Fréttablaðið - 25.06.2004, Blaðsíða 38
26 25. júní 2004 FÖSTUDAGUR
Útsláttarkeppnin er framundan á EM í Portúgal
Silfurmark í stað gullmarks
EM Í FÓTBOLTA Það verður ekkert
gullmark á þessu Evrópumóti í
knattspyrnu en eins og menn
muna hafa tveir síðustu úrslita-
leikir Evrópukeppninnar ráðist á
svonefndu gullmarki. Oliver Bier-
hoff tryggði Þjóðverjum sigur á
Tékkum með slíku marki árið
1996 og fjórum árum síðar var
það mark Frakkans David
Trezeguet sem tryggði sigur á
Ítölum eftir aðeins 13 mínútur
voru liðnar af framlengingunni.
UEFA hefur breytt reglunni sem
gerir út um leiki þegar úrslitin
ráðast ekki á venjubundnum 90
mínútum. Í stað gullmarksins
kemur nú silfurmark. Ráðist
úrslitin ekki í venjulegum
leiktíma verður framlengt um
tvisvar sinnum 15 mínútur. Verði
enn jafnt kemur vítaspyrnur-
keppni til með að skera út um sig-
urvegara. Skori annað liðið hins-
vegar í framlengingunni þá lýkur
leiknum ekki strax heldur hefur
hitt liðið tækifæri til að jafna leik-
inn til enda þess hálfleiks sem er í
gangi. Takist það verður annað-
hvort spilaður seinni hállfeikur
framlengingar, gerist það á fyrstu
15 mínútnum eða gripið til hinnar
sívinsælu vítaspyrnukeppni til að
skera út um sigurvegara. Það eru
nú liðin 28 ár síðan vítaspyrnu-
keppni réði síðast úrslitum í Evr-
ópukeppni en það var þegar Tékk-
ar unnu Þjóðverja, 5-3, í víta-
keppni í úrslitaleiknum árið 1976.
Nú gætu úrslitin á Evrópumótinu
í Portúgal ráðist á silfurmarki í
fyrsta sinn á stórmóti. ■
Ekkert b-lið til hjá Tékkum
Karel Brückner, þjálfari Tékka, var í skýjunum eftir sigurinn á Þjóðverjum.
EM Í FÓTBOLTA Einn gráhærður eldri
maður gat verið manna stoltastur
eftir leik Tékka og Þjóðverja í D-
riðli Evrópumótsins í Portúgal.
Hinn 64 ára Karel Brückner hafði
stýrt Tékkum til sigurs í öllum
þremur leikjunum í D(auða)-riðl-
inum en sá síðasti á Þjóðverjum
var kannski sætastur því sex leik-
menn léku þar sinn fyrsta leik á
mótinu og karlinn hvíldi níu lykil-
menn frá því í fyrstu tveim leikj-
unum. Tékkneska liðið hefur bæði
sýnt skemmtilegan fótbolta (sjö
mörk í þremur leikjum) sem og
mikinn karakter því í öllum þrem-
ur leikjunum lentu Tékkar undir
en komu til baka og tryggðu sér
sigur.
„Þetta var vel gert hjá mínum
mönnum en það pirraði mig mikið
fyrir leikinn að lesa að við værum
að tefla fram einhverju b-liði í
þessum leik. Tékkneska landsliðið
hefur ekkert b-lið frekar en við
höfum a-lið. Allir leikmenn í 23
manna leikmannahópi okkar eru
hluti af sama liði, liði Tékklands,“
sagði Karel Brückner, en þetta
var fyrsti sigur Tékka á Þjóðverj-
um (fyrir utan leiki sem fóru í
vítakeppni) síðan þeir unnu vin-
áttulandsleik þjóðanna 1964. Liðin
voru að mætast í 21. sinn og var
þetta aðeins fjórði sigur Tékka.
„Það var mjög ánægjulegt að
vinna þá loksins en það voru fleiri
ástæður til að kætast yfir þessum
leik,“ bætti Brückner við og ýjaði
að því að hann hefði sýnt og sann-
að styrk leikmannahópsins.
Það eru bara tvö ár síðan
þessi viðkunnalegi karl tók við
tékkneska landsliðinu á miklum
vonbrigðatímum í kjölfar þess
að liðinu mistókst að tryggja sér
þátttökurétt á HM 2002. Síðan
þá hefur Karel Brückner ekki
breytt miklu í leikstíl en miklu
frekar lagt kapp á að móta
sterka liðsheild og nýta bæði
eldri og reyndari leikmenn sem
og unga framtíðarmenn tékk-
neskrar knattspyrnu. Karel
Brückner hóf sinn þjálfaraferil í
nágrannaríkinu Slóvakíu en hann
hafði sannað sig sem þjálfari í
heimalandinu þegar hann tók við
þjálfun yngri landsliða Tékka.
Hann stýrði meðal annars 21 árs
landsliðinu til silfurverðlauna á
Evrópumótinu. Brückner er
þekktastur fyrir gott leikskipu-
lag en þegar hann tók við A-
landsliðinu breytti hann ekki
miklu nema einna helst að taka
inn yngri leikmenn sem hann
hafði hjálpað að blómstra hjá
yngri landsliðinum Tékka. „Það
geta allir komið og spilað fyrir
mitt lið. Það skiptir engu hvort
þeir eru ungir eða gamlir,“ sagði
Brückner, sem hefur búið til
skemmtilega blöndu af yngri og
eldri leikmönnum. Það verður
ekki litið framhjá Tékkum þegar
spáð er fyrir um verðandi Evr-
ópumeistara í Portúgal. Tékkar
eru taplausir og hafa unnið 10 af
11 leikjum sínum í keppninni til
þessa, þar af þá átta síðustu. Hol-
lendingar hafa verið lagðir tvis-
var að velli í þessari sigurhrinu
en þeir eru jafnframt þeir einu
sem hafa náð stigi af Tékkum í
keppninni, liðin gerðu 1-1 jafn-
tefli í Rotterdam 29. mars í
fyrra. Vegna frammistöðu Tékka
þurftu Hollendingar að fara í
umspil til að tryggja sig inn í
lokakeppninna eftir að hafa ver-
ið í mikilli hættu að sitja eftir í
riðlakeppninni þó svo að Tékkar
sjálfir hafi síðan gulltryggt þá
inn í átta liða úrslitin. ■
Lyfjamál í frjálsum:
Montgomery
í langt bann?
FRJÁLSAR ÍÞRÓTTIR Bandaríski
spretthlauparinn Tim Mont-
gomery, heimsmethafi í 100
metra hlaupi, gæti átt yfir höfði
sér langt bann vegna meintrar
ólöglegrar lyfjanotkunar. Banda-
ríska lyfjastofnunin hyggst kæra
hann þrátt fyrir að Montgomery
hafi aldrei fallið á lyfjaprófi eða
neitað að gangast undir slíkt próf
þegar eftir því hefur verið leitað.
Ástæða þess að Montgomery
er kærður er tengsl hans við
lyfjafyrirtækið Balco sem varð
uppvíst að því að framleiða ólög-
leg fæðubótarefni. Lögfræðingar
Montgomery skilja hvorki upp né
niður í þessari kæru og líkja
henni við ofsóknir McCarthys á
hendur kommúnistum í
Bandaríkjunum á sínum tíma.
Eiginkona Montgomery, hin
fræga Marion Jones, er einnig
undir eftirliti en hefur ekki verið
kærð. ■
Útvarp KR fylgist með
meistaradeildinni:
Beint frá
drættinum
FÓTBOLTI Útvarp KR, sem sendir
út á tíðninni fm 98,3, verður með
beina útsendingu þegar dregið
verður í forkeppni meistara-
deildar Evrópu í knattspyrnu þar
sem KR er í pottinum. Útsending-
in hefst kl. 10 og verður Jónas
Kristinsson, stjórnarformaður
KR Sports, í beinni frá Sviss þar
sem drátturinn fer fram.
Willum Þór Þórsson, þjálfari
KR, og Kristján Finnbogason,
fyrirliði liðsins, verða í hljóðveri
útvarpsins á meðan drættinum
stendur og ræða möguleika
liðsins gegn væntanlegum and-
stæðingum. ■
EKKERT GULLMARK Í ÁR
David Trezeguet skoraði gullmark fyrir Frakka fyrir fjórum árum
en getur ekki endurtekið leikinn í ár.
KAREL BRÜCKNER KANN TIL VERKA
Þjálfari Tékka hefur stýrt landsliðinu til sigurs í átta leikjum í röð á Evrópukeppninni, þar af öllum þrem í dauðariðli úrslitakeppninnar.
TIM MONTGOMERY
Á leið í langt keppnisbann.