Fréttablaðið - 17.04.2005, Blaðsíða 62
17. apríl 2005 SUNNUDAGUR
Ágætu viðskiptavinir!
Fjöltækni ehf opnar á nýjum stað 18. apríl að Súðarvogi 14,
gengið inn að vestanverðu.
FJÖLTÆKNI
ehf
Auðunn á spjöld sögunnar
Íslandsmótið í kraftlyftingum, sem háð var á Grand Hotel í gær, olli engum
vonbrigðum og metin féllu í hrönnum eins og búist hafði verið við.
KRAFTLYFTINGAR Kópavogströllið
Auðunn Jónsson náði sögulegum
árangri á mótinu í gær, þegar
hann varð fyrsti Íslendingurinn
til að lyfta yfir 1.100 kílóum í sam-
anlögðu og sigraði með glæsibrag,
eftir sögulegt einvígi við hinn
kornunga Benedikt Magnússon.
Benedikt sagði fyrir mótið að
Auðunn myndi þurfa á öllu sínu
besta til að sigra og það kom á
daginn, því Auðunn náði hámarks-
árangri í öllum greinum og setti
glæsilegt Íslandsmet í einni
rosalegustu keppni þessarar
tegundar í manna minnum.
Norðurlandamet hjá báðum
Auðunn setti tóninn á mótinu
með því að slá eigið Íslandsmet í
hnébeygju í fyrstu tilraun og með
því var ljóst hvert stefndi. Hann
hætti ekki fyrr en hann hafði bætt
Norðurlandametið í greininni og
lyfti best 432,5 kílógrömmum. Í
bekkpressunni heppnaðist fyrsta
lyftan hans ekki sem skyldi, en
hann hristi af sér slenið og snar-
aði upp 300 kílóum, fyrstur Ís-
lendinga.
Benedikt var ekki langt undan í
fyrstu greinunum og var að bæta
sig vel. Þá var aðeins réttstöðu-
lyftan eftir og þar vippaði Bene-
dikt upp 410 kílóum í fyrstu lyftu
sinni og bætti með því eigið Ís-
landsmet um 10 kíló. Þá voru næst
á stöngina 425 kíló, sem hefðu
tryggt honum heimsmetið í grein-
inni, en upp vildi stöngin ekki að
þessu sinni.
Frábært mót
Það var því Auðunn Jónsson
sem hafði sigur í þungavigtinni
með því að lyfta 1.117,5 kílóum í
samanlögðu. Benedikt hafnaði í
öðru sæti og tók 1.090 kíló, sem er
mikil bæting hjá honum, og þriðji
varð Kristinn Óskar Haraldsson
með 960 kíló í samanlögðu. Þetta
er besti árangur sem náðst hefur
á Íslandsmóti frá upphafi og var
það vel við hæfi á 20 ára afmæli
Kraftlyftingasambandsins. Auð-
unn Jónsson var himinlifandi með
árangurinn á mótinu.
„Það var allt að ganga upp hjá
mér og ég kom sjálfum mér á
óvart í hnébeygjunni. Það var líka
gott að ná loksins í 300 kílóin í
bekknum og þetta mót var bara
frábært í alla staði. Það er gaman
að hafa þessa góðu samkeppni,
troðfullt hús af fólki og frábæra
stemmingu,“ sagði Auðunn, sem
náði öðrum besta árangri allra
tíma í samanlögðu á mótinu í gær.
Benedikt Magnússon var
dálítið súr að keppni lokinni í gær,
eftir að heimsmetstilraun hans
mistókst, en sagðist þó geta unað
við árangurinn. „Ég hefði
auðvitað viljað slá heimsmetið,
því ég veit ég get það. Ég get aftur
á móti ekki kvartað yfir því að
setja Íslands- og Norðurlandamet
og bæta mig um 90 kíló í
samanlögðu,“ sagði hið unga
heljarmenni. baldur@frettabladid.is
KÓPAVOGSTRÖLLIÐ TEKUR Á ÞVÍ Auðunn Jónsson var maður dagsins á Íslands-
mótinu í kraftlyftingum í gær. Hér sést hann tryggja sér sæti í sögubókunum sem eini
Íslendingurinn sem hefur lyft yfir 1.100 í samanlögðu. FRÉTTABLAÐIÐ/VILHELM