðinu.
Þá er gert ráð fyrir að í fram-
tíðinni verði Mýrargötu breytt og
hún fari í stokk niður í jörðina, að
sögn Haralds Sigurðssonar, skipu-
lagsfræðings hjá Reykjavíkur-
borg. „Hugmyndin er sú að þá
verði eldri götur í Vesturbænum
framlengdar niður að höfninni,“
segir Haraldur. ■
HÚSFÉLAG ALÞÝÐU
Húsfélag alþýðu stendur á fornum grunni. Það er bæði húsfélag og eignarhaldsfélag, sem
upphaflega var stofnað utan um byggingu verkamannabústaða í fimm fjölbýlishúsum.
MÝRARGÖTUSVÆÐIÐ
Svona er gert ráð fyrir að Mýrargötu- og slippsvæði líti út eftir breytingar á aðalskipulagi
sem hefur verið samþykkt í borgarráði.
SKIPULAGSBREYTINGAR VIÐ HLEMM
Breytingar á skipulagi gera ráð fyrir að Hverfisgötu verði lokað við Hlemm. Þá er gert ráð fyrir að lega Laugavegar breytist.
Myndin er úr skýringaruppdrætti og sýnir hugsanlega stöðu almenningsvagna við Hlemm.
FR
ÉT
TA
B
LA
Ð
IÐ
/V
IN
N
U
ST
O
FA
N
Þ
VE
RÁ
Ra
uð
ar
ár
st
íg
ur
Lögreglustöðin
KB-BANKI
Laugavegur
Sn
or
ra
br
au
t
Hverfisgata