Fréttablaðið - 08.08.2004, Blaðsíða 8

Formannskjör í Heimdalli
Helga Árnadóttir tölvunarfræðingur til-
kynnti í vikunni að hún gæfi kost á sér til
formennsku í Heimdalli, félagi ungra sjálf-
stæðismanna í Reykjavík. Stuðningsmenn
hennar eru þegar farnir að birta blaða-
greinar þar sem lof er borið á hæfileika
hennar og reynslu. „Helga er prýdd öllum
þeim kostum sem við teljum nauðsyn-
lega til þess að laða fólk að starfi flokks-
ins jafnt sem baráttuhug fyrir frjálslyndum
hugsjónum Heimdallar,“ segja
tvær stallsystur hennar í
Morgunblaðinu í gær. Þá er
haldið úti sérstakri vefsíðu
Helgu til stuðnings. Verði
Helga formaður yrði hún
önnur konan til að gegna
embættinu. Hin er Elsa B.
Valsdóttir læknir. Talið er að Helga njóti
stuðnings fráfarandi stjórnar Heimdallar.
Fer Bolli fram?
Enn er óljóst hvort einhver annar gefur
kost á sér enda hefur aðalfundur félags-
ins ekki verið boðaður og því ekki einu
sinni vitað hvenær kosningin á að fara
fram. Nafn Bolla Skúlasonar Thoroddsen
verkfræðinema heyrist þó víða nefnt í
þessu sambandi en hann var í framboði í
fyrra en dró sig til baka eftir að stjórn
Heimdallar neitaði að samþykkja inn-
tökubeiðnir rúmlega eitt þúsund stuðn-
ingsmanna hans. Var mikill hiti í þeim
deilum en Nú er búið að semja nýjar
reglur um inntöku félagsmanna þannig
að ekki ætti ágreiningur um það efni að
koma í veg fyrir framboð hans.
Málgögn á netinu
Fylkingar ungra sjálfstæðismanna eiga
hver sinn vettvang á netinu. Núverandi
stjórn heldur út vefiritinu Frelsi.is, sem er
opinbert málgagn Heimdallar, en mun
einnig eiga vísan stuðning frá Vefþjóðvilj-
anum á andriki.is. Helga Árnadóttir er
meðal fastra penna á vef ungra sjálfstæð-
iskvenna, Tikin.is. Bolli Thoroddsen er
aftur á móti í liði hinna öflugu deiglu-
penna sem standa á bak við vefritið
Deiglan.com. Líklegt er að kosningabar-
áttan muni að einhverju leyti vera háð
með skrifum í þessi vefrit.
Nafn dálkahöfundar „Frá degi til dags“
misritaðist í blaðinu í gær. Það átti að
vera sme@frettabladid.is en ekki
gm@frettabladid.is
Baráttan fyrir forsetakosningarn-
ar í Bandaríkjunum, sem verða í
nóvember, er farin að harðna svo
að um munar. Nýjasta dæmið um
það er væntanleg bók Unfit for
Command (Óhæfur til forystu)
sem andstæðingar Johns Kerry
forsetaefnis demókrata standa að.
Í bókinni er að finna staðhæfingar
um að Kerry hafi sagt ósatt um
herþjónustu sína í Víetnam fyrir
rúmum þremur áratugum. Hann
hafi fengið hetjudáðsorður sínar
með blekkingum og sé þess
vegna, og af ýmsum ástæðum öðr-
um sem tilgreindar eru, óhæfur
til að gegna forystuhlutverki í
bandarískum stjórnmálum. Þess-
um ásökunum er fylgt eftir með
áhrifamiklum sjónvarpsauglýs-
ingum sem byrjað var að sýna
víðs vegar um Bandaríkin á
fimmtudaginn og eru einnig að-
gengilegar á netinu. Í auglýsing-
unum vitna fyrrum samherjar
Kerrys í Víetnam um að hann sé
ekki trausts verður og hafi hegð-
að sér á ámælisverðan hátt í Ví-
etnam.
Þótt bókin sé enn ekki komin út
hefur nógu margt kvisast út um
efni hennar til að valda uppnámi í
kosningabúðum demókrata enda
sýna skoðanakannanir að fylgi
frambjóðenda er svo jafnt að
hvert atkvæði getur ráðið úrslit-
um. Hafa demókratar sent frá sér
fjörutíu síðna skýrslu þar sem
ásakanirnar eru sagðar hraktar
lið fyrir lið en ólíklegt er að sú
greinargerð eigi eftir að koma
fyrir augu margra kjósenda.
Nokkrar sjónvarpsstöðvar hafa
fallist á að sýna auglýsingarnar
ekki þar sem í þeim sé að finna
órökstuddar og ærumeiðandi
árásir. Í herbúðum Bush forseta
hafa menn neitað að fordæma
auglýsingarnar en hafa hins veg-
ar lýst því yfir að þeir geri engar
athugasemdir við herþjónustu
Kerrys í Víetnam.
Engum blöðum er um það að
fletta að áróður af því tagi sem nú
er hafður í frammi gegn John
Kerry mun hafa áhrif á einhverja
kjósendur. Margföld reynsla úr
bandarískum stjórnmálum sýnir
áhrifamátt slíkra vinnubragða.
Skiptir þá ekki máli þótt um
óhróður sé að ræða sem enga stoð
eigi í veruleikanum.
Þó að kosningavél Bush geti
firrt sig ábyrgð á þeim ásökunum
sem Kerry sætir vegna herþjón-
ustunnar í Víetnam blasir við að
málið er sem hvalreki á fjörur
Repúblikanaflokksins. Heiður og
sæmd í stríði vegur afar þungt í
bandarískum þjóðfélagsumræð-
um. Blettur á hermennskuferil
getur reynst afdrifaríkur. En rétt
er að hafa í huga að sjálfur hefur
Kerry átt frumkvæði að því að
setja herþjónustu sína í Víetnam á
dagskrá kosningabaráttunnar
með því að hreykja sér af henni
og benda á að hann hafi hætt lífi
sínu á vígvellinum en Bush for-
seti komið sér undan herþjónustu.
Var upprifjun á ferli Kerrys í
Víetnam veigamikill þáttur í dag-
skrá flokksþings demókrata í
Boston í síðustu viku. Hóf forseta-
frambjóðandinn ræðu sína með
orðum sem skírskotuðu til her-
manns sem gefur sig fram til að
gegna herþjónustu: „I’m John
Kerry and I’m reporting for
duty.“
Ekki er ólíklegt að ýmsir liðs-
menn Bush hugsi með sér að and-
byr Kerrys vegna þessa máls sé
mátuleg ráðning á hann og sam-
herja hans eftir þær heiftarlegu
persónulegu árásir sem Banda-
ríkjaforseti hefur sætt frá
demókrötum og öðrum andstæð-
ingum á undanförnum mánuðum.
Þeir geta bent á að í áróðrinum
gegn Kerry nú hafi menn greini-
lega lært af vinnubrögðum manna
eins og Michael Moore, hinum
vinstri sinnaða meistara áróðurs-
myndanna. Moore, sem er stuðn-
ingsmaður Kerrys og var skipað í
heiðurssæti við hlið Jimmy
Carters fyrrverandi forseta á
flokksþingi demókrata, hefur á
undanförnum misserum öðrum
mönnum fremur plægt þann jarð-
veg og skapað það andrúmsloft
sem ásakanirnar á hendur Kerrys
eru sprottnar upp úr. Hin snjalla
mynd Moore Fahrenheit 9/11 er í
orði kveðnu heimildarverk en í
reynd hugvitsamlega unninn
áróður þar sem frjálslega er
flakkað á milli staðreynda, tilbún-
ings og getgátna um Bush forseta
og utanríkisstefnu Bandaríkj-
anna. En hún hefur sín áhrif eins
og hinar beinskeyttu sjónvarps-
auglýsingar hermannanna fyrr-
verandi sem stefnt er gegn John
Kerry.
Vonandi verður þess langt að
bíða að íslensk stjórnmál lendi í
því svaði sem hin bandarísku eru
lent í. ■
Í þeirri heitu umræðu sem hefur farið af stað um misþungar
skattabyrðar fjármagnseigenda og launþega, hefur verið undir-
liggjandi þema að fjármagnseigendurnir borgi of lítið. Það er
hins vegar fróðlegt að skoða málið út frá hinni hliðinni, að í
raun séu það launþegarnir sem borgi of mikið og því sé réttara
að jafna skattlagninguna niður á við.
Einföld leið til að lækka tekjuskatta án þess að skerða tekjur
ríkissjóðs er að afnema skattleysismörk og taka í staðinn upp
flatan tekjuskatt á alla launþega. Þar með myndu allir greiða
sama hlutfall í skatt, til dæmis 20 prósent, óháð tekjum.
Verkalýðshreyfingin hefur lagst mjög eindregið gegn þess-
ari hugmynd, meðal annars á þeim forsendum að flatur tekju-
skattur myndi bitna verst á fólki með lægstu tekjurnar. Þetta er
að sjálfsögðu rétt ef lægstu laun myndu ekki hækka. Niðurfell-
ing skattleysismarka gæti þó aldrei farið fram án þess að kjör
þeirra launalægstu yrðu endurskoðuð á þá leið að ráðstöfunar-
tekjur þeirra myndu ekki lækka við breytinguna. Í því sam-
hengi er rétt að hafa bak við eyrað að skattar á fyrirtæki voru
um 50 prósent í kringum 1990 en hafa lækkað skref frá skrefi í
18 prósent og meðal röksemda fyrir þeirri lækkun var að fyrir-
tækin myndu hagnast meira og hefðu fyrir vikið tækifæri til að
greiða starfsfólki betri laun. Það er svo annað mál að svo virð-
ist sem sá hagnaður hafi því miður að mestu farið í að marg-
falda laun æðstu stjórnenda.
En andstaða verkalýðshreyfingarinnar við flatan tekjuskatt
hefur ekki aðeins byggst á óttanum við að kjör þeirra lægst
launuðu myndu versna. Þrátt fyrir að það þyrfti ekki að vera
raunin hefur verkalýðshreyfingin lýst sig andsnúna flötum
tekjuskatti á þeim forsendum að þar með væri tekjujöfnunar-
þáttur skattkerfisins úr sögunni. Byggir sú skoðun á því að auk
tekjuöflunar fyrir ríkissjóð sé markmið skattlagningar að auka
réttlæti í þjóðfélaginu. Sem sagt, með háum jaðarsköttum á
háar tekjur er tekið af launum hátekjufóks og flutt til þeirra
sem hafa lægri laun á þann hátt að að hlutfallslega lægri skatt-
ar eru lagðir á lágu launin en allir njóta sama aðgangs að opin-
berri þjónustu. Þetta er pólitískt viðhorf sem við fáum vonandi
einn daginn tækifæri til að kjósa um.
Það skattaumhverfi sem við búum við í dag býður upp á
meiri mismun á skattlagningu tekna en áður hefur þekkst. Ein
leið til að jafna þetta bil væri að taka upp lægri flatan tekju-
skatt.
Þegar skattar á fyrirtæki lækkuðu, hækkuðu tekjur ríkis-
sjóðs. Sama gæti gerst með lækkun tekjuskattsins. Hvatinn til
að stinga undan skatti myndi minnka, og það myndi ekki síður
draga úr því þekkta sjónarmiði að réttast væri að hreinlega
sleppa yfirvinnunni vegna þess að svo stór hluti af kaupinu
fyrir hana fer í ríkissjóð.
8. ágúst 2004 SUNNUDAGUR
NOKKUR ORÐ
JÓN KALDAL
Launþegar greiða of háan skatt
Allir borgi jafnt
Í fótspor Michaels Moore
FRÁ DEGI TIL DAGS
Einföld leið til að lækka skatta án þess að skerða
tekjur ríkissjóðs er að afnema skattleysismörk og
taka í staðinn upp flatan tekjuskatt.
,,
gm@frettabladid.is
ÚTGÁFUFÉLAG: Frétt ehf. RITSTJÓRI: Gunnar Smári Egilsson FRÉTTASTJÓRI: Sigurjón M. Egilsson RITSTJÓRNARFULLTRÚAR: Steinunn Stefánsdóttir og Jón Kaldal
AUGLÝSINGASTJÓRI: Þórmundur Bergsson RITSTJÓRN, AUGLÝSINGAR OG DREIFING: Skaftahlíð 24, 105 Reykjavík AÐALSÍMI: 550 5000 SÍMBRÉF Á FRÉTTADEILD: 550 5006
NETFÖNG: ritstjorn@frettabladid.is og auglysingar@frettabladid.is VEFFANG: visir.is SETNING OG UMBROT: Frétt ehf. PRENTVINNSLA: Ísafoldarprentsmiðja ehf. Fréttablað-
inu er dreift ókeypis á heimili á höfuðborgarsvæðinu, Suðurnesjum og Akureyri. Einnig er hægt að fá blaðið í völdum verslunum á landsbyggðinni. Fyrirtæki geta fengið blaðið gegn
greiðslu sendingarkostnaðar, 1.100 krónur á mánuði. Fréttablaðið áskilur sér rétt til að birta allt efni blaðsins í stafrænu formi og í gagnabönkum án endurgjalds. ISSN 1670-3871
SUNNUDAGSBRÉF
GUÐMUNDUR MAGNÚSSON
Engum blöðum er
um það að fletta að
áróður af því tagi sem nú er
hafður í frammi gegn John
Kerry mun hafa áhrif á ein-
hverja kjósendur. Margföld
reynsla úr bandarískum
stjórnmálum sýnir áhrifa-
mátt slíkra vinnubragða.
Skiptir þá ekki máli þótt um
óhróður sé að ræða sem
enga stoð eigi í veruleikan-
um.
,,
HEILSAÐ AÐ HERMANNASIÐ
Upphafsorð Johns Kerry á flokksþingi demókrata í síðustu viku voru: „I’m John Kerry and
I’m reporting for duty.“